Xitayning istanbuldiki konsulxanisi Uyghur oqughuchilargha pul tarqatti

Xitayning istanbulda turushluq konsulxanisining uyushturushi bilen istanbuldiki türkiye boghaz'ichi uniwérsitéti kungzi institutida “Shinjangni söyüsh oqush yardem puli” tarqitish murasimi ötküzüldi.
Ixtiyariy muxbirimiz arslan
2011.12.13
istanbuldiki-oqughuchilar-mukapat-305.jpg “Shinjangni söyüsh oqush yardem puli” ni qobul qilghan oqughuchilar xitayning istanbuldiki bash konsuli bilen. 2011-Yili 8-dékabir, istanbul.
RFA/Arslan

2011‏-Yili 12‏-ayning 8‏-küni ötküzülgen bu murasimgha istanbulning her qaysi uniwérsitétlirida oquwatqan Uyghur oqughuchilardin 42 oqughuchi qatnashqan. Murasimgha xitayning istanbulda turushluq bash konsuli jang chingyang qatniship, “Shinjangni söyüsh uqush yardem mukapati” gha érishken oqughuchilargha pul tarqatqan. Uyghur oqughuchilardin, turghun yari, éli ekber erkin, mehbube éziz, mewlide, sübhi, hesenjan, mihrajiddin qatarliq jem'iy 42 neper Uyghur oqughuchining her biri 1000 amérika dolliri yardem puli alghan.

istanbuldiki-oqughuchilar-mukapat2-385.jpg
“Shinjangni söyüsh oqush yardem puli” ni qobul qilghan oqughuchilar xitayning istanbuldiki bash konsuli bilen. 2011-Yili 8-dékabir, istanbul.
RFA/Arslan

Xitayning istanbulda turushluq bash konsuli jang chingyang yighin'gha qatnashti hem nexq meydanda oqughuchilar bilen söhbet ötküzdi we ularning turmush, öginish qatarliq herqaysi jehetlerde ulargha yardem bérishni xalaydighanliqini bildürgen we Uyghur oqughuchilarni xitayning istanbuldiki bash konsulxanigha kélip méhman bolup kétishke teklip qilghan.

 Xitayning türkiyide turushluq elchixanisi we konsulxanisi yéqindin buyan türkiyide yashaydighan Uyghurlarni özige tartish, yéqinlishish meqsitide her xil usullarni qollinip kelmekte. Ötken yili xitayning istanbulda turushluq konsulxanisining yolyoruqi we qollishi bilen istanbulda sabir bughda bashchiliqida Uyghur sodigerler jem'iyiti qurulghan idi. Xitay yene türkiyining her qaysi sheherliride yashawatqan Uyghurlardin bir qisim Uyghur qazaqlarni “Atalmish muhajirlar ömiki” nam astida guruppa teshkillep Uyghur diyarini ziyaret qildurghandin sirt xitayning ichkiri ölkilirinimu sayahet qildurup, ularning sayahet tesiratlirini sin'alghugha alghandin kéyin türkiyige ekélip qoydi.

Xitay emdi türkiyide oquwatqan Uyghur oqughuchilarni özige tartish üchün oqughuchilargha her xil nam astida pul tarqatmaqta.

Xitayning Uyghur oqughuchilargha pul tarqitishtiki meqsiti néme? Uyghur oqughuchilarning xitay konsulxanisidin oqush yardem puli élip oqushi toghrimu? bu so'allarning jawabigha érishish üchün dunya Uyghur qurultiyining mu'awin re'isi siyit tumtürk. Sherqiy türkistan ma'arip we hemkarliq jem'iyitining re'isi hidayetullah oghuzxan we istratégiye mutexessisi doktor erkin ekremning pikir-qarashlirini alduq. Doktor erkin ekrem. Xitay konsulxanisining Uyghur oqughuchilargha pul tarqitishtiki asasi meqsitining Uyghur oqughuchilarni özige tartish we oqughuchilarning türkiyidiki Uyghur teshkilatlargha egiship kétishning aldini élish üchün shundaq qiliwatqanliqini bildürdi.

Biz yene téximu köp melumatqa érishish üchün xitay konsulxanisidin oqush yardem puli alghan bir qisim Uyghur oqughuchilar bilen téléfon ziyariti élip barduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Pikir

Anonymous
Dec 14, 2011 04:02 AM

Pul dise likin anisini sitiwitidighan Uyghurlirmiz bar jumu!