Шинҗаң педагогика университетиниң оқутқучиси нурмәмәт өмәр учқунниң 10 йиллиқ кесиветилгәнлики дәлилләнди

Мухбиримиз шөһрәт һошур
2022.03.04
Share on WhatsApp
Share on WhatsApp
nurmemet-omer-uchqun.jpg Шинҗаң педагогика университетиниң оқутқучиси нурмәмәт өмәр учқун. (Вақти вә орни ениқ әмәс)
Oqurmen teminligen

“көзүңни ач, өзүңни тап әркәкләр” намлиқ мақалиләр топлиминиң аптори, “чоң шаһмат тахтиси” намлиқ америка истратегийә дәстурини уйғурчә тәрҗимә қилған нурмәмәт өмәр учқунниң 10 йиллиқ кесиветилгәнлики вә нөвәттә керийә түрмисидә җаза муддитини өтәватқанлиқи дәлилләнди.

Инкас қилинишичә, шинҗаң педагогика университети филологийә институтиниң әдәбият оқутқучиси нурмәмәт өмәр учқун “дөләт мәдәнийитини чәткә қеқиш” вә “дөләтни парчилашқа урунуш” билән әйиблинип 10 йиллиқ кесиветилгән. Бу учур нурмәмәт өмәр учқунниң нөвәттә норвегийәдә яшаватқан савақдиши һүсәнҗан әпәнди тәрипидин игиләнгән.

Мәлум болушичә, әдәбият, тәрҗимә, тәтқиқат вә компютер қатарлиқ көп хил саһәдә өзини пухта йетилдүргән вә уйғур җәмийитигә мәзкур саһәләрдә көзгә көрүнәрлик мевиләрни сунуп келиватқан нурмәмәт өмәр учқун 2018 ‏-йилиниң бешида тутқун қилинған. Униң тутқунда икәнлики икки йил аввалқи ениқлашлиримиз давамида дәлилләнгән болсиму, әмма кесилгән-кесилмигәнлики намәлум иди. Униң тутқунда икәнлики ашкариланғандин кейин, һүсәнҗан әпәнди өзиниң алақидар қаналлири арқилиқ, нурмәмәт өмәр учқунниң ақивити һәққидә изчил мәлумат игилигән вә униң керийә түрмисидә җаза муддитини өтәватқанлиқидинму хәвәр тапқан.

Телефонимизни қайта қобул қилған, педагогика университети хадимлири, нурмәмәт өмәр учқунниң әһвали һәққидики соаллиримизға җаваб бериштин өзлирини қачурди.

Тор архиплиридики материялларда көрситилишичә, нурмәмәт өмәр учқун, хотән қариқаштин болуп, шинҗаң университетиниң әдәбият факултетини 2009 ‏-йили пүттүргән вә шу йили шинҗаң педагогика университетиға ишқа чүшкән. У 2011 ‏-йилдин 2015 ‏-йилғичә шаңхәй хуадоң педагогика университетида билим ашуруп докторлуқ унваниға еришкән вә шинҗаң педагогика университетиға қайтидин ишқа чүшкән. У оқуш вә оқутуш ишлириниң сиртида илмий тәтқиқат, әдәбий иҗадийәт вә тәрҗимә-тәһрир ишлири биләнму шуғуллинип уйғур җәмийитигә көзгә көрүнәрлик сәмәриләрни тәқдим қилған. Инкас қилинишичә, униң “көзүңни ач, өзүңни тап әркәкләр” намлиқ мақалиси җәмийәттә миллий ойғиниш садасини яңратқан болса, “чоң шаһмат тахтиси” намлиқ тәрҗимә китаби җәмийәтни сиясий сәзгүрлүккә дәвәт қилған. Мәлум болушичә бу икки китаб униң бөлгүнчилик гумани билән сорақ қилинишиға түрткә болған болса, униң “байқисаң топиму алтун” намлиқ тәрҗимә әсири даириләр тәрипидин “ғәрб мәдәнийитини көккә көтүрүш вә дөләт мәдәнийитини чәткә қеқиш” дәп қаралған.

Үрүмчидики алақидар хадимлар нурмәмәт өмәр учқун һәққидә учур беришни изчил һалда рәт қилди.

Һүсәнҗан әпәндиниң игилишичә, нурмәмәт өмәр учқун үрүмчи сақчилири тәрипидин тутулуп, бир мәзгилдин кейин хотән сақчи даирилиригә өткүзүп берилгән вә 10 йиллиқ кесилгәндин кейин, керийә түрмисигә соланған. Һүсәнҗан әпәнди йәнә нурмәмәт өмәр учқунниң әһвали һәққидә, униң ата-аниси олтурушлуқ болған қарақаш наһийә явағ йезилиқ сақчи хадимлириниң ениқ хәвири болуш еһтималлиқини оттуриға қойди. Телефонимизни қобул қилған нурмәмәтниң ата-аниси олтурушлуқ кәнтниң секретари нурмәмәтниң 10 йиллиқ кесилгәнлики вә нөвәттә керийә түрмисидә җаза муддитини өтәватқанлиқини дәлиллиди.

Һөрмәтлик радио аңлиғучулар, нурмәмәт өмәр учқун йәнә уйғур районидики нопузлуқ журналлардин “шинҗаң мәдәнийити” журнилиниң бир мәзгил тәклиплик муһәррири болуп хизмәт қилған. Мәзкур журналниң даңлиқ муһәррири қурбан мамут әпәндиму 2017-йилдин кейин тутқун қилинған вә ақивити һазирғичә ениқсиз иди. Хитай сақчилириниң дело бир тәрәп қилишта нурмәмәт өмәр учқун билән қурбан мамут әпәндини бир-биригә чатқан-чатмиғанлиқи һазирчә мәлум әмәс.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.