Ereb döletliridiki xelq namayishliri dawam qilmaqta

Ereb döletliridiki namayishlar her xil bolmaqta. Yemende re'is éli abdulla salih sün'iy partlashni chiqirip öz xelqidin 100 din köprek ademning ölümige seweb bolghan bolsa, liwiyining kazafiysi inqilabchi xelq alghan jaylarni bombardiman qilip her küni onlarche ademning ölümige seweb bolmaqta. Emma i'ordaniye we süriyilerde xelq namayishliri unchiwala küchlinelmigen bolsimu dawam qilmaqta.

Yemen re'isining küy'oghli namayishchilar sépige qoshuldi

 Qatarning “El jezire” téléwiziye qanilining 29-mart seyshenbe küni yemen paytexti san'a shehiridin bergen bayanatigha asaslan'ghanda, yemenning san'a, eden, sheb'a qatarliq 10gha yéqin shehiridiki xelq namayishi alahide küchlük bolghan we namayishqa qatnashqanlar sani 10 mingdin ashqan. Yemenning ebyen shehiridiki qoral ambirida yüz bergen partlashning arqisida éli abdulla salih hakimiyitining qoli barliqi ispatlan'ghan we bu partlashta 100ge yéqin ademning hayatini yoqatqanliqi bildürülgen.

Yemen re'isi éli abdulla salihning küy'oghli yehya muhemmed isma'il özining bir qanche qomandanliri bilen birlikte yemen xelq namayishigha qoshulghanliqini élan qildi we xelqni mustehkem turushqa chaqirdi. U mundaq dédi: “Men bügündin bashlap yemendiki xelq namayishigha qoshuldum, barliq imkaniyetlirim bilen bu namayishni qollaymen. Ey namayishchi ezimetler! men silerge shundaq wede bérimenki, axirqi ghelibini qolgha keltürgen'ge qeder bu meydanda siler bilen bille küresh qilimen, men we qoshunlirim siler bilen billimiz. Dewayimiz bir, ghayimiz birdur. Chidam béringlar, mehkem turunglar, arqigha chékinmenglar, biz choqum ghelibe qilmay qalmaymiz.”

Kazafiy qoshunliri ilgirilimekte

“El jezire” téléwiziye qanilining xewirige qarighanda, kazafiy qoshunliri qedemmu ‏- qedem ilgirilep namayishchilar élip bolghan bezi sheherlerni qayturuwalghan. Misrate shehirige ilgirilep kirgen kazafiy küchliri xelqqe qarshi bashqurulghuchi bombilarni we uzun musapilik zembireklerni qollan'ghan.

“El jezire”muxbirining liwiyining misrate shehiridin bergen bayanatida déyilishiche, ötken 10 kün ichide misrate shehiride kazafiy küchlirining top-zembirekliri we rakétaliri bilen ölgenlerning sani 244ke yetken.

Süriye hakimiyiti kazafiygha medet bermekte

Kuweytte chiqidighan “El mujteme zhurnili”ning 2011-yili24-mart sanida“ Süriye hakimiyiti kazafiygha medet bermekte”dégen témida bir maqale élan qilin'ghan bolup, mundaq déyilgen: “Liwiyide qurulghan milliy komitét süriyining kazafiy hakimiyitige yantayaq boluwatqanliqini éniq otturigha qoydi. Hetta, özliride süriyining tartus portidin liwiyining tarablus portigha qarap qoral-yaraq kötürgen ikki chong paraxotning qozghalghanliqi heqqide sanliq melumat barliqini sözlidi. Shundaqla kazafiy qoshuni ichide süriye eskerlirimu barliqini tekitlidi.”