Түркийәдә б д т ниң һимайисидә туруватқан йүсүпҗан әмәт истанбулда қораллиқ һуҗумға учриди

Мухбиримиз шөһрәт һошур
2020-11-03
Share
yusupjan-emet-shohret-hoshur.jpg Радийомиз зияритини қобул қилған вә өзиниң хитайниң сабиқ алаһидә хадими икәнликини илгири сүргән йүсүпҗан әмәт қораллиқ һуҗумға учриған. Мухбиримиз уни дохтурханида зиярәт қилмақта. 2020-Йили 2-ноябир, түркийә.
RFA/Shöhret Hoshur

Өткән йили 2-айда радийомиз зияритини қобул қилған вә өзиниң хитайниң сабиқ алаһидә хадими икәнликини илгири сүргән йүсүпҗан әмәт 2-ноябир истанбул вақти кәч саәт 11 әтрапида намәлум киши яки кишиләрниң қораллиқ һуҗумиға учриған. Мухбиримиз бүгүн йүсүпҗан әмәт давалиниватқан дохтурханиниң җиддий қутқузуш бөлүмигә берип, уни зиярәт қилди. Һуҗумда қоли вә долисидин оқ йегән йүсүпҗан әмәт өзиниң уйғурдин дүшмини йоқлуқини, пәқәт өзи илгири хизмәт қилған хитай тәрәпниң сүйқәстигә учриғанлиқини илгири сүрди.

Бүгүн төркийәдики дәмирөрән хәвәр агентлиқиниң хәвәр қилишичә, истанбулниң авчилар мәһәллисидә 2-ноябир кечә саәт 11 гә йеқин хитай вәтәндиши болған йүсүпҗан әмәт исимлик бир ишчи намәлум кишиләрниң қораллиқ һуҗумиға учриған. Һуҗумда қоли вә долисиға оқ тәгкән йүсүпҗан истанбулдики бақиркөй дөләт дохтурханисиниң җиддий қутқузуш бөлүмигә йөткәлгән. Биз бүгүн мәзкур дохтурханиниң җиддий қутқузуш бөлүмигә берип, яридар йүсүпҗан әмәтни зиярәт қилдуқ. Йүсүпҗанниң баян қилишичә, у авчилар мәһәллисидә олтурушлуқ достиниң өйигә келиветип, бинаға йеқинлашқанда гуманлиқ кишиләрниң өзигә әгишиватқанлиқини байқиған. У достиниң өйидә 1-2 саәтчә олтуруп қайтқинида, йәни бина дәрвазисидин чиқиватқинида бая өзигә әгәшкән гуманлиқ кишиләрниң қораллиқ һуҗумиға учриған.

Демирөрән агентлиқиниң хәвиридин мәлум болушичә, гумандар вәқә садир қилип болғандин кейин нәқ мәйдандин қечип кәткән. Сақчилар нөвәттә гумандарни тутуш үчүн һәрикәт қилмақта вә йүсүпҗан әмәтниң йеқин достлиридин делоға четишлиқ әһвалларни сүрүштә қилмақтикән.

Йүсүпҗан әмәт өткән йили "әл-җәзирә" телевизийәси вә радийомизниң зияритини қобул қилған чеғида, өзиниң хитай тәрипидин пакистанға чиқирилғанлиқини вә пакистанға чиққандин кейин хитайдин ашкара йүз өрүп түркийәдики б д т ишханисидин сиясий панаһлиқ тилигәнликини мәлум қилған иди. У бир мәзгилдә түркийәниң зоңгулдақ вилайитидә панаһлинип турған, кейинчә истанбулға йөткилип келип, бир бинакарлиқ қурулуш ширкитидә ишчи болуп ишләватқан икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт