Diyarim we selkin qatarliq Uyghur tor betlirining qurghuchiliri 'qara türmiler'de tutup turulmaqta (2)

Süret, diyarim torining qurghuchisi dilshat perhat ependining 2005 - yili www.youku.com Ni ziyaret qilghandiki süriti.

Shundin kéyin, Uyghur tilidiki 100 din artuq tor béketliri buyruq bilen taqilish bilen bille, bu tor betlerning qurghuchiliri we bashqurghuchiliri ehwal igilesh bahaniside tutup kétilgen idi.

Diyarim tor békitining chet'ellerdiki tor bashqurghuchiliridin biri bolghan dilmurat perhat ependi hazir en'giliyide turuwatqan bolup, u tünügün erkin asiya radi'o istansisi Uyghur bölümining ziyaritini qobul qilip, özi éniq bilidighan kishilerdin, inisi dilshat perhat؛ selkin tor békitining qurghuchisi nur'eli؛ selkin torining tor bashqurghuchisi muhemmet, diyarim tor bétining xizmetchisi obulqasim, diyarim tor bétining xalisane bashqurghuchiliridin "muztagh", " lükchek"," yanchuqchi" qatarliq texellusi bar kishiler؛ diyarim tor békiti uyushturghan pa'aliyetlerge xalisane riyasetchilik qilip béridighan, shinjang sen'et institutining oqughuchiliridin xeyrinisa we xalnur isimlik ikki neper qiz oqughuchi, hem diyarim torigha maqale yazidighan shinjang pédagogika uniwérsitétning oqutquchisi erkin qatarliqlarning hazirghiche xitayning qara türmiliride héchqandaq tutush buyruqi bolmighan halette, muddetsiz tutup turuluwatqanliqini bayan qilghan idi.

Dilmurat perhat ependi bügünki söhbitimizde diyarim tor bétining qurulush tarixi, tor betning xizmetchiliri heqqide toxtaldi. U yene diyarim qatarliq Uyghur tor betlirining Uyghur medeniyitini teshwiq qilishni özining asasi wezipisi qilghan, jem'iyette yétim - yésir, méyiplerge yardem qilishni asasi burchi qilghan bolsimu, lékin bügünki künde xitay hökümet da'iriliri teripidin töhmet qilinip, taqiwétilgenlikini bayan qilip, xitay hökümitini eyiblidi.

Dilmurat ependi yene diyarim tor békitining bashqurghuchilirining hem bu tor békitige kirgenliki kishilerning hazir xewp ichide turuwatqanliqini bayan qilip, xelq'ara insan heqliri teshkilatliri we gherb démokratik döletlirige muraji'et qilip, xelq'ara jem'iyetning bu ishqa jiddiy qarishini, ularning xitaygha bésim ishlitip, bu kishilerning xitayning adaletsiz sotida sotlinip kétishining aldini élishqa yardem bérishini muraji'et qildi.

Yuqiridiki awaz ulinishidin, diyarim tor békitining qurghuchisi dilshat perhatning akisi dilmurat perhat bilen élip barghan söhbet xatirisining dawamini anglaysiler.