Қаһраманмараш университетида уйғурлар тоғрисида доклат бериш йиғини өткүзүлди

Ихтиярий мухбиримиз әркин тарим
2019-04-22
Елхәт
Пикир
Share
Принт
Түркийәниң шәрқий җәнубиға җайлашқан қаһраманмараш вилайитидики сүтчү имам университети.
Түркийәниң шәрқий җәнубиға җайлашқан қаһраманмараш вилайитидики сүтчү имам университети.
Social Media

22-Апрел күни түркийәниң шәрқий җәнубиға җайлашқан қаһраманмараш вилайитидики сүтчү имам университетида уйғурлар тоғрисида доклат бериш йиғини өткүзүлди.

Қаһраманмараш университети түрк тили вә әдәбияти факултети оқутқучиси мәмдух аталай әпәнди риясәтчилик қилған доклат бериш йиғинида мәзкур университетниң диний билимләр кәспи оқутқучиси, доктор алим боғда әпәнди «шәрқий түркистанниң өтмүши вә бүгүни» темисида, түркийә авази радиосида ишләватқан миркамил қәшқәрли әпәнди болса «шәрқий түркистан мәсилисидә мусулман дөләтлириниң вәзипилири» темисида доклат бәрди.

Миркамил қәшқәрли әпәнди билән доктор алимҗан боғда әпәндиләр сүтчү имам университетида бәргән доклатлирида, нуқтилиқ һалда уйғур дияриниң һазирқи вәзийити вә мусулман дөләтлириниң уйғурлар үчүн қилишқа тегишлик ишлирини баян қилған.

Доктор алим боғда әпәнди зияритимизни қобул қилип, сүтчү имам университетида өткүзүлгән доклат бериш йиғиниға оқутқучи, оқуғучилар вә бәзи аммиви тәшкилат мәсуллиридин болуп көп санда кишиниң иштирак қилғанлиқини баян қилди. 

22-Апрел күни қаһраманмараш шәһиридики сүтчү имам университетида өткүзүлгән доклат бериш йиғинида сөзлигән миркамил қәшқәрли әпәнди, алди билән уйғур дияриниң тарихи, йәр асти вә йәр үсти байлиқлири, истратегийилик әһмийити тоғрисида тохталғандин кейин, уйғурларниң һазирқи вәзийити вә уйғурларниң мусулман дөләтлиридин немиләрни күтүватқанлиқи, мусулман дөләтлириниң немиләрни қилиши керәклики тоғрисида мәлумат бәрди. 

Йиғинни сүтчү имам университети оқуғучилар уюшмиси уюштурған болуп, йиғинға мәзкур университетниң мәсуллири вә оқутқучи-оқуғучилардин болуп 300 әтрапида киши қатнашқан. Бу йиғинда мәзкур университетниң оқутқучиси доктор алим боғда әпәнди уйғурларниң тарихи тоғрисида мәлумат бәргәндин кейин нуқтилиқ һалда һазирқи «җаза лагерлири» тоғрисида мәлумат бәргән. 

Сүтчү имам университети уйғур оқуғучилар көп университетлардин бири һесаблиниду. Абдулхәмит ясин әпәнди доклат бериш йиғининиң яхши өткәнликини, оқуғучиларниң қизиқип аңлиғанлиқини йиғин ахирида арқа-арқидин соаллар сориғанлиқини тәкитлиди.

Түркләр уйғур диярини өзлириниң ата юрти дәп билгәчкә уйғур мәсилисигә алаһидә көңүл бөлиду. Икки йил ичидә сүтчү имам университетида 20 қетимдәк уйғурлар тоғрисида паалийәт өткүзүлгән. Буларниң һәммисигә дегүдәк қатнишип сөзлигән алим боғда әпәнди бу хил паалийәтләрниң җамаәт пикри топлашта көп пайдилиқ болуватқанлиқини илгири сүрди.

Пикирләр (0)
Share
Толуқ бәт