Maralbéshi nahiyisi saqchiliri Uyghur ayallirini jazalidi

4 - Awghust künidiki hujumda öltürülgen 16 xitay qoralliq saqchi xadimlirining matem murasimgha qatnishiwatqan uyghur ayallirining matem meydanigha yighiliwatqan körünüshi. 2000 Gha yéqin uyghurlarmu matem murasimigha qatnashqan bolup, bir nechche kishiler AFP muxbirigha özlirining matemge buyruq bilen qatnishiwatqanliqini éytqan.

 Xelq'ara metbu'atlarda, Uyghurlarning diniy imtiyazliridin toluq behriman bolalmaywatqanliqi tilgha éliniwatqan peytlerde, dunya Uyghur qurultiyi, Maralbéshi saqchi tarmaqlirining, diniy pa'aliyet bilen shoghullan'ghanliqi ilgiri sürülgen 32 ayaldin 2 sini resmiy qolgha alghanliqini, qalghanlirigha 5000 yüendin 500 yüen'giche iqtisadiy jaza bergenlikini pash qildi.

Dunya Uyghur qurultiyining bayanatchisi dilshat réshit ependi bu heqte toxtaldi. Biz u teminligen uchurlargha asasen, maralbéshi nahiyilik saqchi idarisigha téléfun urup, yüz bergen weqe heqqide sürüshtürüsh élip bérishqa tirishtuq.

Xitay saqchisi, bizning erkin asiya radi'osidin téléfun urghanliqimizni anglapla, nahayiti keskin halda mundaq dédi: "xapa bolma, biz ziyaritingni qobul qilalmaymiz, sen qeyerning muxbiri bolsangmu aqmaydu."

D u q bayanatchisi dilshat réshit sözide yene, mezkur xewerni maralbéshi xelq hökümitining élan qilghan uqturushidin jezimleshtürgenlikini alahide eskertip ötti. Biraq, maralbéshi xelq hökümitining xadimi, bundaq bir weqe yüz bergenlikidin xewersiz ikenlikini, weqeni bizdin anglawatqanliqini bildürdi.

Maralbéshi nahiyilik saqchi idarisi we nahiyilik xelq hökümitidin bu heqte éniq melumatqa érishelmigendin kéyin, nahiye ahaliliridin sürüshtürüp köp izdenduq. Nurghun öyge téléfunimiz ulandi, emma waqit perqi tüpeyli, téléfonimizgha jawab béridighan adem chiqmidi, tessadipiy ulinip qalghan téléfonda yenila qana'etlinerlik bir jawabqa érishelmiduq.

Dunya Uyghur qurultiyining bayanatchisi dilshat réshit, nöwette puqralarning yüz bergen herqandaq birer weqeni ashkarilashqa jür'et qilalmaydighanliqini bildürdi.

Bayanatchi dilshat réshit ependi ashkarilighan qeshqer wilayetlik intérnét ma'aripi torbéti maralbéshi shöbisining xewiride, hazirgha qeder saqchi tarmaqlirining 26 xil uchurgha ige bolghanliqi, ularning ichide 32 ayalning qanunsiz, yer asti diniy herikitini pash qilghanliqi élan qilin'ghan.

Yuqiridiki awaz ulinishidin, bu heqtiki melumatimizning tepsilatini anglaysiler.