Yaponiyide Uyghur mesilisini qollighuchilardin alte nepiri ministirliqqa teyinlendi

Shinzo abé bashchiliqidiki yéngi hökümette Uyghur mesilisini qollighuchi yeni yaponiye Uyghur parlamént ezaliri ittipaqidin alte nepiri ministirliq wezipisige teyinlendi. Mezkur xewerdin waqiplan'ghan dunya Uyghur qurultiyining re'isi, Uyghur milliy herikitining rehbiri rabiye qadir xanim shinzo abé bashchiliqidiki bu hökümetni qutlidi.

2012 - Yili 4 - ayning 23 - küni yaponiye erkin démokratchilar partiyisining merkizide qurulghan “Yaponiye Uyghur parlamént ezaliri ittipaqi”ning ezaliridin abé yaponiye bash wezirlikige, furiya keyji yaponiye döletlik jem'iyet amanliqi komitétining re'islikige, ito séji bash wezir yardemchilikige, shimomura pen - medeniyet ministirliqigha, motégi iqtisad ministirliqigha, onodéra dölet mudapi'e ministirliqigha,inada tomome memuri islahat ministirliqigha teyinlendi.

Shinzo abé Uyghurlarning yéqin dosti, “Yaponiye Uyghur parlamént ezaliri ittipaqi”ning bash meslihetchisi. 4 - Nöwetlik dunya Uyghur qurultiyining tokyoda ghelibilik échilishigha yardemde bolghan, yaponiyidiki Uyghur mesilisini qollawatqan siyasiyonlardin biridur. Bu heqte dunya Uyghur qurultiyining mu'awin re'isi séyit tümtürk özining qarashlirini bayan qildi.

Shinzo abéning ikkinchi qétim bash wezirlikke we bashqa Uyghur mesilisini qollighuchilarning ministirliqqa teyinlen'genlikini köpligen Uyghurlar tebriklidi. Undin bashqa dunya Uyghur qurultiyining mu'awin re'isi ümid agahi özining xushalliqini bildürdi.

Yaponiyidiki Uyghur siyasiy közetküchilerdin doktor turmuhemmet yéngi hakimiyetning Uyghur mesilisige téximu köp köngül bölüshini ümid qilidighanliqini bayan qildi.

Yuqiriqi ulinishtin tepsilatini anglighaysiz.