Икки нәпәр уйғур яш, хитай әскәрлиригә һуҗум қилип, 16 әскәрни өлтүргән

Хитай чегра мудапиә қисиминиң қәшқәрдә турушлуқ әтрити бугүн әтигән уштумтут һуҗумға учриған. Һуҗумда 16 нәпәр әскәр өлгән, 16си яриланған. Һуҗум қилғучилар 28 вә 30 яштики икки нәпәр уйғур яш болуп, улар қолға елинған.
Мухбиримиз шөһрәт һошур хәвири
2008-08-04
Елхәт
Пикир
Share
Принт
2008‏-Йили 4 - авғуст сәһәрдики 2 уйғурниң хитай қораллиқ сақчилириға қилған һуҗумидин кейин, хитай сақчилири пүтүн қәшқәр кочилирида разведкини күчәйткән болуп, сүрәттә, чарлиғучи хитай сақчилири чәтәлликләр билән сөзләшмәктә.
2008‏-Йили 4 - авғуст сәһәрдики 2 уйғурниң хитай қораллиқ сақчилириға қилған һуҗумидин кейин, хитай сақчилири пүтүн қәшқәр кочилирида разведкини күчәйткән болуп, сүрәттә, чарлиғучи хитай сақчилири чәтәлликләр билән сөзләшмәктә.
AFP Photo
 Вәқәни әң дәсләп шинхуа агентлиқи хәвәр қилди. Хәвәрдә вәқә һәққидә наһайити қисқа мәлумат берилгән. Бу мәлуматқа асасланғанда, әтигән саәт 7 дин 55 минут өткәндә, икки нәпәр уйғур бир йүк аптомобили билән келип, бир меһхана алдида мәшқ елип бериватқан хитай әскәрлиригә һуҗум қилған. Улар алди билән йәрлик усулда ясалған қол бомбиси атқан, арқидин пичақ билән һуҗум қилған.

Хәвәрдә йәнә, йүк аптомобилиға партлатқуч дора қачиланғанлиқи вә униң йол яқисидики истолбиға үсүп партлитилғанлиқи баян қилинған. Хәвәрдә билдүрүлүшичә, һуҗумчилардин бири бир пути яриланған, йәнә бири бир қолидин айрилған һаләттә тирик қолға елинған.

Биз вәқә һәққидә мәлумат елиш үчүн қәшқәрдики алақидар орунларға телефон қилдуқ. Сақчи орунлири вәқә һәққидә мәлумат беришни рәт қилди. Қәшқәр вилайәтлик 2 ‏- дохтурханиға телефон қилип, яридарларниң әһвалини сориғинимизда, яридарларниң вилайәтлик 1‏ - дохтурғанида икәнликини баян қилди. 1 - Дохтурханиға телефон қилғинимизда, яридарлар санини 17 дәп билдүрди. Әмма тәпсилий мәлумат беришни рәт қилди.

Биз телефон мулазимәт баш апарати хадимлиридин бүгүн әтигән вәқә йүз бәргән меһманханиниң телефонини дәп бериң дегинимиздә, йичүән меһманханисиниң телефонини бәрди. Йичуән меһманханиси қәшқәр миллий шипаханисиға йеқин җайда вә сәмән йоли үстидә болуп, вәқәниң сәмән йолида йүз бәргәнлики еһтималға йеқин көрүнмәктә.

Шинхуа агентлиқи бу хәвәрни тарқатқандин кейин, пүтүн дуня ахбарати нәзирини қәшқәргә ағдурди. Әмма даириләр чәтәл мухбирлириға вәқәниң йүз бәргәнликини етирап қилған болсиму, тәпсилатини баян қилмиған. Франсийә ахбарат агентлиқи үрүмчи айродромида қәшқәрдин қайтқан бир германийилик саяһәтчидин әһвал игилигән.

Герман саяһәтчи Siegfried Maurer өзиниң әтигән саәт 8 дә қаттиқ партлиған бомба авази билән ойғанғанлиқини, вәқәниң өзи турған меһманханиниң алдидики йолда йүз бәргәнликини, вәқәдин кейин 4 саәткичә өзлириниң сиртқа чиқишиға йол қоюлмиғанлиқини билдүргән. У йәнә бир түркүм сақчиларниң ятаққа кирип, рәсим вә синалғу апаратлирини тәкшүргәнликини билдүргән. Йәнә бу саяһәтчи, сақчиларниң вәқә йүз бәргән йолни ююп қан дағлирини тазилиғанлиқини билдүргән.

Америкилиқ саяһәтчи Timothy O'Rourke вәқә йүз бәргән мәйданға, 5 саәттин кейин берип вәзийәтни көзәткән. У франсийә ахбарат агентлиқиға: "әтрапта бир қанчә сақчи айлинип йүрүпту, коча чилиқ - чилиқ су, вәқәниң изини йошурушқа тиришиливатқанлиқи ениқ. У йәнә вәқә йүз бәргән мәйданда, йол яқисидики бир бинада дәз кәткән деризиләр, йиқилған бир истолба вә чечилип ятқан ток симлири қатарлиқ вәқәниң излирини һелиһәм көргили болиду," дәп баян қилған.

 Бүгүнки хәлқара хәвәрләрдә, алдинқи айда қәшқәрдә 5 кишигә өлүм җазаси берилгәнлики, үрүмчидә диний сөһбәт үстидики қоралсиз уйғурларниң оққа тутулғанлиқи қатарлиқ уйғурлар һаятидики зор вә ечинишлиқ вәқәләр әсләп өтүлди. Хәвәрләрдә йәнә, уйғур райониниң муавин рәиси күрәш мәхсутниң бу вәқәдин үч күн аввал шәрқи түркистанчилар тәһдит салалмайду дегән сөзлири қистурулди. Хәвәрләрдә болупму, бу вәқәниң олимпиктин 4 күн аввал йүз бәргәнлики алаһидә тәкитләнди.

Пикирләр (0)
Share
Толуқ бәт