Түркийидә оқуш пүттүргән уйғур оқуғучилар дипломилирини министирниң қолидин алди

1991 - Йили совет иттипақи парчиланғандин кейин, 1992 - йилида түркий җумһурийәт вә дуняниң һәрқайси дөләтлиридә яшаватқан түркий милләтләрдин оқуғучи әкилип түркийидә оқутуш иш пилани башлитилған иди.
Мухбиримиз әркин тарим
2009-05-13
Share
uyghur-oqughuchilar-diploma-aldi-305 2009 - Йили 5 - айниң 9 - күни маарип министирликиниң чоң залида өткүзүлгән оқуш пүттүрүш мурасимида, түркийә җумһурийити миллий маарип министири нимәт чубуқчу ханим сөздә, шундақла, башқа паалийәтләрдин көрүнүшләр.
RFA Photo / Erkin Tarim

5 - Айниң 9 - күни маарип министирликиниң чоң залида өткүзүлгән бу оқуш пүттүрүш мурасимида алди билән, бу иш пилани тонуштурулған һөҗҗәтлик филим корситилди. Бу һөҗҗәтлик филимдә һазирғичә түркийидә университет пүттүргән түркий милләтләрдин кәлгән оқуғучиларниң саниниң 5000 икәнлики, һазирғичә түрк университетлириға киргән оқуғучи саниниң 7500 икәнлики аңлитилди.

Кейин түркийә җумһурийити миллий маарип министири нимәт чубуқчу ханим, министир болғандин кейинки тунҗи нутқини бундақ мәнилик бир мурасимда қилғанлиқи үчүн өзини интайин бәхитлик һис қиливатқанлиқини аңлитип мундақ деди: "бундақ мәнилик бир күндә араңларда болғанлиқим үчүн интайин хурсән болдум. Һәммиңләргә чиң көңлүмдин һөрмәт билдүримән. Мән министир болғандин кейин қатнашқан тунҗи йиғинниң бундақ мәнилик бир йиғин болушиму мени интайин хурсән қилғанлиқини тәкитлимәкчимән. 1992 - Йили башлитилған түркий милләтләрдин оқуғучиларни түркийигә әкилип оқутуш иш пилани йеңи мустәқил болған түркий җумһурийәтләргә вә түркий милләтләргә ихтисаслиқ кишиләрни йетиштүрүп бериштә интайин муһим рол ойнаш билән биргә, бир туғқан түркий милләтләрниң өзара чүшинишидә интайин муһим рол ойнимақта."

Нимәт чубуқчу ханим түркий милләтләрдин оқуғучи оқутуш иш пиланидин 57 дөләттин кәлгән оқуғучиларниң пайдилиниватқанлиқини аңлитип мундақ деди: "бу иш пиланидин бүгүнгичә сансиз оқуғучилар пайдиланди. Буниңдин пайдилиниватқан дөләт вә районларниң сани һазир 57 гә чиқти. Биз түркийә җумһурийити дөлити болуш сүпитимиз билән бу иш пиланиға алаһидә әһмийәт бериватимиз. Силәр келәчәктә түркий милләтләр арисидики көврүклүк вәзиписини өтәйсиләр. Һәммиңләрниң буниңдин кейинки һаятиңларда мувәппәқийәтлик болушиңларни тиләймән."

Кейин әхмәт йесиви университети нахша - уссул өмики оюн қоюп, қирғиз, уйғур, қазақ азәрбайҗан вә түрк нахша - уссуллиридин нәмуниләр көрсәтти.

Түркийә маарип министирлики бу йил оқуш пүттүргән оқуғучиларниң ата - анилириниму оқуш пүттүрүш мурасимиға тәклип қилған болуп, уларни сәһнигә тәклип қилип, министир нимәт чубуқчу уларға бир йүрүш совғатлар бәрди.

Кейин түркийә дөләт министири нимәт чубуқчу ханим 22 дөләттин кәлгән түркий милләт оқуғучиларниң дипломлирини өз қоли билән тарқатти.

Биз оқуш пүттүрүш мурасими ахирлашқандин кейин, микрофонимизни йеңи оқуш пүттүргән оқуғучиларниң ата - анилири вә оқуғучиларға узаттуқ.

Юқиридики аваз улинишидин, бу һәқтики мәлуматимизниң тәпсилатини аңлайсиләр.


Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт