«Вирус кризиси ярдәм мәркизи» түркийәдики уйғурларға ярдәм пули тарқитишқа башлиди

Ихтиярий мухбиримиз әркин тарим
2020-04-29
Share
wirus-krizisi-yardem-merkizi.jpg «Вирус кризиси ярдәм мәркизи» түркийәдики уйғурларға ярдәм пули тарқатмақта. 2020-Йили 28-апрел, истанбул.
RFA/Erkin Tarim

Корона вируси тарқалғандин кейин келип чиққан иқтисадий кризис, карантин, иш вә сода орунлириниң тохтиши қатарлиқ түрлүк сәвәбләрдин худди дуняниң көп әллиридикигә охшашла түркийә вә бир қисим оттура асия әллиридики уйғурларму иқтисадий вә турмуш җәһәттин қийин әһвалларда қалғаниди. Бу уйғурларниң қийинчилиқлирини һәл қилиш үчүн уйғурлар тәрипидин қурулған «вирус кризиси ярдәм мәркизи» түркийәниң истанбул шәһиридә уйғурларға ярдәм пули тарқитишқа башлиди. Һәр қайси дөләтләрдә ианә қилинған пуллар түрк лирасиға алмаштурулуп тарқитип берилмәктә.

«Вирус кризиси ярдәм мәркизи» ярдәм тәләп қилған кишиләрниң тизимликини бекитип чиқип, буларниң ичидин 1600 аилә билән 400 оқуғучиға ярдәм пули тарқитип беришни қарар қилғаниди. Бу һәқтә зияритимизни қобул қилған мәзкур «мәркәз» дә д у қ вәкили болуп вәзипә өтәватқан абдурешит абдулхәмит мәркәзниң 27-апрел күни ярдәм пули тарқитип беришни башлиғанлиқини билдүрди.

«Вирус кризиси ярдәм мәркизи» қурулупла дуняниң һәр қайси җайлиридики уйғурларни ианә беришкә чақирғаниди. Қисқиғинә вақит ичидә 1 милйон түрк лирасиға, йәни 140 миң долларға йеқин пул йиғилғаниди. Мәзкур кризис мәркизи әзаси низамидин тәмкини әпәнди 27-чесла 250 аилә уйғурға 500 түрк лирасидин пул тарқитип берилгәнликини, 28-чесла болса 400 аилә уйғурға пул тарқитип беришни пиланлаватқанлиқини баян қилди.

Абдурешит абдулхәмит әпәнди бу ярдәмләрниң истанбулдики уйғурларға «мави ай» ярдәм тәшкилатиниң ишханисидин тарқитиватқанлиқини, башқа шәһәрдики уйғурларниң банка һесабиға әвәтип берилидиғанлиқини баян қилди.

Абдурешит абдулхәмит әпәнди биринчи басқучта пул ярдими бериш қарар қилинған кишиләргә пул тарқитилип болунғандин кейин давамлиқ һалда башқиларға һәм йеңидин тизимға алдурғанларға әһвал бойичә пул вә башқа ярдәмләр көрситилидиғанлиқини билдүрди.

Түркийә дуняда әң көп көчмән қобул қилған дөләтләрдин бири болуп, һазир 4 милйонға йеқин сүрийәлик, пакистан, афғанистан, ирақ вә ирандин кәлгән көчмәнләр болуп җәмий 5 милйон әтрапида көчмәнгә саһибханилиқ қилмақта. Түркийә һөкүмити, сүрийәдә ички уруш давамлишиватқан болғачқа сүрийәликләргә мәлум миқдарда пул ярдими бәрмәктә вә уларни һәқсиз давалаш билән тәмин әтмәктә. Лекин, уйғурлар түркийә һөкүмитиниң турмуш ярдәм пули билән һәқсиз давалиниш һоқуқидин бәһримән болалмиғанлиқтин, униң үстигә корона вируси түркийәдә ямрашқа башлиғандин кейин бәзилириниң хизмәтлиридин айрилип қелиши, тиҗарәтлириниң тохтап қелиши түпәйлидин улар турмушта қатмуқат қийинчилиқларға дучар болмақта. Ундақта «вирус кризиси ярдәм мәркизи» уйғурларға бундин кейин йәнә давамлиқ һалда қандақ ярдәмләрни көрситиду? абдурешит абдулхәмит әпәнди бундақ кәң-көләмлик ярдәм берилмисиму бундин кейинму ярдәм тарқитиш хизмәтлириниң давамлишидиғанлиқини тәкитлиди.

Биз «вирус кризиси ярдәм мәркизи» тарқатқан ярдәм пулини тапшуруп алған көчмән уйғурлар биләнму алақиләштуқ. Истанбулда туруватқан диний зат адил абдуғопур әпәнди зияритимизни қобул қилип, бу ярдәмниң истанбулдики уйғурларниң һазирқи вақитлиқ қийинчилиқини йеңиши үчүн көп пайдиси болидиғанлиқини баян қилди.

Адил абдуғопур әпәнди өзиниң көп пәрзәнти барлиқини, аялиниң еғир кесәл икәнликини, өзлириниң иқтисадий җәһәттин зор қийинчилиқ астида икәнликини, сахавәтчи уйғур вә түркләрниң ярдәм қилиши билән турмушини қамдаватқанлиқини, бу қетим алған 500 түрк лираси ярдәм үчүн рәһмәт ейтидиғанлиқини баян қилди.

«Вирус кризиси ярдәм мәркизи» мәсули турғунҗан алавуддин әпәнди соалимизға җаваб берип, биринчи басқучта 996 миң түрк лираси қиммитидә пул йиғилғанлиқини, бу пулни һазирчә түркийәдики уйғурларни асас қилған һалда тарқитип бериватқанлиқини вә буниң сәвәблирини билдүрди.

Бу йил 3-айниң 26-күни дуняниң һәр қайси дөләтлиридә паалийәт елип бериватқан 30 дин артуқ уйғур тәшкилатиниң мәсуллири телефон йиғиниға қатнишип, д у қ ниң йетәкчиликидә «вирус кризиси ярдәм мәркизи» қуруш тоғрисида бирдәк қарар қобул қилғаниди. 31-Март күни болса мәхсус мураҗиәтнамә елан қилип пүтүн дунядики уйғурларни мәзкур мәркәзгә пул ианә қилиш һәққидә чақириқ қилғаниди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.