Méditsina tetqiqatchisi imamjan ibrahimning lagérgha qamalghanliqi ilgiri sürülmekte

Méditsina tetqiqatchisi imamjan ibrahimning bostunda doxturluq imtihanigha qatnishish üchün ishligen doxturxanidiki xizmet kinishkisi.

2017-Yilidin buyan xitay hökümiti 1 milyondin 3 milyon'ghiche Uyghur, qazaq we bashqa yerlik millet kishilirini lagérlargha qamighan bolup, ularning arisida köpligen Uyghur bilim igilirimu bar idi.

Amérikaning boston shehiride méditsina kespi boyiche oqush we tetqiqatini tamamlighandin kéyin 2014-yili ürümchige qaytip ketken we 2017-yili tutqun qilinip lagérgha qamalghanliqi ashkarilan'ghan imamjan ibrahim ene shularning biridur.

Imamjan ibrahimning amérikadiki mezgilide oqush we xizmet üchün yollighan iltimasidiki terjimihaligha qarighanda, u 1985-yili qeshqer shehiride tughulghan. 2004-Yildin 2009-yil 7-ayghiche shinjang tébbiy uniwérsitétining dorigerlik kespide oqup baklawurluq unwani alghan. 2010-Yili 6-aydin 2011-yili 12-aygha qeder tokyo méditsina uniwérsitéti doxturxanisining yürek késelliri bölümide ziyaretchi ilmiy xadim bolup bilim ashurghan. 2012-Yilidin 2014-yiligha qeder amérikaning boston shehiride oqush we tetqiqat xizmiti bilen shoghullan'ghan. Bu jeryanda u bostondiki “Bét isra'il tébbiy merkizi” de bir mezgil ishligen.

Igilishimizche, imamjan ibrahim 2014-yili 11-ayda bostondin ürümchige qaytip ketkendin kéyin wéchat tori arqiliq chet'ellerdiki kesipdashliri we dostliri bilen bolghan alaqisini 2017-yiligha qeder dawamlashturup kelgen. U özining 2015-yildin bashlap ürümchidiki melum shexsiy shirkette mexsus Uyghur bimarlirigha yaponiye qatarliq döletlerdiki doxturxanilarda dawalinishigha yardem béridighan mulazimet kespini qiliwatqanliqini bildürgen. U bu jeryanda yene birqanche qétim yaponiyege bérip-kelgenlikini dostlirigha éytqan iken.

Imamjan ibrahimning kesipdashliridin 2010-yili yaponiyediki oqushini tamamlap türkiyege ketken doxtur ablet turan ependi ziyaritimizni qobul qildi. U imamjan ibrahimning 2009-yilining axiri yaponiyediki tokyo méditsina uniwérsitéti doxturxanisining yürek késeller bölümige kélip bilim ashurghanliqini, buninggha özining yardemde bolghanliqini eslep ötti.

Amérikaning boston shehiridiki massachustés téxnik uniwérsitétining Uyghur tetqiqatchisi, alime maysem mutellipowa xanim bilen finlandiyediki Uyghur pa'aliyetchi xalmurat ependiler bu heqte ziyaritimizni qobul qildi.

2020Yili 3-ayning 15-küni “Shahit biz” torida imamjan ibrahim heqqide sin körünüshlük guwahliq bergen maysem mutellipowa xanim 25-mart küni radiyomiz ziyaritini qobul qilip, imamjan ibrahimning 2011-yildin 2014 yilghiche amérikaning boston shehiridiki oqush we tetqiqati heqqide özi bilidighan ehwallarni anglatti.

Melum bolushiche, 2017-yili 1-aydin kéyin imamjan ibrahim yene özining amérika yaki yaponiyede doktorluq oqush arzusi barliqini bildürüp, yaponiye we amérikadiki ustazliri we bu sahediki Uyghur kesipdashliridin yardem sorighan iken.

Maysem mutellipowa xanimning eslime qilishiche, 2017-yili etiyaz mezgilide u imanjan ibrahimdin tuyuqsiz téléfon alghan.

Eyni chaghda özining xeter ichide ikenlikini bildürgen imamjan ibrahim téléfonda özining bostonda doktorluq unwani üchün oqush iltimasining qobul qilin'ghanliqini, emma pasporti tartiwélin'ghanliqi üchün amérikagha wiza élishqa amalsiz qalghanliqini éytqan. Shu yili 4-ayning axiri uning lagérgha élip kétilgenliki ashkarilan'ghan.

Finlandiyediki Uyghur pa'aliyetchisi xalmurat Uyghur ependi imamjan ibrahimning 2017-yili 4-ay mezgilide ürümchide tutqun qilinip, lagérgha élip kétilgenlik xewirini eng deslep ijtima'iy taratqularda ashkarilighan.

Xalmurat ependining 25-mart küni radiyomizgha bildürüshiche, u imamjan ibrahimning lagérgha élip kétilgenlik xewirini eng deslep chet'ellerdiki dostliri we kesipdashliridin uqqan iken.

Xalmurat ependining bayan qilishiche, u 2017-yili 4-ayning 18-küni imamjan ibrahimning wéchattiki “Dostlar chembiriki” din tuyuqsiz ghayib bolghanliqi heqqidiki uchurni alghan. Shuningdin kéyin u éniqlash arqiliq imamjan ibrahimning ürümchide tutqun qilinip, lagérgha élip kétilgenlikini bilgen iken.