Алмас низамидин түрмидики аяли билән назарәт астидики аписи һәққидә тохталди

Мухбиримиз меһрибан
2020-01-20
Елхәт
Пикир
Share
Принт
Алмас низамидин вә аяли бүзәйнәп абдурәшит.
Алмас низамидин вә аяли бүзәйнәп абдурәшит.
RFA/Mehriban

2020-Йили йеңи йил мәзгилидә австралийәдин туғқан йоқлап америкиға кәлгән алмас низамидин 17-январ күни радийомиз зияритини қобул қилди. У 2017-йили 3-айда тутқун қилинип 7 йиллиқ қамаққа һөкүм қилинған түрмидики аяли бузәйнәп абдуришит билән 2019-йили 9-айниң 15-күни лагердин қоюп берилгәнлик хәвири кәлгән аниси зулпийә җалалидин тоғрисида өзи игилигән бир қисим әһвалларни аңлатти.

Алмас низамидинниң билдүрүшичә, у 2019-йили қурбан һейт мәзгилидә аниси зулпийә ханим билән тунҗи қетим телефонда көрүшкән икән. Шундин у 2019-йили 12-айниң 25-күнигә қәдәр бирқанчә қетим аписи билән телефонда сөзлишиш пурситигә еришкән.

Әмма даириләрниң назарити астида чәтәлдики балилири билән телефонда сөзләшкән зулпийә ханим һәр қетимлиқ телефонда сөзләшкәндә балилирини «қалаймиқан йолларда маңмаслиққа, хитай компартийәсидин миннәтдар болушқа» үндигән. У телефонда өзиниң йәнә давамлиқ оқуйдиғанлиқини әскәрткән. Әмма саламәтлики һәққидә соралған соалларға җаваб бериштин өзини қачурған. Һәр қетимлиқ көрүшүштә телефонни амал бар тезрәк қоюветишкә алдириған. У йәнә балилириниң екранни ечип туруп сөзлишиш тәләплиригә җаваб бәрмигән. Бу хил аламәтләр униң австралийәдики оғли алмас низамидин вә униң америкадики башқа аилә әзалирида күчлүк әндишә пәйда қилған.

Алмас низамидинниң билдүрүшичә, хитай даирилири 2019-йили 11-айда австралийә ташқи ишлар министирлиқи арқилиқ униң аяли бузәйнәп һәққидики соаллириға җаваб қайтурған. Әмма униң аяли билән билән телефонда көрүшүш тәлипи рәт қилинған. Шу җүмлидин хитай даирилириниң униң аписи зулпийә җалалидинниң йеқинқи әһвали һәққидә һечқандақ инкас қайтурмаслиқи униң аписиға болған әнсиришини барғанчә күчәйтивәткән.

Алмас низамидин йәнә бултур 12-ай мәзгилидә америкадики фирқәт җәвдәтниң ғулҗадики аписи һәққидә «нйо-йорк вақти гезити» ниң мухбири тәрипидин ашкариланған әһвалларға қарап, өзидә аписиниң бундин кейинки ақивитиниң қандақ болушиға қарита күчлүк әндишә пәйда болғанлиқини әскәртип өтти.

Хитай даирилири 2019-йили 4-айда униң аяли бүзәйнәп абдуришит һәққидә униң аталмиш «топлишип җамаәт тәртипини бузуш җинайити» билән әйиплинип, 7 йиллиқ кесилгәнлики һәққидә австралийә һөкүмитигә җаваб бәргән икән. Алмасниң тәкитлишичә, бу хитай һөкүмитиниң австралийә тәрәпкә униң түрмидики аяли бузәйнәп һәққидә 2-қетим җаваб қайтуруши һесаблинидикән.

Зияритимиз ахирида алмас низамидин өзиниң бундин кейинму һәр хил қаналлар арқилиқ түрмидики аяли бузәйнәп абдуришит вә қаттиқ назарәт ичидә туруватқан аписи зулпийә ханимниң әһвалини давамлиқ сүрүштүридиғанлиқини билдүрди.

Алмас низамидин 2009-йилдики «5-июл үрүмчи вәқәси» дин кейин австралийәгә оқушқа чиққан вә кейинчә австралийә пуқралиқиға өткән. Униң аяли бузәйнәп абдуришит 2017-йили 3-айда вәтән зиярити мәзгилидә мисирда оқуғанлиқи үчүн тутқун қилинған. Бузәйнәп шу йили 7 йиллиқ қамаққа һөкүм қилинған. Аяли бүзәйнәп абдурешит тутқун қилинған 3 йилдин буян, алмас низамидин хәлқара кишилик һоқуқ тәшкилатлириға мураҗиәт қилиш, таратқуларда гуваһлиқ бериш, австралийә һөкүмити арқилиқ аяли бузәйнәпниң түрмидики вәзийитини сүрүштүрүш, 2018-йили январда лагерға елип кетилгән аписи зулпийә җалалидиннниң тәқдири һәққидә издиниш қатарлиқ паалийәтлирини давамлаштуруп кәлмәктә.

Пикирләр (0)
Share
Толуқ бәт