Әркин әкрәм : шәрқи түркистан күчлири шәрқи түркистанниң тинчлиқиға әмәс, хитай һакимийитигә тәһдит

Йеқинда, б д т ниң террорлуққа қарши алий комисари ричард баррет, шинхуа агентлиқиниң зияритини қобул қилип, шәрқи түркистан күчлири хитай вә оттура асияниң, болупму хитайниң ғәрбий райониниң тинчлиқиға тәһдит шәкилләндүрди дегән.
Мухбиримиз шөһрәт һошур
2010-01-27
Share
Dr-Erkin-Ekerm-305 Сүрәт, др. Әркин әкрәмниң мухбиримизниң зийаритини қобул қиливатқан көрүнүши.
RFA Photo / Erkin Tarim

Шинхуаниң хәвиридә баян қилинишичә, у йәнә хитайниң террорлуқниң зиянкәшликигә учриған бир дөләт икәнликини тилға елип, шәрқи түркистан күчлириниңму хәлқара террорлуққа қарши күрәштә җазалиниши керәкликини оттуриға қойған.

Бүгүн, уйғур мутәхәссис әркин әкрәм радиомизниң зияритини қобул қилип, ричард барретниң сөзлири һәққидә пикир баян қилди.

У алди билән, хитайниң хәвиридә ричард барретниң сөзлириниң икки нуқтида бурмиланғанлиқини көрсәтти. Ричард баррет әсли сөзидә шәрқи түркистан күчлиригә зәрбә беришни мәқсәт қилған әмәс, бәлки, хитайни хәлқара террорчилиққа қарши күрәштә натоға һәмкарлишишқа чақирған.

Б д т алий комисари әсли сөзидә пәқәт шәрқи түркистан ислам һәрикити тәшкилатини тилға алған; һәргиз барлиқ шәрқи түркистан күчлирини тилға алған әмәс.

Шәрқи түркистан ислам һәрикити тәшкилатиниң мәвҗут яки мәвҗут әмәслики, униң әлқаидә вә талибан билән мунасивити бар яки йоқлуқи, бар болған тәқдирдә униң һәрикәтлириниң террорлуқ санилидиған - саналмайдиғанлиқи йиллардин бери талаш - тартиш қилинип кәлмәктә.

Хитай йиллардин бери шәрқи түркистан күчлириниң уйғур райониниң тинчлиқиға тәһдит икәнликини билдүрмәктә. Уйғур паалийәтчилири болса, шәрқи түркистанда тинчлиқниң аллиқачан бузулуп болғанлиқини, шәрқи түркистан мустәқиллиқ күришиниң, әмәлийәттә районда тинчлиқни әслигә кәлтүрүш һәрикити икәнликини баян қилмақта.

Мутәхәссис әркин әкрәм, б д т алий комисариниң тинчлиққа тәһдит сөзини намувапиқ дәп қарайду. Әркин әкрәмниң қаришичә, шәрқи түркистан күчлирини әгәр тәһдит дейишкә тоғра кәлсә, хитай һакимийитигә вә хитайниң келәчикигә тәһдит дейилиши керәк. Уни районниң тинчлиқиға тәһдит дийишкә тоғра кәлсә, алди билән районниң тинчлиқини хитайниң бузғанлиқи унутулмаслиқи керәк.

Мутәхәссис әркин әкрәм сөзиниң ахирида, б д т алий комисариниң сөзлириниң нөвәттики вәзийәттә риал бир әһмийәткә игә сөзләр әмәсликини, бу сөзләрниң пәқәт хитай мәтбуати тәрипидин бурмилинип, уйғур хәлқиғә тәһдит селиш үчүн қоллинилғанлиқини билдүрди.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт