Sa'adet partiyisining istanbul yighinida Uyghurlar

2009 ‏- Yili 28 - féwral küni türkiyining eng chong partiyisidin biri hésablanghan saadet partiyisi istanbul yashlar teshkilatining uyushturushi bilen uyushturulghan yighindin bir körünüsh.

Bu saylamgha türkiye jumhuriyiti teripidin testiqlan'ghan her qaysi siyasi partiyiler özlirining namzatlirini körsitidu. Hazir türkiyining her qaysi sheherliride pütkül siyasiy partiyiler özlirining qollighuchilirini köpeytish, saylamda köp awazgha érishish üchün her xil siyasiy pa'aliyetlerni bashliwetti.

2009 ‏ - Yili 28 ‏ - féwral küni türkiyining eng chong partiyisidin biri hésablan'ghan sa'adet partiyisi istanbul yashlar teshkilati teripidin zeytinburnu rayonigha jaylashqan abdi ipekchi tenterbiye zalida keng kölemlik yighin uyushturuldi. Yighin'gha "sa'adet partiyisi yashlar kéchisi" dep nam bérilgen bolup, yighin'gha türkiyining her qaysi sheherlerdin kelgen 10 mingdin artuq kishi qatnashti. Yighin zaligha patmighan minglighan shexs ayaqta turushqa mejbur boldi. Yighin'gha sherqiy türkistan ma'arip we hemkarliq jem'iyitining re'isi hidayetulla oghuzxan bashchiliqidiki wekiller teklip bilen qatnashqan bolup, yighin'gha istanbulda yashawatqan köp sanda Uyghurlarmu ishtirak qildi.

Bu yighinning asasiy meqsiti, 1997 ‏ - yili 28 ‏ - féwral küni türkiyide hakimiyet yürgüzgen rifah partiyisining hökümiti türkiye armiyisi teripidin aghduruwétilgen we rifah partiyisige cheklime qoyup taqiwétilgen tarixiy künni eslesh, shundaqla 3 ‏ - ayning 29 ‏ - küni türkiyining pütkül sheherliride élip bérilidighan yerlik saylamda sa'adet partiyisining istanbul sheher bashliqliqigha namzat körsitilgen shexsni saylamda, köp awazgha érishtürüsh üchün köpligen xelq ammisining himayisige érishish iken.

Yighinda sa'adet partiyisining re'isi proféssor doktor numan qurtulmush, sa'adet partiyisi teripidin istanbul sheher bashliqi namzatliqigha körsitilgen proféssor doktor mehmet bekar'oghlu, türkiyining sabiq bash ministiri we milli küresh teshkilatining rohaniy lidéri, sa'adet partiyisining qurghuchisi proféssor doktor nejmidin erbakan qatarliq shexsler söz qildi.

1997 ‏ - Yili türkiyide hakimiyet yürgüzüwatqan rifah partiyisige cheklime qoyulup armiye teripidin taqiwétilgendin kéyin, mezkur partiyining nejmidin erbakan qatarliq asasi qatlam idare hey'et rehberliri sa'adet partiyisini qurghan we hazir bu partiyining bayriqi astida siyasiy pa'aliyet qilip kelmekte.

Hemmeylen'ge melum bolghinidek istanbulda yashawatqan Uyghurlarmu bu xildiki saylamda özlirining bir kishilik rolini oynaydu. Undaqta ular saylamda qaysi partiyige bélet tashlaydu? ular bélet tashlighan partiyidin némilerni kütidu? bu so'allarning jawabigha érishish üchün biz istanbulda pa'aliyet qiliwatqan sherqiy türkistan ma'arip we hemkarliq jem'iyitining re'isi hidayetulla oghuzxan ependi bilen söhbet élip barduq.