خەلقئارا قەلەمكەشلەر مەركىزىنىڭ 9-نۆۋەتلىك تۈرمىدىكى قەلەمكەشلەرنىڭ ھەق-ھوقۇقىنى قوغداش يىغىنى ئاخىرلاشتى

3-ئاينىڭ 24-كۈنى بېلگىيە پايتەختى بريۇسسېلدا باشلانغان خەلقئارا قەلەمكەشلەر مەركىزىنىڭ 9-نۆۋەتلىك تۈرمىدىكى قەلەمكەشلەرنىڭ ھەق-ھوقۇقىنى قوغداش يىغىنى 3-ئاينىڭ 27-كۈنى ئاخىرلاشتى.
ئىختىيارىي مۇخبىرىمىز ئەكرەم
2011.03.29
Qelemkeshler-jamiyiti-uyghur-yazghuchi-305.jpg بېلگىيە پايتەختى بريۇسسەلدا ئېچىلغان خەلقئارا قەلەمكەشلەر مەركىزىنىڭ 9-نۆۋەتلىك تۈرمىدىكى قەلەمكەشلەرنىڭ ھەق-ھوقۇقىنى قوغداش يىغىنى. 2011-يىلى 24-27-مارت.
RFA/Ekrem

يىغىنغا قاتناشقان خەلقئارا قەلەمكەشلەر ئۇيغۇر مەركىزىنىڭ رەئىسى قەيسەر ئۆزھۇن ئەپەندى 3-ئاينىڭ 26-كۈنى ئۆتكۈزۈلگەن، خىتايدىكى قەلەمكەشلەر ۋە ئۇيغۇر، تىبەت قەلەمكەشلىرى مەسىلىسى مۇھاكىمە يىغىنىدا سۆزگە چىقىپ، « ياۋا كەپتەر» ناملىق ئەسىرى تۈپەيلى 10 يىللىق قاماق جازاسىغا ئۇچرىغان نۇرمۇھەممەت ياسىن قاتارلىق ئۇيغۇر قەلەمكەشلىرىنىڭ پاجىئەلىك تەقدىرى توغرىسىدا دوكلات بەردى.

Qelemkeshler-jamiyiti-uyghur-yazghuchi-385.jpg
خەلقئارا قەلەمكەشلەر تەشكىلاتى تىل ۋە تەرجىمە ھوقۇقى كومىتېت مۇئاۋىن رەئىسى قەيسەر ئۆزھۇن ئەپەندى (ئوتتۇرىدا) خەلقئارا قەلەمكەشلەر يىغىنىدا. 2011-يىلى 27-مارت.
RFA/Ekrem
تۈرمىدىكى ئۇيغۇر قەلەمكەشلىرى مەسىلىسى يىغىن ئەھلىنىڭ كۈچلۈك دىققىتىنى جەلپ قىلدى. ئۇيغۇر قەلەمكەشلەر تەشكىلاتىنىڭ رەئىسى قەيسەر ئۆزھۇن ئەپەندى بۇ تەشكىلاتنىڭ ئۇيغۇر قەلەمكەشلىرى مەسىلىسىنى يىللاردىن بۇيان ئوتتۇرىغا قويۇپ كېلىۋاتقانلىقىنى، خەلقئارا قەلەمكەشلەر مەركىزىگە تەۋە 145 تەشكىلات ئەزالىرىنىڭ ئۇيغۇرلار ھەققىدە چوڭقۇر چۈشەنچىگە ئىگە ئىكەنلىكىنى تىلغا ئالدى.

قەيسەر ئۆزھۇن ئەپەندى، خەلقئارا قەلەمكەشلەر مەركىزىنىڭ ھەر قېتىملىق يىغىنىدا نۇرمۇھەممەت ياسىن مەسىلىسى ئارقىلىق بىر پۈتۈن ئۇيغۇر مەسىلىسىنى دۇنيا يازغۇچىلىرىغا تونۇتۇپ كېلىۋاتقانلىقىنى، بۇ قېتىمقى خەلقئارالىق يىغىندىمۇ يۈزلىگەن داڭلىق يازغۇچىلارغا ئۇيغۇرلارنىڭ ئازابلىق ھايات كەچمىشلىرىنى ئاڭلىتىش پۇرسىتىگە ئېرىشكەنلىكىنى، «ياۋا كەپتەر» ناملىق ئەسەرنىڭ جەمئىي 40 خىل تىلغا تەرجىمە قىلىنغانلىقىنى ئېيتتى.

خەلقئارا قەلەمكەشلەر مەركىزىنىڭ ب د ت ۋە ياۋروپا پارلامېنتىدىمۇ مەخسۇس ۋەكىللىرى خىزمەت قىلىۋاتقان بولۇپ، 3-ئاينىڭ 26-كۈنى ئۇلار خەلقئارا قەلەمكەشلەرگە ۋاكالىتەن ب د ت ۋە ياۋروپا پارلامېنتىدا ئېلىپ بارغان پائالىيەتلىرى توغرىلىق دوكلات بېرىپ ئۆتكەن ئىدى. قەيسەر ئۆزھۇن ئەپەندى ئۇيغۇرلار مەسىلىسىنى ئۇلارنىڭ تىرىشچانلىقى ئارقىلىق ب د ت ھەم ياۋروپا پارلامېنتىغا ئاڭلىتىش ئىمكانلىرىنىڭ بارلىقىنى، 2010-يىلى نۇرمۇھەممەت ياسىن مەسىلىسىنى ئاڭلىتىپ ئۆتكەنلىكىنى تىلغا ئالدى.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.