Әршидин исраилниң иниси әнвәр “акам һечқандақ җинайәт садир қилмиди”

Әршидин исраилниң түркийидики иниси әнвәр, акисиниң қазақистандин хитайға қайтуруп кетилгәнлики һәққидә ениқ учур игилигәнликини билдүрди.
Ихтиярий мухбиримиз әркин тарим
2011.06.03
enwer-israil-305.jpg Әнвәр исраилниң қолида акиси әршидин исраилниң рәсими. 2011-Йили 3-июн. Түркийә.
RFA/Erkin Tarim

Әнвәр исраил акиси әршидинниң ғулҗида һөрмәткә сазавәр пәзиләтлик һаятида һечқандақ җинайәт садир қилмиған пак бир яш икәнликини ейтти.

Әнвәр исраилниң ейтишичә,  акиси әршидин исраил 1972-йили 5-айниң 20-күни ғулҗиниң қорғас наһийисидә дуняға кәлгән, қорғас 1-оттура мәктәпни пүттүргәндин кейин шихәнзә педагогика институтида оқуған. Оқуш пүттүргәндин кейин күрә йезилиқ 2-оттура мәктипидә хитай тили оқутқучиси болуп ишлигән. 1997-Йили дөләт хәвпсизликигә дәхли йәткүзди дәп 6 йиллиқ кесилгән. Түрмидә 10 ай ятқандин кейин еғир кесәл болуп, 4 ай өйидә даваланған, кейин хитай сақчи даирилири өйидин зәмбилгә селип елип кетип, 6 йил үрүмчидики турмиға қамиған. У, 6 йил түрмидә ятқандин кейин 2003-йили қоюп берилгән. 2003-Йилидин кейин тиҗарәт билән шуғулланған әршидин исраил 2009-йили 9-айниң 25-күни чегра атлап қазақистанға қечип чиққан.

Әнвәр, акиси қазақистанда сотланғанда, өзиниң акисиниң сотиға қатнашқанлиқини, бир қетимлиқ сотниң 2 минут сүргәнликини, сотчиниң әйибләшни оқуп өткәндин кейин чиқиривәткәнликини, әршидин исраилниң адвокатиниң ақлаш үчүн сөзлишигә рухсәтму қилмиғанлиқини ейтти.

Әршидин исраилниң түркийидики иниси әнвәр радиомизға қилған сөзидә, акисиниң бигунаһ икәнликини, дуня дөләтлириниң униңға ярдәм қилип қутқузувелишини илтимас қилди.

Биз бу һәқтә тәпсилий мәлумат елиш үчүн әршидин исраилниң укиси әнвәр билән сөһбәт елип бардуқ.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.