Сүрийидин қачқанларниң ечинишлиқ вәзийити

Сүрийидики намайишчилар һөкүмәт тәрәптин өлтүрүлгән сәпдишиниң җәситини көтүрүп намайиш қилмақта. 2011-Йили 8-май.

Әмди ливан тәрәптә панаһлиниш үчүн ливан чеграси әтрапиға қечип барған сүрийиликләрниң сани көпәймәктә. Йәнә бир тәрәптин сүрийә армийиси түркийә вә ливан чеграси әтрапиғичә йеқинлишип берип, сүрийидин қачқанларни бомбилимақта икән.

Ливанда панаһланмақчи болған сүрийиликләрниң тәқдири

Лондонда чиқидиған “оттура шәрқ” гезитиниң 2011-йили27- июн күнидики санида,“сүрийә армийиси ливан чеграсиғичә берип йәтмәктә”дегән темида бир мақалә елан қилинған болуп, униңда мундақ дейилгән:“ сүрийә армийиси террористларни қоғлаймиз дегән баһанә билән ливан чеграсиға йеқин йезиларғичә йетип барған. Сүрийә армийиси ливан-сүрийә чеграсидики “қәсир” дегән районға бесип кирип районни бомбардиман қилған. Сүрийилик намайишчиларниң вәкиллиридин бириниң билдүрүшичә, җенини қоғдаш үчүн ливан чеграси бойиға қачқан сүрийиликләр қорқунчидин башқа яқларға қечишқа мәҗбур болған.
Лондонда турушлуқ сүрийилик кишилик һоқуқ паалийәтчиси рами абдураһманниң ейтишичә, сүрийә армийиси сүрийиниң ливан чеграсидики “қәсир”райониға бесип киргән. Райондики сүрийиликләрдин кичик балилар, аяллар вә яшанғанлардин бир гуруппа киши түнүгүн кечә ливан тәрәпкә қечип киривалған.
Сүрийиликләрниң бир бөлики түркийә тәрәпкә қачқан. Һазирғичә түркийә чеграсидин кирип болған сүрийиликләрниң сани 12 миңға йәткән. Ливанниң шималидики окар дегән җайда панаһланған сүрийиликләр сүрийә армийисидин қорқуп, райондики черкарға киривалған.”

Сүрийидә бастуруш давам қилмақта

Қатарниң “әл җәзирә” телевизийә қанилиниң 2011-йили 27-июн күнидики хәвиригә көрә, түнүгүн сүрийиниң дәмәшиқ йеқинидики кисвә дегән җайда сүрийә армийиси тәрипидин етилип өлгәнләрниң җиназа мурасимиға қатнашқанларни сүрийә армийиси оққа тутқан болуп, бир қанчә адәм һаятидин айрилған.

Рами абдураһман “әл җәзирә” телевизийә қанилиға лондондин бәргән баянатида мундақ деди: “сүрийидә намайишчиларни өлтүрүш давам қилмақта.
Хәлқниң һөкүмәткә қилчә ишәнчи қалмиди. 25-Июн шәнбә күни сүрийиниң һәмс дегән йеридә намайишчилардин 4 киши сүрийә армийиси тәрипидин етип өлтүрүлгән иди. Түнүгүн йәнә кисвә дегән җайда җиназа мурасимиға қатнашқанлардин бир қанчә киши етип өлтүрүлди. Сүрийә рәиси бир тәрәптин хәлққә чирайлиқ вәдиләрни берип туруп, һәтта намайишчиларни кәчүрүвәткәнликини елан қилип туруп, йәнә бир тәрәптин уларни өлтүрүп, тутқун қилип турмақта.”