Nobél tinchliq mukapati sahibi lyu shawbo iz-déreksiz ghayib boldi

Norwégiyide chiqidighan pochta kechlik gézitining xewirige asaslan'ghanda, ötken yili küzdin bashlap nobél tinchliq mukapati sahibi lyu shawboning iz-dériki bolmighan.
Ixtiyariy muxbirimiz aygül yüsüp
2011-03-24
Share
liuxiaobo-305 Xitay türmiside yétiwatqan kishilik hoquq pa'aliyetchisi lyu shyawbo
RFA/Hailan

Lyu shawboning ayali lyu shya ötken yili öktebir éyida uni türmige bérip yoqlap kelgen we shuningdin kéyinki besh ay ichide uning héchqandaq xewirini alalmighan. Lyu shya a'ilige nezerbend qilin'ghachqa, bu yil 2-aydin bashlap sirt bilen alaqe qilishqa tamamen amalsiz qalghan.

Nobél komitétining katipi, nobél institutining bashliqi ge'ir lundestad muxbirgha, lyu shyawboning qeyerde ikenlikini hazirghiche héchkimning bilelmigenlikining özila, ademni intayin ensiritidu we xatirjemsiz qilidu dep éytqan.

Bezi kocha paranglirigha qarighanda, xitay hökümiti uni bashqa türmige yötkiwetken bolushi mumkin iken.

Bolupmu, xitayda yasimen güli inqilabi yüz bergendin kéyinki yéqinqi waqit ichide insan heqliri üchün küresh qilghuchi xitay ziyaliyliri we adwokatliri iz-déreksiz yoqap ketken we ularning hayati xéyimxeter astida qalghan.

Lündestad muxbirlargha yene mundaq dégen: biz hazirghiche lyu shawboning yéqinqi ehwali heqqide héchqandaq yéngi uchurgha érishelmiduq. Shunisi éniqki, biz uning hayatidin intayin ensirewatimiz. Biz uning iz -dérikini élishta yenila herqaysi axbarat wasitilirining yéngi uchurigha tayiniwatimiz we xitay hökümitining axbarat menbelirige diqqet qiliwatimiz.

Lyu shyawboning ayali lyu shya nobél tinchliq mukapati lyu shawbogha bérilish jakarlan'ghan ötken yili öktebir éyidin bashlap özining ehwali heqqide héchkimge xewer bérelmigen. Peqet, bu yil féwral éyining axirida u dostigha intayin qisqa bir uchur yollashqa muweppeq bolalighan bolup, u mundaq yazghan: men peqet yighlapla olturuwatimen,héchkim manga yardem qilmidi.

2010-Yilliq nobél tinchliq mukapati ötken yili öktebir éyida xitay démokratchisi lyu shawbogha bérilgenliki élan qilin'ghandin kéyin, xitay hökümiti her türlük diplomatiye yollirini ishqa sélip, norwégiye hökümitige bu mukapatni uninggha bermeslik heqqide qattiq bésim ishletken. Mukapat 10-dékabir küni tarqitilghanda mukapatni tapshurup élishqa héchkim kélelmey lyu shawbo üchün teyyarlan'ghan murasim zalidiki orunduq bosh qalghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet