Д у қ рәиси оксфорд университетида уйғурлар тоғрулуқ доклат бәрди

Ихтиярий мухбиримиз әкрәм
2021-06-11
Share
Д у қ рәиси оксфорд университетида уйғурлар тоғрулуқ доклат бәрди Д у қ рәиси долқун әйса мәшһур оксфорд университетида уйғурлар вә шәрқий түркистанниң нөвәттики вәзийити тоғрисида доклат бериватқан көрүнүш. 2021-Йили 10-июн, әнглийә.
RFA/Ekrem

Д у қ рәиси долқун әйса мәшһур оксфорд университетида уйғурлар вә шәрқий түркистанниң нөвәттики вәзийити тоғрисида доклат бәргән.

10-Июн күни әнглийәниң дуняға даңлиқ алий мәктәплиридин бири болған оксфорд университетиниң оқуғучилар уюшмиси д у қ рәиси долқун әйса әпәндини уйғурлар вә шәрқий түркистанниң нөвәттики вәзийити тоғрисида доклат беришкә тәклип қилған. Йиғинға долқун әйса билән биргә д у қ ниң баш тәптиши абдулһаким идрис вә д у қ сәһийә-екологийә бөлүминиң мудири әнвәр тохтиларму қатнашқан.

Д у қ рәисиниң билдүрүшичә, оксфорд университетиниң оқуғучилар уюшмиси тунҗи қетим 2020-йили 3-айда уйғур сиясий актиплирини бир қетим доклат беришкә тәклип қилған. Бу қетимқи доклат бериш йиғинида оқуғучилар д у қ рәиси долқун әйсаниң қандақ болуп бүгүнкидәк бир актип сиясий паалийәтчигә айланғанлиқи тоғрисида соаллар сориған. Долқун әйса әпәнди өзиниң яшлиқ дәвридики кәчмишлирини баян қилиш билән биргә, нөвәттики шәрқий түркистанниң омумий вәзийити тоғрисида әтраплиқ тохталған.

4-Июндин 7-июнғичә лондонда давам қилған "уйғур сот коллегийәси" ниң гуваһлиқ аңлаш йиғиниға қатнишиш үчүн америкидин кәлгән д у қ ниң баш тәптиши абдулһәким идрис әпәнди зияритимизни қобул қилип бу доклат бериш йиғини һәққидә тохталғанда, д у қ рәисиниң бәргән доклатиниң оксфорд университетиниң оқуғучилириға күчлүк тәсир қилғанлиқини, йиғинниң соал-җаваб шәклидә наһайити қизиқарлиқ өткәнликини тилға алди.

Долқун әйса әпәнди сөзиниң ахирида, келәчәктә әнглийәниң вә дуняниң сиясий, иқтисадий вәзийитигә тәсир көрситидиған кишиләрдин болуп йетишип чиқидиған бу яшларға шәрқий түркистанниң омумий әһвалини аңлитиш пурситигә игә болғанлиқидин мәмнунлуқ һес қилғанлиқини ипадә қилди.

"уйғур сот коллегийәси" ниң гуваһлиқ аңлаш йиғинини ахирлаштуруп лондонда қалған бирқисим д у қ рәһбәрлири һазир 11-июндин 13-июнғичә давам қилидиған әнглийәдики G7 йиғинида уйғурлар дуч келиватқан "ирқий қирғинчилиқ" ниң күнтәртипни игилиши вә йиғиндин уйғурлар тоғрулуқ яхши бир нәтиҗиниң вуҗудқа чиқиши үчүн теришчанлиқ көрсәтмәктикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт