پالاۋ ئارىلىدىكى ئۇيغۇرلارنىڭ تۇرمۇشى كاپالەتكە ئىگە قىلىندى
ﻣﯘﺧﺒﯩﺮﯨﻤﯩﺰ ﺋﻪﻗﯩﺪﻩ
2009.12.08
2009.12.08

RFA Photo / Shohret Hoshur
گۇئام ئارىلىدا چىقىدىغان گۇئام خەۋەر تور بېتىدا، پالاۋ پرېزىدېنتى جوھنسون تورىبىئوڭنىڭ، گۈەنتانامودا تۇتۇپ تۇرۇلغان ۋە يېقىندا پالاۋغا ئورۇنلاشتۇرۇلغان 6 ئۇيغۇرنىڭ ئەھۋالى توغرىسىدا مۇخبىرنىڭ زىيارىتىنى قوبۇل قىلىپ، ئېيتقان سۆزلىرى ئېلان قىلىنغان بولۇپ، پرېزىدېنت جوھنسون سابىق 6 ئۇيغۇر مەھبۇسىنىڭ پالاۋ ئارىلىدا ناھايىتى ياخشى ياشاۋاتقانلىقىنى ۋە پالاۋ جەمئىيىتىگە يېقىندىن ماسلىشىۋاتقانلىقىنى بىلدۇرگەن.
پرېزىدېنت جوھنسون يەنە، پالاۋغا ئورۇنلاشتۇرۇلغان 6 ئۇيغۇرنىڭ پالاۋ جەمئىيىتىگە تامامەن ماسلىشىشى ئۇچۇن ئۇلارنىڭ سالامەتلىكىنى تەكشۈرۈش، تۇرالغۇ ئۆيگە ئورۇنلاشتۇرۇشقا ئوخشاش ھەر خىل ئېھتىياجلىرىنىڭ كاپالەتكە ئىگە قىلىنغانلىقىنى بىلدۈرگەن.
پالاۋ پرېزىدېنتى مۇخبىرغا يەنە، ئۇلارنىڭ تۈرلۈك تەلىم-تەربىيە پروگراممىلىرىغا قاتنىشىدىغانلىقىنى سۆزلەپ مۇنداق دېگەن: "ئۇلار بىزگە ئوخشاشلا ئىكەن، پالاۋغا يېتىپ كەلگەندىن كېيىن ساقاللىرىنى ئېلىپ جەمئىيەتكە ئارىلىشىپ كەتتى، بەزىدە بۇ ئۇيغۇرلارنى يەرلىكلەردىن پەرقلەندۈرەلمەي قالىسىز، مەن ئۇلارنىڭ ئېنگلىز تىلى، تارىخ ۋە بىزنىڭ خەلقىمىزنىڭ مەدەنىيىتىنى ئۇگىنىشى ئۇچۇن، ئۇلارنى پالاۋدىكى ئىجتىمائى ئالىي تېخنىكوملىرىدا ئوقۇشقا ئورۇنلاشتۇرۇش ئىشىنى تەشەببۇس قىلىۋاتىمەن."
بىز پالاۋدىكى ئۇيغۇرلارنىڭ ھازىرقى ئەھۋالى توغرىسىدا تېخىمۇ تەپسىلىي مەلۇمات ئېلىش ئۈچۈن، ئۇلارغا تەرجىمانلىق قىلىۋاتقان، ئاۋىسترالىيە ئۇيغۇر جەمئىيىتىنىڭ رەئىسى مەمتىمىن ئەلا ئەپەندىنى زىيارەت قىلدۇق.
يۇقىرىدىكى ئاۋاز ئۇلىنىشىدىن، بۇ ھەقتىكى مەلۇماتىمىزنىڭ تەپسىلاتىنى ئاڭلايسىلەر.