Ослода олимпик йиғиниға қарши дағдуғилиқ намайиш өткүзүлди

Түнүгүн чүш саәт үчтә норвигийиниң пайтәхти осло шәһиридә дағдуғилиқ намайиш паалийити өткүзүлди.Намайишни норвегийә уйғур комитети орунлаштурған болуп намайишниң мәқсити пат йеқинда хитайда өткүзүлмәкчи болған олимпик тәнһәрикәт йиғинини байқут қилиштин ибарәт.
Мухбиримиз айгул йүсүп хәвири
2008-06-26
Share

 Бу қетимқи намайишқа 100 гә йеқин уйғурлар һәм норвегийә инсан һәқлири оргининиң хадимлири,норвегийә тибәт комитети вә башқа норвегларму тәклипкә бинаән иштирак қилди.

Әр - аял вә балилардин тәшкил тапқан дағдуғилиқ намайишчилар қошуни қоллириға шәрқий түркистанниң ай - юлтузлуқ көк байриқини вә хитайлар диктатор, олимпик йиғинини байқут қилайли, уйғурларға демократийә, сиясий мәһбуслар қоюп берилсун дегәндәк түрлүк шуарлар йезилған лозунка - пилакатларни көтүрүп җараңлиқ шуар товлап пайтәхт ослониң адәм әң көп йиғилидиған даңлиқ кочиси болған карл җоһан кочисидин өткәндә, норвеглар вә башқа чәтәллик зиярәтчиләр алаһидә диққәт билән намайишни көрди. Уйғурчә әнәнивий кийим - кечәкләрни кийгән кичик достлар бир қолида ай - юлтузлуқ көк байрақни көтүрүп йәнә бир қолида намайиш вәрәқилирини әтраптики һәр милләт кишилиригә тарқатти.

Намайишчилар қошуни шәһәр мәркизидики парламент бинасиниң алдиға келип тохтиғанда тәшкилат рәһбәрлири,уйғурлар дуч келиватқан сияси, иқтисади вә диний бесимлар, қизларниң хитай өлкилиригә йөткилиши, ана тил мәсилиси шундақла хитай һөкүмитиниң олимпикниң бихәтәрлик мәсилисини баһанә қилип йүзлигән бигунаһ уйғурларни тутуп түрмиләргә ташлиғанлиқини, олимпик тәнһәрикәт йиғининиң уйғурларға күч,инақлиқ вә ишәнч елип кәлмәй, әксичә вәйранчилиқ вә балайи ‏ - апәтләрни елип келиватқанлиқини әмәлий мисаллар арқилиқ көрситип нутуқ сөзлиди.

Нутуқ ахирлашқанда ай - юлтузлуқ көк байрақниң нусхиси вә олимпик йиғинини байқут қилиш һәққидики рәсим чушурулгән шарлар намайишчиларниң әркинлик - әркинлик дәп товлиған садаси ичидә асманға қоюп берилип намайишни техиму юқири әвҗигә көтәрди.

Парламент бинаси алдидики паалийәт ахирлашқанда, барлиқ намайишчилар хитай әлчиханисиниң алдиға келип топлинип шәрқий түркистанға мустәқиллиқ, уйғурларға әркинлик, хитайлар вәтинимиздин йоқалсун, вәтән бизниң дегәндәк түрлүк шуарларни товлап өзлириниң хитай һөкүмитигә болған күчлүк ғәзәп - нәпритини билдүрүп өтти.

Ишиклири тақалған, дәризә қапқақлири һим етилгән, һәтта байрақлири еливитилгән хитай әлчиханисиниң алдидики уйғурларниң һәйвәтлик намайиши сақчи аптомобиллири вә сақчиларниң һимайисидә интайин тәртиплик өтти, намайишчилар йәнә бир қетим әркинлик, әркинлик дәп шуар товлап һөрлүккә символ қилинған шарларни асманға қуюветип саәт 6 дин өткәндә намайишни ғәлибилик ахирлаштурди. Бүгүнки намайишқа қатнашқан бир нәччәйлән мухбиримизниң зияритини қобул қилди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт