10 Yashliq Uyghur ösmür abdulla pakzat xelq'araliq matématika musabiqiside mis médalgha érishti

Türkiyede ösüp yétiliwatqan 10 yashliq Uyghur ösmür abdulla pakzat malaysiya paytexti ku'alalumpurda ötküzülgen 12-nöwetlik “Dunya matématika tekliplik musabiqisi” da mis médalgha érishken. 2024-Yili iyul, ku'alalumpur

Türkiyede ösüp yétiliwatqan 10 yashliq Uyghur ösmür abdulla pakzat bu yil malaysiya paytexti ku'alalumpurda ötküzülgen 12-nöwetlik “Dunya matématika tekliplik musabiqisi” da mis médalgha érishken. Uning bu netijisi ijtima'iy taratqularda tarqalghandin kéyin muhajirettiki Uyghur jama'iti arisida küchlük alqishqa érishti.

“Dunya matématika tekliplik musabiqisi” dunyaning herqaysi jayliridiki yash ösmürler arisida matématikini teshwiq qilish we omumlashturush meqsitide ilgiri tunji bolup teywende orunlashturulghan bolup, bu her yili bir qétim ötküzülidighan xelq'araliq musabiqe iken.

Biz bu xewerni anglighandin kéyin abdulla pakzat we uning dadisi abdukérim pakzatni téxi ular seper üstide turuwatqanda tépip ziyaret qilduq. Abdulla shundaq semimiylik bilen hemde yene shundaq mukemmel ögen'gen ana tili bilen özining héssiyatini biz bilen ortaqlashti.

 Bu kichik matématika mahiri özi intayin kemter bolup, uning érishken bu derijisi unche addiy emes idi. Mezkur musabiqe tor bétidin igilishimizche, musabiqining deslepki aylanma musabiqiliri bu yil 1-aydin 3-ayghiche bolghan ariliqta musabiqige eza bolghan dölet we rayonlarning özide ötküzülgen. Abdulla pakzat dunyaning herqaysi jayliridin deslepki aylanma musabiqige tizimlatqan 60 ming bala ichidin, axirqi hel qilghuch musabiqige tallan'ghan.

Hel qilghuch musabiqige amérika, awstraliye, türkiye, rusiye, teywen, hindistan, xitay, malaysiya qatarliqlarni öz ichige alghan jem'iy 22 dölettin kelgen 904 neper mahir qatnashqan bolup, abdulla ene shularning biri. Bu yil türkiyedin hel qilghuch musabiqige abdulla bilen birlikte jem'iy 9 bala kelgen.

Abdukerim Pakzat

Abdulla özining yéshi boyiche tallan'ghan musabiqe guruppisi terkibide hel qilghuch musabiqige chüshüp, körünerlik netije körsitip, mis médal mukapatigha érishken.

Abdullaning dadisi abdukérim pakzatning bizge déyishiche, bu abdullaning tunji qétimliq xelq'araliq musabiqe tejribisi bolup hésablinidiken. U, oghlining cheklik shara'itlar astidimu bundaq bir netije yaratqanliqidin xursen bolghanliqini éytti.

Abdulla buningdin ilgiri yene, türkiyede yilda bir ötküzülidighan zor kölemlik matématika musabiqisi bolghan “Kén'guru matématika musabiqisi” gha qatnashqan bolup, u bu musabiqide 4-yilliqlar boyiche musabiqige qatnashqan texminen 9000 bala arisida 29-bolghan.

Abdukerim Pakzat

Abdulla kichikidin tartip, matématikigha zor ishtiyaq baghlighan bolup, u ata-anisining harmay-talmay yéteklishi netijiside özining bu sahediki talantini jari qildurup kéliwatqan iken. Abdulla yene alliqachan kompyutér pirogramma tilliri asasinimu turghuzup bolghan bolup, u C/C++, Python tillirida murekkep pirogrammilarni yazalaydiken.

Abdukérim pakzatning déyishiche, u balisining matématika penlirige bolghan qiziqishini ashurush üchün kichikidin tartip uninggha türlük matématika oyunlirini yasap bergen, uning bilen birlikte oynighan hem uninggha ders ögetken. U ata-anilarning balilarni pütün zéhni bilen yéteklishining muhim roli barliqini tekitlidi.

Emdi, abdulla özi matématika heqqide néme deydu? u kichik balilargha matématika öginishte némilerni tewsiye qilidikin?

Biz abdulla bilen téximu köp söhbetlishishni arzu qilghan bolsaqmu, emma seper munasiwiti bilen söhbitimizni mushu yerde axirlashturduq.