Terjiman we muxbir muhemmetjan abdullaning muddetsiz qamaqqa höküm qilin'ghanliqi melum bolmaqta

Muhemmetjan abdullaning dostlirining radi'omizgha yazghan xétidin melum bolushiche, u 1977 ‏-yili qaramayda tughulghan we qarimayda chong bolghan. 2001 ‏- Yili béyjingdiki axbarat uniwérsitétini püttürgen. Andin merkizi xelq radi'o istansisida 8 yil muxbir we tehrir bolup ishligen. Ishtin sirt waqitlirida, selkin torbétining bashqurghuchiliridin biri bolup wezipe ötigen. U bultur ürümchi weqesidin 2 hepte ötkende tutqun qilin'ghan. Bu yil 4 ‏-ayda ürümchide échilghan bir mexpiy sotta gülmire imin qatarliq namayish yétekchiliri bilen birlikte muddetsiz qamaqqa höküm qilin'ghan. Biz muhemmetjan abdullaning muddetsiz késilgenliki heqqidiki uchurning toghriliqini éniqlash üchün, aldi bilen merkizi xelq radi'o istansisining kadirlar bölümige téléfon qilduq. Mes'ul xadim, ehwalni bash tehrir bölümidin sorishimizni tewsiye qildi. Bash tehrir bölümidiki mes'ul xadim, muhemmetjan abdullaning qanun'gha xilapliq qilghanliqini, nöwette xizmet ornida yoqluqini, uning ehwalini qanun orunliridin igilishimizni éytti.

Biz ürümchi sheherlik ottura sot mehkimisige téléfon qilduq. Sot xadimliri xuddi burunqigha oxshashla ehwal heqqide melumat bérishni ret qildi. Biz arqidin merkizi xelq radi'o istansining Uyghur bölümige téléfon qilduq.

Muhemmetjanning dostlirining radi'omizgha yazghan xétide bildürülüshiche, muhemmetjan asasliqi selkin tor bétide élan qilghan nadir terjime eserliri, muhim terjime xewerliri bilen jama'etchilik ichide tonulghan. 26 ‏-Iyun shawgüende weqe bolup, dunya Uyghur qurultiyi chet'eldiki Uyghurlarni namayishqa chaqirip uqturush chiqarghanda, bu uqturush xitayche ACNT dégen torbette élan qilin'ghan. Muhemmetjan abdulla bu uqturushni xitayche torbettin terjime qilip, selkin torbétige qoyup qoyghan. Melum bolushiche, mezkur uqturushni terjime qilip selkin torbétige qoyghini qutratquluq dep qaralghan we uninggha muddetsiz qamaq jazasi bérishke asasliq seweb bolghan. Sotqa qatnashqan guwahchilardin birining, sottiki eyiblimilerge asasen, muhemmetjan abdullaning dostlirigha ashkarilishiche, memetjan abdulla shawgüen weqesidin kéyin, béyjingdiki bir türküm chet'el muxbirlirining weqe heqqidiki, weqege qarita Uyghurlarning inkasliri heqqidiki so'allirigha jawab bergen. Bumu uning bu qétim sot jeryanidiki eyiblimilerge pakitlardin biri bolghan.

U burunmu torbetlerde bir qisim sezgür témilardiki xewerlerni terjime qilghachqa xitay dölet bixeterlik küchlirining diqqet nuqtisigha aylan'ghan.

Muhemmetjan abdullaning muddetsiz késilgenlikini orunlar téxi mu'eyyenleshtürmigen bolsimu, emma muhemmetjan abdulla heqqidiki yuqiriqi melumatlar we Uyghur élining nöwettiki weziyiti, uning muddetsiz késilgenlik éhtimalliqini küchlendürmekte.