Үрүмчидики оттура мәктәп хадимлири йәнила торда дәрс өтүлидиғанлиқини билдүрди

Мухбиримиз меһрибан
2020-09-09
Елхәт
Пикир
Share
Принт
Ишчилар үрүмчидики давалаш үскүнилири завутида қоғдаш кийими тикиватқан көрүнүш. 2020-Йили 27-январ, үрүмчи.
Ишчилар үрүмчидики давалаш үскүнилири завутида қоғдаш кийими тикиватқан көрүнүш. 2020-Йили 27-январ, үрүмчи.
REUTERS

9-Ай кириши билән хитайниң «тәңритағ тори», «шинҗаң гезити», «шинҗаң телевизийәси», «хәлқ гезити» қатарлиқ һөкүмәт таратқулирида 1-сентәбирдин башлап, уйғур аптоном районда таҗсиман вирустин юқумлинишниң 0 пирсәнткә кә чүшкәнлики, аһалиләргә қаритилған карантинниң бикар қилинғанлиқи, нормал хизмәт вә оқушниң әслигә кәлгәнлики һәққидики хәвәрләр берилишкә башлиған иди.

«Тәңритағ тори» ниң 3-сентәбирдики хәвәрлиридә уйғур аптоном районлуқ маарип назаритиниң 6-сентәбир күни райондики оттура-башланғуч мәктәпләрдә дәрс башлинидиғанлиқи, 10-сентәбир күни алий мәктәпләрдә дәрс башлинидиғанлиқи һәққидики уқтуруши елан қилинди.

7-Сентәбир күни «тәңритағ тори» ниң хитайчә санида «6-сентәбир күни шинҗаңниң һәрқайси җайлардики оттура мәктәпләрдә оқуғучилар мәктәпләргә келип, дәрс башлиди» сәрләвһәлик тәпсилий хәвәр берилди. Хәвәрдә қумул шәһәрлик 2-оттура мәктәп, корла тәҗрибә оттура мәктәп, үрүмчи даванчиң районидики 40-оттура мәктәп, фукаң 2-оттура мәктәп қатарлиқ мәктәпләрдә оқуғучиларниң қизитмисини өлчәш, уларға маска, дезинфексийә суюқлуқи қатарлиқларни тарқитиш, өз-ара арилиқ сақлаш қатарлиқ тәдбирләр йолға қоюлуп, 6-сентәбир күни рәсмий дәрс башланғанлиқи хәвәр қилинди.

Әмма радийомиз уйғур бөлүминиң үрүмчидики бир қисим оттура мәктәпләргә телефон қилип әһвал игилишичә, үрүмчидики мәктәпләрдә күзлүк оқуш мәвсумидә оқуғучиларниң йәнила торда дәрс аңлаватқанлиқи мәлум болди.

Үрүмчи сайбағ райониға қарашлиқ шинҗаң педагогика университети шөбә оттура мәктипи оқутуш бөлүмидики бир хадим телефонимизни қобул қилди.

Биз бу хадимдин «дүшәнбә күни башланған дәрс тор арқилиқ өтүләмду яки мәктәп районида өтүләмду?» дәп соридуқ.

Бу хадим соалимизға җаваб берип, оқуғучиларниң йәнила телефондики айрим уқтурушни сақлиши керәкликини билдүрди.

Биз униңдин маарип назаритиниң мәктәпләрдә 6-сентәбир оқуш башлинидиғанлиқи һәққидә уқтурушниң мәзкур мәктәптә иҗра қилиниш әһвалини соридуқ.

У уқтурушта гәрчә 6-сентәбир дәрс башлинидиғанлиқи елан қилинған болсиму, әмма мәктәпләрдә айрим орунлаштуруш барлиқини ейтти. Униң билдүрүшичә, уларға аввал толуқ оттура мәктәпләрдә, андин толуқсиз оттура вә башланғуч мәктәпләрдә тәдриҗий һалда нормал оқутушни әслигә кәлтүрүш уқтурулған икән.

Униң билдүрүшичә, мәйли толуқсиз оттура мәктәп оқуғучилири болсун яки толуқ оттура мәктәп оқуғучилири болсун, оқуғучиларниң мәктәп райониға келип дәрс башлиши үчүн йәнила маарип назаритиниң айрим уқтурушини сақлаши керәк икән.

Биз йәнә үрүмчи йеңи шәһәр райониға қарашлиқ төмүрйол идарисидики 8-оттура мәктәпкә телефон қилип, «бу мәвсумлуқ оқутуш торда елип бериламду яки мәктәп районидиму?» дәп соридуқ.

Мәктәп оқуғучилар бөлүмидин телефонимизни алған хадим аввал қайси йиллиқниң оқуш әһвалини билмәкчи икәнликимизни сориди. Андин у толуқ оттура мәктәп оқуғучилири билән толуқсиз оттура мәктәп оқуғучилириниң дәрс орунлаштурулушида пәрқ барлиқини билдүрди.

У йәнә һәрқайси йиллиқларниң қачан оқуш башлайдиғанлиқи һәққидики тәпсилий әһвалларни мәктәп оқутуш башқармисидин игиләшни билдүрүп, мәсул хадимниң телефон номурини ейтип бәрди.

Соаллиримизға җаваб бәргән оқутуш башқармисиниң бир хадими йеңи мәвсумлуқ оқуш орунлаштурушиниң йәнила торда елип берилидиғанлиқини билдүрди. У 6-сентәбирдин башлап бу мәктәптә тор арқилиқ дәрс өтүш мәшғулатиниң елип бериливатқанлиқини ейтти.

Хитай һөкүмәт таратқулирида гәрчә үрүмчидә карантин тәдбирлири әмәлдин қалдурулуп, нормал хизмәт вә оқуш әслигә кәлтүрүлгәнлики һәққидики хәвәрләр берилгән болсиму, әмма иҗтимаий таратқуларда үрүмчи тәңртағ районидики уйғурлар олтурақлашқан бәзи аилиликләр районлириниң техичә ечиветилмигәнлики, тәңритағ районидики мәктәпләрниң бу мәвсумлуқ оқуши һәққидә ениқ мәлумат йоқлуқи илгири сүрүлгән иди.

Биз техиму илгириләп әһвал игиләш үчүн тәңритағ районидики уйғурлар олтурақлашқан бирқанчә аһалиләр райониға, тәңритағ районидики оттура мәктәпләрдин үрүмчи тәҗрибә оттура мәктипигә вә үрүмчи толуқ оттура мәктәп, йәни бурунқи 14-оттура мәктәпкә телефон қилдуқ. Әмма бу райондики мәйли шәһәр аһалилири болсун яки мәктәпләрниң телефони болсун уланмиди яки аптоматик җаваб бериш үскинисидин кәлгән җавапқила ериштуқ.

Пикирләр (0)
Share
Толуқ бәт