18-ئىيۇل خوتەن قىرغىنچىلىقىغا نارازىلىق بىلدۈرۈش يۈزىسىدىن گېرمانىيىدە نامايىش ئۆتكۈزۈلدى

26-ئىيۇل كۈنى گېرمانىيىدىكى ئۇيغۇرلار 18-ئىيۇل يۈز بەرگەن خوتەندىكى قانلىق قىرغىنچىلىققا نارازىلىق بىلدۈرۈش يۈزىسىدىن ميۇنخېندا يەنە بىر قېتىم نامايىش ئېلىپ باردى.
ئىختىيارىي مۇخبىرىمىز ئەكرەم
2011-07-26
Share
dolqun-eysalar-ulrik-delyus-305.jpg د ئۇ ق رەھبەرلىرىدىن مۇئاۋىن رەئىس ئەسقەرجان، باش كاتىپ دولقۇن ئەيسالار خەتەر ئاستىدىكى مىللەتلەرنى قوغداش تەشكىلاتى مەسئۇللىرىدىن ئۇلرىك دېليۇس بىلەن.2011-يىلى 26-ئىيۇل، ميۇنخېن.
RFA/Ekrem

شۇ تاپتا نامايىش مەيدانىدىن ئىگىلىگەن ئۇچۇرلارنى دىققىتىڭلارغا سۇنۇۋاتىمىز.

ۈگۈنكى بۇ نامايىشنى د ئۇ ق، ياۋروپا شەرقىي تۈركىستان بىرلىكى تەشكىلاتى، خەتەر ئاستىدىكى مىللەتلەرنى قوغداش تەشكىلاتى ۋە تىبەت تەشكىلاتى بىرلىكتە ئۇيۇشتۇرغان بولۇپ، شەھەر مەركىزىدىكى مەريەم مەيدانىدا سائەت 11 بىلەن باشلانغان بۇ نامايىشقا كۆپ ساندا ئۇيغۇرلار قاتناشتى. ئۇيغۇر نامايىشچىلارنىڭ قوللىرىدىكى ئاي-يۇلتۇزلۇق كۆكبايراق، «يوقالسۇن خىتاي دۆلەت تېررورى!»، «ئۇيغۇرلارغا ئەركىنلىك!» دېگەندەك شوئارلار يېزىلغان لوزۇنكىلار ۋە 18-ئىيۇل خوتەن قىرغىنچىلىقى ھەم 5-ئىيۇل ئۈرۈمچى قىرغىنچىلىقىغا ئائىت سۈرەتلەر ئەتراپتىكى ئاممىنىڭ دىققىتىنى چەكتى.

germaniye-namayish-meydani-xoten-weqesi-385.jpg
خوتەن ۋەقەسى مۇناسىۋىتى بىلەن بولغان نامايىش مەيدانىدىن كۆرۈنۈش. 2011-يىلى 26-ئىيۇل ميۇنخېن.
RFA/Ekrem

بۇ قېتىمقى نامايىشقا قاتناشقان خەتەر ئاستىدىكى مىللەتلەرنى قوغداش تەشكىلاتىنىڭ مەسئۇللىرىدىن ئۇلرىك دېلىيۇس ئەپەندى نەق مەيداندىن زىيارىتىمىزنى قوبۇل قىلىپ، « 18-ئىيۇل خوتەن قىرغىنچىلىقى خىتاي ھۆكۈمىتىنىڭ ئۇيغۇرلار ئۈستىدىن ئېلىپ بېرىۋاتقان ئېتنىك قىرغىنچىلىقىنىڭ روشەن دەلىلى، بۇ ئادالەتسىزلىككە دۇنيا سۈكۈت قىلماسلىقى كېرەك!» دېدى ۋە گېرمانىيە ھۆكۈمىتى باشچىلىقىدا تەرەپسىز بىر تەكشۈرۈش ئۆمىكىنىڭ شەرقىي تۈركىستانغا تىزدىن ئەۋەتىلىشىنى قولغا كەلتۈرۈش ئۈچۈن ھەرىكەت قىلىدىغانلىقىنى بىلدۈردى.

xeter-astidiki-milletlerni-qoghdash-385.jpg
خەتەر ئاستىدىكى مىللەتلەرنى قوغداش تەشكىلاتى ئىشلىگەن پىلاكات. 2011-يىلى 26-ئىيۇل، ميۇنخېن.
RFA/Ekrem

د ئۇ ق مۇئاۋىن رەئىسى ئەسقەرجان بۇ قېتىمقى نامايىش توغرىسىدا ئىپادە بىلدۈرۈپ ئۆتتى. ئۇ سۆزىدە بۈگۈن خوتەندىكى قىرغىنچىلىققا نارازىلىق بىلدۈرۈپلا قالماي، گېرمانىيە ھۆكۈمىتىنىڭ 2012-يىلىنى «خىتاي مەدەنىيەت يىلى» قىلىپ بېكىتكەنلىكىگىمۇ نارازىلىق بىلدۈرۈشنى مەقسەت قىلغانلىقىنى ۋە مۇئاۋىن شەھەر باشلىقى بىلەن بۈگۈن سەھەردە كۆرۈشۈپ، ئۆز پىكىرلىرىنى ئوتتۇرىغا قويغانلىقىنى ئەسكەرتتى.

د ئۇ ق باش كاتىپى دولقۇن ئەيسا ئەپەندى بۇ قېتىم نامايىش توغرىسىدا چۈشەنچە بېرىش بىلەن بىرگە، گېرمانىيىنىڭ 2012-يىلىنى خىتاي مەدەنىيەت يىلى قىلىپ بېكىتىش مەسىلىسىگە بولغان نارازىلىقلىرىنى ئىپادىلەشنىڭ تۇنجى قەدىمىنى بۈگۈن ئالغانلىقىنى تەكىتلىدى.

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت