Рабийә қадир ханим осло шәһәрлик һөкүмәт залида нутуқ сөзлиди

Дуня уйғур қурултийиниң рәиси рабийә қадир ханим 26 - чесла чүштин кейин норвегийә пайтәхти ослоға йетип кәлгән болуп, үч күн давамлашқан осло әркинлик мунбири намидики хәлқаралиқ кишилик һоқуқ йиғиниға қатнашти.
Мухбиримиз айгүл
2010.04.29
Norwegiye-Rafto-fondining-bashlighi-Trese-Xanim-bilen-birge-305.jpg Сүрәттә, рабийә қадир ханим осло әркинлик мунбири намидики хәлқаралиқ кишилик һоқуқ йиғини җәрйанида норвегийә рафто фондиниң башлиғи трәсә ханим билән биргә.
RFA Photo / Aygul Yusup

Рабийә қадир ханим үч кун давамлашқан мәзкур йиғинда уйғурларниң бешиға кәлгән еғир кишилик һоқуқ дәпсәндичилики мәсилиси һәққидә кәң даиридә нутуқ сөзлигәндин башқа, дуняниң һәр қайси җайлиридин кәлгән даңлиқ әрбаблар, сиясийонлар, кишилик һоқуқ паалийәтчилири билән көрүшти вә қизғин сөһбәттә болди.

Рабийә қадир ханим йиғинниң иккинчи күнидә норвегийидики вә башқа дөләтләрдин кәлгән мухбирларға ахбарат берип, өткән йили йүз бәргән 5 - июл қирғинчилиқидин кейин хитай һөкүмитиниң уйғурларға қаратқан кәң көләмлик бастуруш, тутқун қилиш, өлтүрүш, тутқун қилинғанларниң из - дерәксиз йоқап кетиши, түрмиләрдә бигунаһ инсанларни қейин ‏ - қистаққа елип сорақ қилиш, қийин - қистақ билән олтуруш, қануни сот тәртиплири елип берилмиған әһвал астида, кәйни - кәйнидин өлум җазалириға һөкүм қилиш қатарлиқ вәһши қилмишларни уларға аңлатти вә паш қилди.
Rabiye-xanim-Oslo-Sheherlik-hokumettiki-sozidin-keyin-mihmanlar-bilen-305.jpg
Сүрәттә, рабийә қадир ханим осло әркинлик мунбири намидики хәлқаралиқ кишилик һоқуқ йиғини җәрйанида, уйғур достлири вә йиғин иштиракчилири билән биргә.
RFA Photo / Aygul Yusup

Буниңдин башқа, рабийә қадир ханим норвегийә һөкүмити ташқи ишлар министирлиқиниң уйғурларниң йеқинқи әһвалиға җиддий көңүл болуп, хитайларға бесим ишлитип, уйғурларға қаритилған бу қирғинчилиқларни тохтитишқа түрткә болушини илтимас қилди.

Бүгүн чүштин кейин, рабийә қадир ханим осло әркинлик мунбири намидики хәлқаралиқ кишилик һоқуқ йиғининиң ахирқи қисми болған йәнә бир паалийити осло шәһәрлик һөкүмәттә өткүзүлидиған нутуқ сөзләш йиғинида нутуқ сөзлиди.

Дуняниң һәр қайси җайлиридин тәклип қилинған меһманлар вә норвегийидики кишилик һоқуқ паалийәтчилири, сиясий әрбаблар вә стюдентлардин болуп миңдин артуқ киши қатнашқан нутуқ сөзләш йиғинида рабийә қадир ханимға йәнила әң муһим нутуқ сөзлигүчи киши сүпитидә орун берилгән. Уйғурларниң сияси, иқтисади вә кишилик һоқуқ мәсилилири җәһәттә дуняда һечқандақ бир милләтниң бешиға кәлмигән еғир бесим вә күлпәтләр ичидә яшаватқанлиқи һәққидә әтраплиқ тохталған рабийә қадир ханим, дунядики демократийини вә әркинликни яқлиғучи адаләтпәрвәр инсанларниң уйғур мәсилисигә вә уйғурларниң нөвәттики еғир әһвалиға җиддий көңүл бөлүшини, уйғурларға ярдәм беришини вә хитай һөкүмитиниң уйғурларға қаратқан ирқий йоқитиш сияситигә җиддий инкас қайтуруп бу қилмишларни тохтитишқа дәвәт қилишини үмид қилди.

Рабийә қадир ханим бүгүн чүштин кейин норвегийидики паалийитини ғәлибилик тамамлап дуня уйғур қурултийиниң муавин рәиси сәмәт абла әпәнди вә алим сейитофларниң һәмраһлиқида билгийидики явропа парламентида өткүзүлидиған йиғинға қатнишиш үчүн йүрүп кәтти.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.