Уйғурлар хитай баш министири вен җябавға қарши намайиш қилди

2010 ‏- Йили 10 ‏- айниң 9 ‏- күни, истанбулда яшайдиған уйғурлар, түркийигә үч күнлүк рәсмий зиярәткә кәлгән хитай баш министири вен җябавға қарши истанбул шәһиридә намайиш қилди.
Мухбиримиз арислан
2010-10-11
Share
Turkiye-Istanbulda-namayish-Wen-jyabaw-Siyit-Tumturk-305 Сүрәт, 2010 ‏- йили 10 ‏- айниң 9 ‏- күнидики хитай баш министири вен җйабавға қарши истанбул шәһиридә елип берилған намайишлардин көрүнүш.
RFA Photo / Arslan

Бу намайишни түркийидә паалийәт елип бериватқан аммиви тәшкилатлар бирликтә уюштурди. Намайишқа истанбулда яшаватқан уйғурлардин 200 гә йеқин киши қатнашти. Намайиш, истанбулниң бәшикташ, қаракөй, вә аясофия музейхана алди қатарлиқ үч орунда елип берилди.

Намайишчилар әтигән сәһәрдә зәйтинбурнуға топлинип, аптобусларға олтуруп, хитай баш министири вен җябав чүшкән конирад меһманханиси алдиға бериш үчүн һәрикәт қиливатқанда сақчиларниң тосқунлуқиға учриди. Намайишчиларни меңишқа рухсәт қилмиған сақчилар, юқиридин қаттиқ буйруқ тапшуруп алғанлиқи үчүн конирад меһманханиси алдида намайиш қилишқа рухсәт қилинмиғанлиқини билдүрди.

Намайишчилар аптобустин чүшүп гуруп ‏- гуруп болуп бөлүнди вә өзлири халиғанчә такси вә кичик машиниларға олтуруп хитай баш министири вен җябав чүшкән истанбулниң бәшкиташ районидики конирад меһманханисиниң алдида қарап йолға чиқти.
Turkiye-Istanbulda-namayish-Wen-jyabaw-Siyit-Tumturk-muxbir-305
Сүрәт, 2010 ‏- йили 10 ‏- айниң 9 ‏- күнидики хитай баш министири вен җйабавға қарши истанбул шәһиридә елип берилған намайишлардин көрүнүш.
RFA Photo / Arslan
 
Хитай баш министири вен җябав бәлгиләнгән программидин икки саәт бурун йәни әтигән саәт 7:30 дә меһманханидин чиқип, аясофия музийханиси, султан әхмәт мәсчитини зиярәт қилиш үчүн йүрүп кәткән.

Бир гуруп намайишчилар хитай баш министири вен җябав чүшкән конирад меһманханиға йеқин қаракөй дегән йәрдә йол үстидә күтүп туруп, хитай баш министири вен җябав у йәрдин өткәндә, ай юлтузлуқ көк байрақни көтүрүп шуар товлиди. Хитай баш министири олтурған машина йенидин өтүватқанда көк байрақни ләпилдитип, шәрқий түркистанға әркинлик, вен җябав шәрқий түркистандин йоқал! дегәндәк шоарлар товлиди. Вен җябав өтүп кәткәндин кейин сақчилар дәрһал һәрикәткә өтүп уларни тутувалди вә сақчи идарисиға елип барди. Мәлум болушичә бу намайишчилар сәккиз уйғурдин тәркип тапқан бир гуруп болуп буларни сақчиханиға әтигәндә қамап қоюп чүш вақти болғанда ипадилирини елип қоюп бәргән вә сақчилар уларни, намайиш қилишқа рухсәт қилинған орундин башқа бир йәрдә намайиш қилғанлиқи үчүн вақитлиқ тохтитип қойғанлиқини әскәрткән.

Хитай баш министири вен җябав истанбулниң султан әхмәт мәсчити вә аясофия музейханисини зиярәт қиливатқанда, пүткүл йоллар тақалған вә сақчилар қаттиқ бихәтәрлик тәдбирлири алған. Намайишчилар аясофия музейханиси алдиға топлинип намайиш қилди вә хитайға болған қаршилиқини ипадиләп шоарлар товлиди. Намайишчилар бирдәк, қатил хитай шәрқий түркистандин чиқип кәт, һәқ ‏- һоқуқ адаләт түркистанға һөрийәт, қизил хитай шәрқий түркистандин йоқал! вен җябав түркийидин йоқал! дегәнгә охшаш шоарлар товлиди.

Намайишчилар қоллирида ай юлтузлуқ көк байрақ көтүрүвалған болуп, бәзи намайишчилар, шәрқий түркистан азат болғанға қәдәр хитай маллирини алма!. Тутуш буйруқи чиқирилған қатил вен җябав дегән хәтләр йезилған вә үрүмчи вәқәсидә өлүп кәткән уйғурларниң рәсимлири билән вен җябавниң рәсимлири кириштүрүлгән рәсимләрни өз ичигә алған вивиска ‏- тахтиларни көтүрүвалған. Бу йәрдики намайишқа көп санда телевизийә гезит мухбирларму кәлгән болуп, намайишчилар, вен җябавниң рәсимлирини йәргә уруп, дәссәп ғәзәп ‏- нәпрәтлирини ипадилиди вә қатил вен җябав йоқал, дегәнгә охшаш шоарлар товлиди. Намайишчилар, вен җябавниң рәсими сизилған тахтини йәргә уруп дәссәп ғәзәплирини ипадилигән көрүнүшләр мухбирларниң алаһидә диққитини тартти.

Намайиш җәрянида, дуня уйғур қурултийиниң муавин рәиси сийит түмтүрк намайишчиларға вакалитән сөз қилип қетимқи намайишниң асасий мәқсити һәққидә тохталди.

Түркийә бүйүк бирлик партийисиниң рәиси ялчин топчи әпәнди баянат елан қилип, түркийә һөкүмитини қаттиқ тәнқид қилди вә хитай баш министириниң түркийә зиярити җәрянида түркийә тәрәпниң шәрқий түркистан мәсилисини, оттуриға қоймиғанлиқини қаттиқ әйиблиди вә бу қетимқи учришишта немә үчүн шәрқий түркистан мәсилисини оттуриға қоймиғанлиқи һәққидә түркийә һөкүмитидин чүшәнчә беришни тәләп қилди.

Бу намайиш һәққидә түркийиниң шу күндики пүткүл телевизийә қаналлири вә чоң гезитләрдә кәң түрдә йәр берилди. Биз бу намайиш һәққидә, дуня уйғур қурултийиниң муавин рәиси сийит түмтүрк вә шәрқий түркистан маарип вә һәмкарлиқ җәмийитиниң рәиси һидайәтулла оғузхан әпәндиләрниң пикир ‏- қарашлирини алдуқ.

Юқиридики аваз улинишидин, бу һәқтики мәлуматимизниң тәпсилатини аңлайсиләр.


 
Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт