Yaponiye kambodzhaning 20 Uyghurni xitaygha qayturup berginini eyiblidi we epsuslinidighanliqini bildürdi

Süret, yaponiye uyghur jemiyiti bashliqi ilham mexmut ependining, 7 - ayning 31 - küni, yaponiyining nagasaki shehrige bérip, atomning ziyinigha uchrighanlar muziyini ziyaret qilip uyghur diyarida atomdin ziyan körgenler heqqide söhbet yighinigha qatnashqan körünüshdin biri bolup, u yaponluqlargha xitayning uyghur diyaridiki 46 qétimliq atom sinaqliri toghrisida doklat bergen.

Yaponiye Uyghur jem'iyitining mes'uli ilham mexmut ependi bügün radi'omiz Uyghur bölümining ziyaritini qobul qilip, yaponiye tashqi ishlar ministirliqining bu bayanatni chiqirish jeryani heqqide toxtaldi.

Ilham ependi yene, yaponiye Uyghur jem'iyitining élip bériwatqan xizmetliri heqqide toxtilip, bu jem'iyetning Uyghurlarning nöwettiki ehwali hem yaponiyide oqush we xizmet bilen turuwatqan Uyghurlar uchrawatqan qiyinchiliqlar heqqide, yaponiye hökümitining munasiwetlik organlirigha dawamliq ehwal inkas qilip turuwatqanliqini bayan qildi.

Ilham ependi sözide, özlirining yaponiye hökümitidin Uyghur milliy dawasigha arilashqanliq sewebidin, xitaygha qaytish imkaniyiti bolmay, yaponiyide uzun mezgil turup qélishqa mejbur boluwatqan Uyghurlarning teqdirige köngül bölüshni telep qiliwatqanliqini hem yaponiye hökümitidiki munasiwetlik tarmaqlarning kambodzhadiki 20 neper Uyghurning xitaygha qayturulghanliq weqesidin kéyin, yaponiyide yashawatqan Uyghurlarning bundin kéyinki teqdirige téximu köngül bölüwatqanliqini, hazir yaponiye hökümitining, eger yaponiyidiki Uyghurlar siyasiy panahliq tilise, ulargha yaponiye hökümitining barliq qulayliq shara'itlarni yaritip bérish üchün tirishchanliq körsitidighanliqini bildürgenlikini bayan qildi.

Yaponiyidiki Uyghur ziyaliyliridin qutluq ependi ziyaritimizni qobul qilip, yaponiyidiki Uyghurlarning kambodzhadiki 20 neper Uyghurning xitaygha qayturulghanliqidin nahayiti échiniwatqanliqini, yaponiye hökümitining insanperwerlik nuqtisidin turup Uyghurlarning teqdirige yéqindin köngül bölüp kéliwatqan démokratik döletlerning biri bolghini üchün dadilliq bilen kambodzha hökümitining qilmishini eyibligenlikini bayan qildi.

Ziyaritimiz axirida ilham ependi yaponiye Uyghur jem'iyitining mes'uli bolush süpiti bilen, özlirining kambodzhadiki Uyghur qérindashlirigha eng ünümlük yardemlerde bolalmighanliqidin epsuslinidighanliqini bildürdi.

Kambodzha hökümitining özining iqtisadi menpe'etini insanperwerliktin üstün orun'gha qoyup, xelq'ara ehdinamilerge xilap halda, kambodzha zéminida birleshken döletler teshkilatidin siyasiy panahliq tiligen 20 neper Uyghurni xitaygha qayturup bérish qilmishi, hazir xelq'aradiki insan heqliri teshkilatliri hem démokratik döletler teripidin qattiq eyiblenmekte.

Yuqiridiki awaz ulinishidin, bu heqtiki melumatimizning tepsilatini anglighaysiler.