Хитай сиясий-қанун әмәлдари фалуңгуң муритидин әпу сориди

Хитайдики партийә мәркизи комитетиға биваситә қарайдиған сиясий қанун комитети қармиқидики 610-алаһидә сақчи әтритиниң җаң земин дәвридә мәхсус фалуңгуң муритлириға қарита қаттиқ соал-сорақ қилиш вә тән җазаси елип бериш үчүн қурулғанлиқи мәлум. Сабиқ хитай рәиси җаң земин фалуңгуң муритлириниң мәшиқ елип беришини хитай чоң қуруқлуқида чәклигән шундақла, фалуңгуң муритлириға қарита қаттиқ вә рәһимсизләрчә бастуруш буйруқи чүшүргән хитай рәһбәрлириниң бири.

Хәттин мәлум болушичә, хитайдики мәлум бир шәһәр дәриҗилик фалуңгуң муритлирини әмгәк билән өзгәртиш лагеридики ондин артуқ сақчи бу икки нәпәр ака-укини 15 күн ухлатмастин соал-сорақ қилған вә тән җазаси бәргән.

Һөрмәтлик радио аңлиғучилар, хәлқара кәчүрүм тәшкилати қатарлиқ дунядики нопузлуқ кишилик һоқуқ тәшкилатлири хитай коммунист партийисиниң 13 йилдин буян фалуңгуң муритлириға елип бериватқан қийин-қистақ вә кишилик һоқуқ дәпсәндичиликлирини изчил күнтәртипкә қоюп, хитай һөкүмитини фалуңгуң муритлириға қаратқан зулумлирини тохтитишқа чақириватиду. Ундин башқа хитай әмәлдарлириниң йошурун һалда фалуңгуң муритлириниң органлирини сетиш содиси қиливатқанлиқиға аит пакитлар арқа-арқидин паш қилинип, пүтүн дуняниң диққити хитайдики фалуңгуң муритлириниң тәқдиригә буралмақта.

Хитай, дунядики фалуңгуң муритлириға болған һесдашлиқ чуқанлириға қилчә пәрва қилмай, уларға нисбәтән техиму қаттиқ қол муамилә қиливатқан бир пәйттә, туюқсиз хитайдики бу сақчи әмәлдариниң 2 нәпәр ака-ука фалуңгуң муритиға тән җазаси йүргүзүлгәнликини етирап қилип, уларға әпу сораш хети йезип ахбарат саһәсидә елан қилиши һәммә адәмни һәйран қалдурди.

Бу мәсилә һәққидә тохталған хитай анализчилиридин лю гохуа мундақ дәйду:
-Хитай коммунист партийиси фалуңгуң муритлириға зулум қиливатқанлиқиға 13 йил болди, әмма бу тунҗи қетим 610-сақчи әтритидики хитай сақчи әмәлдариниң фалуңгуң муритлириға нисбәтән тән җазаси йүргүзгәнликини етирап қилиши вә әпу сориши, йәнә келип ахбарат васитилири арқилиқ әпу сориши болуп һесаблиниду. Бу хитайда коммунист зулумниң ахирлишиватқанлиқиниң бәлгиси. Буниңға җаң земин вә униң қолчомақлири җавабкар. Җаң земин вә бө шиләй қатарлиқларниң һаман бир күн җинайи җавабкарлиққа тартилидиғанлиқиға ишәнчим камил.

Игиләшләргә асасланғанда, бу 2 нәпәр фалуңгуң мурити ака-укилар, хитай компартийисиниң юқири дәриҗилик әмәлдарлириниң пәрзәнтлири икән.

Хитай анализчиси ка рән чаң анализ йүргүзүп, тән җазасиға учриған бу икки нәпәр ака-укиниң хитай компартийисидики мәлум юқири дәриҗилик әмәлдарниң пәрзәнтлири болғанлиқи үчүнла, сақчи тәрәпниң тән җазаси йүргүзгәнликини етирап қилишқа вә әпу сорашқа мәҗбур болғанлиқини, буниң билән коммунистик партийиниң фалуңгуң муритлириға йүргүзүватқан зулумниң бошап қалмайдиғанлиқини билдүрди.

Хитай анализчилиридин җа сүнма хитай һөкүмитиниң фалуңгуң муритлирини бастуруш үчүн интайин нурғун мәбләғ аҗритиватқанлиқини билдүрүп мундақ дәйду:
-Хитай мәркизи һөкүмити өзлири елан қилған мәлуматларға асасланғанда, һөкүмәт мәхсус фалуңгуң муритлирини бастуруш үчүн қурулған сиясий қанун тармақлириниң ички қурулмисини күчләндүрүш вә сақчиларни көпәйтиш үчүн 100 милярд америка доллири сәрп қилған болуп, әгәр бу иқтисадни хитай пуқралириниң сағламлиқ суғуртиси вә яки яшанғанларниң пенсийиси үчүн ишләткән болса, нурғунлиған хитай пуқралири хатирҗәм болған болатти.
Һөрмәтлик радио аңлиғучилар, хитай өлкилиридә қурулған сиясий қанун тармақлири фалуңгуң муритлириға қарита бастуруш елип бериватқан болса, уйғур дияридики сиясий қанун тармақлири уйғур хәлқини кәң көләмлик һалда бастуруш үчүн хизмәт қилмақта. Уйғур дияридики вәзийәттин хәвәрдар кишиләрниң билдүрүшичә, хитай һөкүмити “шинҗаңниң муқимлиқи һәммидин әла” шоари астида,сиясий қанун тармақлирини мәһәллә вә асасий қатламларғичә кеңәйтип уйғур диярини пуқрадин сақчи көп, һаләткә кәлтүрүп қойғанлиқини вә кәң көләмлик қанунсиз тутқун қилишниң әвҗ алғанлиқини билдүрмәктә.
Юқиридики улиништин бу программиниң тәпсилатини аңлиғайсиләр.