Almatada kommunar talipof xatirisige béghishlan'ghan xelq'araliq ilmiy muhakime yighini ötküzüldi

26-Noyabir küni almata shehiridiki qazaqistan penler akadémiyisining binasida qazaqistan jumhuriyitining bilim we pen ministirliqigha tewe pen komitétining qarmiqidiki süléyménof namidiki sherqshunasliq instituti sabiq qazaqistan penler akadémiyisining Uyghurshunasliq institutining mudiri we kéyinki Uyghurshunasliq merkizining sabiq rehbiri, körünerlik alim kommunar talipofning xatirisige béghishlan'ghan "ulugh yipek yolidiki sherq bilen gherbning uzara baghlinishi" mawzusida xelq ara ilmiy muhakime yighini ötküzdi.

Mezkur ilmiy yighin'gha sherqshunaslar, Uyghurshunaslar, tarixshunaslar, seyasetshunaslar we bashqa sahelerge mensup alimlarmu ishtirak qildi.

Muhakime yighinida sözge chiqqan alimlar kommunar talipofning Uyghurshunasliq we sherqshunasliq ilmigha qoshqan hessisi, Uyghurlar tarixigha munasiwetlik izdinishliri shuningdek heqiqiy rehberge xas qabiliyetliri bilen insaniy peziletlirini alahide yuqiri bahalidi.

Tilshunas alim shéripaxun baratof ependi kommunar talipof heqqide öz eslimilirini otturigha qoyup, kommunar ependining hayat waqtidiki izdinishliri ichide sherqiy türkistan islam jumhuriyitige a'it tetqiqatlarning alahide salmaqni igileydighanliqini bildürdi.