Рабийә қадир ханим 'осло әркинлик мунбири' намлиқ хәлқара кишилик һоқуқ йиғинида нутуқ сөзлиди

Дуня уйғур қурултийиниң рәиси рабийә қадир ханим 26 - чесла чүштин кейин норвегийә пайтәхти ослоға йетип кәлди. Рабийә қадир ханим үч кун давамлишидиған осло әркинлик мунбири намлиқ хәлқаралиқ кишилик һоқуқ йиғиниға қатнишиду.
Мухбиримиз айгүл
2010.04.27
Rabiye-Xanim-Filim-Festiwalida-sozde-305 2009 - Йили 8 - авғуст, рабийә қадир ханим австралийиниң мелбурн шәһридә өткүзүлгән хәлқаралиқ филим фестивалида, "муһәббәтниң 10 шәрти" намлиқ филимниң тунҗи қойулуш мурасимида сөз қилмақта.
AFP Photo

Осло әркинлик мунбири намлиқ бу хәлқаралиқ кишилик һоқуқ йиғини баш шитаби нюйоркта болған "кишилик һоқуқ фонди җәмийити" тәрипидин һәр йили бир қетим ослода өткүзүш бекитилгән хәлқаралиқ кишилик һоқуқ йиғини болуп, бу қетимқиси пайтәхт ослода өткүзүлгән 2 - қетимлиқ йиғин болуп һесаблиниду.

Бу қетимқи йиғинға дуняниң һәрқайси җайлиридики мәшһур кишилик һоқуқ паалийәтчилири вә сияси әрбаблардин болуп 50тин артуқ киши тәклип қилинған. Буларниң ичидә һиндонезийиниң сабиқ баш министири, һазирқи хәлқ адаләт партийисиниң башлиқи әнивәр ибраһим вә колумбийә һөкүмәткә қарши қораллиқ күчлири тәрипидин 6 йил гөрүгә елинған колумбийилик сиясий паалийәтчи иңрид бәтанкоурт вә буниңдин башқа көплигән мәшһур шәхсләр бар. Рабийә қадир ханим буларниң ичидики әң һөрмәтлик меһман сүпитидә бу йиғинға тәклип қилинған кишиниң бирсидур.

26 - Април шәһәрлик һөкүмәт залида өткүзүлгән ечилиш мурасимида, кишилик һоқуқ фондиниң қурғучиси, бу йиғинниң баш саһипхани тһор һалворссән рабийә қадир ханимни меһманларға алаһидә тонуштуруп, өзиниң рабийә қадир ханимниң җасарити вә өз хәлқи үчүн төлигән бәдәллиридин чоңқур тәсирләнгәнликини, һаяти бойи рабийә қадир ханимни вә уйғурларни қоллайдиғанлиқини, хитайниң мустәбит түзүмигә қарши уйғурлар билән бир сәптә туруп күрәш қилидиғанлиқини баян қилди.

У киши йәнә, рабийә қадир ханимға болған чоңқур һөрмитини ипадә қилиш үчүн бүгүн әтигән башланған нутуқ сөзләш йиғининиң биринчи қетимлиқ нутуқ сөзләш вақтини рабийә қадир ханимға бәргән. Бундин башқа, рабийә қадир ханим мушу күнләрдә норвегийидә дөләт зияритидә болуватқан русийә президенти демитрей медвидев чүшкән мәшһур гранд меһманханисиға орунлаштурулған.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.