ئولىمپىك مەشئىلىگە قارشى ۋانكۇۋېر شەھىرىدە نامايىش

 ۋانكۇۋېردىكى خىتاي كونسۇلخانىسىنىڭ ئالدىدا ئۆتكۈزۈلگەن بۇ نامايىشقا ئۇيغۇر ۋە تىبەتلىكلەردىن باشقا، كىشىلىك ھوقۇق تەشكىلاتلىرىنىڭ خادىملىرى، كانادا جامائىتى ۋە كوممۇنىستىك تۈزۈمنىڭ زىيانكەشلىكىگە ئۇچرىغان ۋيېتناملىقلار قاتناشتى.

ئولىمپىكنىڭ ھارپىسىدا،تىبەت ۋە ئۇيغۇرلارنىڭ كىشىلىك ھوقۇقلىرىنىڭ جۈملىدىن، سۆز - مەتبۇئات ئەركىنلىكىنىڭ ئېغىر ھالدا دەپسەندە قىلىنغانلىقىغا نارازىلىق بىلدۈرۈش مەقسىتىدە نامايىشچىلارنىڭ ئاغزىنى ئاق لاتا بىلەن باغلاپ سۈكۈتتە تۇرۇشى كانادا جامائىتىنىڭ ئالاھىدە دىققىتىنى تارتقان.

بۇ پائالىيەتنى ئۇيۇشتۇرغۇچىلارنىڭ بىرى بولغان، كانادا ئۇيغۇر جەمئىيىتىنىڭ ۋانكۇۋېر شەھىرىدە تۇرۇشلۇق ھەيئەت ئەزاسى ئۆمەرجان ئەپەندى بۈگۈنكى بۇ نامايىشنىڭ سۈكۈتتە تۇرۇپ، نارازىلىق بىلدۈرۈش نامايىشى بولغانلىقىنى، كانادا جامائىتىنىڭ بۇ نامايىشقا ئالاھىدە قىزىققانلىقىنى ۋە قوللاش پوزىتسىيىسىدە بولغانلىقىنى، شۇنداقلا، ئولىمپىك مەشئىلىنىڭ ئۇيغۇر رايونىغا كىرىش ۋاقتىنى ئۇشتۇمتۇت ئالدىغا سۈرۈشنىڭ چەتئەلدىكى ئۇيغۇرلارنىڭ نارازىلىق پائالىيەتلىرىگە توسقۇنلۇق قىلىش ئىكەنلىكىنى بىلدۈردى.