Далйән сақчилири әрздар нурунгүл тохтиниң оғлини елип қачқан хитай қарақчини тутти

2010-Йили 9-айда хитайниң далйән шәһиридә тиҗарәт қиливатқан нурунгүл тохтиниң 8 яшлиқ оғлини елип қачқан қарақчи, нурунгүлниң уни байқап тәһдит селиши билән, 24 саәттин кейин балини қоюп бәргән.
Мухбиримиз шөһрәт һошур
2012.02.28
Share on WhatsApp
Share on WhatsApp
nurungul-toxti-balisi Рәсимдә нурунгүл тохти 9 яшлиқ оғли билән. 2011-Йили 25-декабир, бейҗиң.
RFA/Shohret Hoshur

Нурунгүл вәқәни әйни чағда сақчи органлириға мәлум қилған болсиму, қарақчи һечқандақ җазаға тартилмиған. Буниң билән нурунгүл, далйән шәһәрлик сақчи идариси үстидин бейҗиңға берип әрз сунған иди. Мәлум болушичә, далйән сақчилири йеқинда мәзкур қарақчини тутқан вә икки нәпәр сақчи учтурпанға келип, делони бир тәрәп қилишни кечиктүргәнлики үчүн, нурунгүл тохтидин әпу сориған.

Икки йилдин бери хитай қарақчиниң җинайитигә көз юмуп кәлгән далйән сақчилири, нурунгүл тохти бейҗиңға берип мәркизи интизам тәкшүрүш комитети, б д т инсан һәқлири ишханиси вә дөләтлик әрзийәт идарисигә әрз сунған вә наразилиқ билдүргән вә әһвални хәлқара ахбаратқа ашкарилиғандин кейин һәрикәткә өткән.

Далйән сақчилири мәзкур җинайәт гумандарини мушу айниң бешида тутқун қилған. Далйән сақчилири җинайәт гумандарини қолға елишниң алдида учтурпанға берип, нурунгүлдин җинайәт гумандарини тонуп беришни тәләп қилған. Сақчилар нурунгүл билән сөһбәтлишиш давамида униңға йәнә иқтисадий җәһәттин ярдәм бериш нийитини ипадилигән. Нурунгүл бешиға кәлгән келишмәслик үчүн ярдәм қобул қилмайдиған әмма төләм алидиғанлиқини билдүргән.

Нурунгүл оғлиниң хитай қарақчи тәрипидин қачурулуш вәқәсини бир иҗтимаий вәқә дәп әмәс, бәлки миллий өч елиш вәқәси дәп қаримақта.

Нурунгүлниң қаришичә, униң хитай қарақчи билән бурун һечқандақ шәхсий зиддийити болған әмәс. Үрүмчидә 5-июл вәқәсидин кейин хитайниң тәшвиқат орунлири уйғурларни қарилап тәшвиқ қиливәргәнлики үчүн, хитай өлкилиридиму уйғурларға қарши өч елиш туйғуси шәкилләнгән.

Нурунгүлниң билдүрүшичә, униң оғли мана мушу миллий зиддийәтниң зиянкәшликигә учриған. Нурунгүл шуңа далйән сақчилириниң “немә тәлипиңиз бар?” дегән соалиға, “5-июлға қатнашқан уйғурлар қандақ җазаланған болса, оғлумни әпқачқан җинайәтчиму шундақ җазалиниши керәк” дәп җаваб бәргән. У йәнә әгәр далйән соти вәқәни адил бир тәрәп қилмиса, өзиниң оғли үчүн интиқам алдиғанлиқини баян қилған.

Далйән сақчилириниң мәзкур қарақчини тутқанлиқи вә учтурпанға келип нурунгүлдин әһвал игилигәнлики нурунгүлниң дава тарихидики дәсләпки бир утуқ, әмма бу уштумтутла қолға кәлгән әмәс, бейҗиңдин икки қетим тутуп кетилиш, шиәндә пойиздин қечип кетиш, учтурпанда 39 күн қамақта йетиш, униң ашу 8 яшлиқ оғлиниң һәқ-һоқуқи үчүн төлигән бәдәллириниң пәқәтла бир парчиси. Нөвәттә нурунгул учтурпанда 39 күн һәқсиз қамап қоюлғини үчүн учтурпан даирилиридин төләм тәләп қилмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.