Süriyide “Hel qilghuch jüme” namayishi

Qan tökülüshler yene ilgirikisidin köprek körülüshke bashlighan. Közetküchilerning barliqi yaki yoqluqining héchqandaq perqi bolmighan.

Süriyilik namayishchilar esed hakimiyitini texttin chüshürüshni nishan qilghan sho'arlarni towlap 13-yanwar jüme küni süriyining köpligen sheher we wilayetliride namayishlirini bashliwetken.

Qatarning “El jezire” téléwiziye qanili 2012-yili 13-yanwar künidiki xewiride süriyining demeshiq, hems, idlib, der'a, heleb qatarliq sheherliride élip bérilghan namayishlarni neq meydandin körsetken bolup, namayishchilar esed hakimiyitining texttin chüshüshini telep qilip chong kölemlik namayish uyushturghan.

Süriyilik kishilik hoquq pa'aliyetchisi muhemmed mudi 2012-yili 13-yanwar jüme küni “El jezire” téléwiziye qaniligha bergen bayanatida mundaq dédi: “Bügünki namayish beshshar el esedni islahatqa chaqirish emes, belki texttin chüshüshke chaqirghan jiddiy bir namayish boldi. Mundin ilgiri süriyige ereb döletliri ittipaqidin mexsus közetküchi guruppa kelse weziyette özgirish bolushini kütken süriyilikler bu közetküchilerning kelgenlikidin héchqanchilik bir addiy özgirishnimu hés qilalmidi. Ularning qolidin héch ish kelmeydighanliqini bildi. Hetta közetküchiler kelgendin kéyin weziyet téximu murekkepleshti. Shundaq qilip namayishchilarning esed hakimiyitining islah qilinishidin ümidi pütünley üzüldi. Shunga ular esed hakimiyitining texttin chüshüshini telep qilip omumyüzlük namayish uyushturdi.”

Közetküchilermu namayishchilargha hésdashliq qildi

Muhemmed mudi yene mundaq dédi: “Ereb döletliri ’ittipaqi teripidin süriyige ewetilgen közetküchiler bir tereptin jénini aman saqlashqa tirishsa, yene bir tereptin namayishchi xelqqe hésdashliq qilip ularning derdlirini anglashqa tiriship keldi. Emma ularmu esed hakimiyiti terepdarlirining zerbiliridin xaliy qalmidi. Chünki saqchilar ularghimu oq chiqardi. Süriyidiki esed hakimiyitining ademliri namayishchilargha oq chiqirish bilen tehdit qilip kelginidek, közetküchilergimu tehdit yaghdurmaqta. Emma bu közetküchiler guruppisi süriyining namayish chiqqan sheherlirining hemmisige bérip, emeliy ehwalni xatirilesh ishidin héch waz kechmidi. Tehdit yéghip tursimu süriyidin chiqip kétish koyida bolmidi. Buni közetküchilerning töhpisi déyishke bolidu. Yenila bu közetküchilerning qolidin ish kelmigenlikidin, ulardin aghrinishning yoli yoq.”