يەرلىك مىللەتلەرنىڭ ھوقۇقى ھەققىدىكى ب د ت باياننامىسى ئېلان قىلىنغىنىغا 5 يىل بولدى

مەزكۇر مۇھىم خەلقئارالىق قانۇنىي ھۆججەتنىڭ ئۇيغۇرچە نۇسخىسى، دۇنيا ئۇيغۇر قۇرۇلتىيىنىڭ سابىق مۇئاۋىن رەئىسى مەمەت توختى ئەپەندى تەرىپىدىن تەييارلىنىپ «دۇنيا ئۇيغۇر قۇرۇلتىيى»، «ئۇيغۇر بىز» ۋە باشقا تور بەتلەر ئارقىلىق ئۇيغۇرلار بىلەن يۈز كۆرۈشكەن ئىدى. مەزكۇر خەلقارالىق قانۇنىي ھۆججەتنىڭ ماقۇللانغانلىق خاتىرە كۈنى مۇناسىۋىتى بىلەن زىيارىتىمىزنى قوبۇل قىلغان مەمەت توختى ئەپەندى، مەزكۇر خەلقئارالىق ھۆججەتنى تەرجىمە قېلىشتىن كۈتۈلگەن مەقسەت ۋە بۇنىڭ ئەھمىيىتى ھەققىدە توختىلىپ، «ئۇيغۇر خەلقىمىزنىڭ خىتاينىڭ ئاساسى قانۇنى، مىللى تېررىتورىيىلىك ئاپتونومىيە قانۇنىدا ئېنىق قانۇنلاشتۇرۇلۇپ بەلگىلەنگەن ھەق - ھوقۇقلىرىمىزدىن باشقا يەنە، ب د ت دە قوبۇل قېلىنغان ۋە بىزگە مۇناسىۋەتلىك قانۇنى - ھۆججەتلەردە بەلگىلەنگەن ھەق - ھوقۇقلىرىمىز ھەققىدىكى چۈشەنچىمىزنى ئاشۇرۇش ۋە بۇ ھەقتە خەلقىمىزگە مەلۇمات سۇنۇشتىن ئىبارەت» دەپ كۆرسەتتى. نۆۋەتتە بۇ ھەقتە مۇخبىرىمىز گۈلچېھرەنىڭ مەمەت توختى ئەپەندى بىلەن ئېلىپ بارغان سۆھبىتىگە دىققەت بەرگەيسىلەر.