Учар тәхсә һәвәскарлири обамадин UFO тоғрисидики архипни ашкарилашни тәләп қилди

UFO Тоғрисида узун йиллардин буян һәр қайси дөләтләрдә нурғун хәвәрләр, сүрәтләр елан қилинип кәлди. Мәхсус UFO тәтқиқат орунлири вә кәспи журналлар һәр қайси дөләтләрдә мәвҗуд. Лекин кишиләр һазирға қәдәр бу җәһәттә пикир бирликигә игә әмәс.

12 - Айниң 2 - күни "аполло" тор бетидә елан қилинған UFO һәвәскарлири обамадин ташқи пиланит кишилириниң архиплирини ашкарилашни тәләп қилмақта" намлиқ хәвәргә асасланғанда, нурғунлиған UFO һәвәскарлири 1 - айниң 20 - күни америкиниң президентлиқ һоқуқини тапшуруп алғучи обамаға хәт йезип, америка һөкүмити һазирға қәдәр йошуруп кәлгән "х архип"ни ашкарилашни тәләп қилған. Бу тәләпкә обама тәрәпдари, ақсарайниң асаслиқ мулазимәт хадими җоһн подәста вә йеңи мексика шитатиниң башлиқи билл ричардсон қатарлиқларму аваз қошқан.

Хәвәрдә көрситилишичә, "ташқи пиланит һадисилири сиясий һәрикәт комитети" обамаға язған хетидә, 60 йилдин бери сир тутуп келингән ташқи пиланит җанлиқлири һәққидә кишиләрниң көргән - билгәнлирини ашкарилашқа обаманиң буйруқ беришини тәләп қилған. Улар йәнә америка һәрбий тәрәп вә ахбарат оргининиң бу җәһәттә әмди қамални бикар қилиш вақтиниң йетип кәлгәнликини әскәрткән. Җоһн подәста әпәнди мундақ дегән: "һазир америка һөкүмити кәм дегәндә 25 йилдин буян UFO һәққидә топлиған доклатни елан қилишниң дәл вақти. Бу доклат алимларни бәлгилик санлиқ мәлуматлар билән тәминләп, уларни бу хил һадисиләрниң тәбиий алаһидилики вә һәқиқити тоғрисида тоғра қарар чиқириш пурситигә игә қилиш керәк."

"Ташқи пиланит һадисилири сиясий һәрикәт комитетиниң мудири стефан басит болса "америкиниң бу һәқиқәтни йошуруш замани өтүп кәтти" дегән вә обама һоқуқни тапшуруп алғичә, 4 миң кишилик имза топлайдиғанлиқини билдүргән. У сөзидә, әнгилийә вә франсийиниң өткән йили UFO тоғрисидики мәлуматларни ашкарә елан қилиши америкиға бесим пәйда қилғанлиқини, америкиниң буни йошуримән дәп әхмиқаний һәрикәт қиливатқанлиқини тәкитлигән. Әнгилийә ахбаратлиридики хәвәрдә болса, барак обаманиң ташқи пиланит кишилири тоғрисидики мәхпийәтликни ашкарилаш еһтимали барлиқини илгири сүргән.

11 - Айниң 26 - күни елан қилинған "әнгилийидә ташқи пиланит кишилиригә ишәнгүчиләр динға ишәнгүчиләрдин көп" намлиқ йәнә бир хәвәрдә көрситилишичә, әнгилийә күндилик почта гезити 3миң киши үстидин рай синаш елип барған болуп, нәтиҗидә %54 адәм худаға ишинидиғанлиқини, %58 адәм ташқи җанлиқларниң мәвҗутлуқиға ишинидиғанлиқини билдүргән.

UFO Тоғрисида һазирға қәдәр тартивелинған сүрәтләр һәм видиолар интайин көп болсиму, буниң ичидә бу йил түркийидә тартивелинған бир видио алаһидә диққәтни тартқан. Әнгилийә "қуяш гезити" дә елан қилинған "кишиләр вуҗудини ләрзигә салидиған бу көрүнүш: тарихтин буян UFO һәққидә тартилған филимләрниң әң муһими дегән намға еришти" атлиқ йәнә бир хәвәрдә көрситилишичә, түркийидә бу йил 6 - айниң 8 - күни сәһәр саәт 3:54 өткәндә вә 7 - айниң 2 - күни сәһәр саәт 3:53 өткәндә тартивелинған UFO ниң сүрити, UFO тәтқиқатчилири вә һәвәскарлири арисида күчлүк һаяҗан қозғиған.

Хәлқара учар тәхсә тәтқиқатчиси һектор әпәнди бу һәқтә тохтилип: "бу видиониң компютерда ясалғанлиқи яки тәбиәт һадисиси әмәслики тәкшүрүшләрдин кейин испатланди. Демәк бу видио %100 һәқиқи вә ишәнчилик шундақла һазирға қәдәр тартилған UFO һәққидики филимләрниң әң муһими, буниңдин биз UFOниң ташқи көрүнүшинила әмәс, униң ичидики җанлиқларниму чоңайтип көрүш пурситигә ериштуқ. Һазир һәр қайси әлләрдики һөкүмәтләрниң UFO ни етирап қилиш вә елан қилиш вақти кәлди" дегән.

Истанбулда тартивелинған бу көрүнүш һәққидә түркийә UFO тәтқиқат мәркизи әтраплиқ тәкшүрүш елип барған вә сүрәткә тартивалғучини зиярәт қилған. Бу һәқтә мәхсус доклат тәйярлиған. Хәлқара UFO тәтқиқат мәркизи болса, бу һадисиниң дуняда зор тәсир пәйда қилидиғанлиқини муәййәнләштүргән.