Мәһбус аял мунирә мәмтили чәтәллик алдида көз йеши қилғанлиқи үчүн аз дегәндә 3 йиллиқ кесилгән

Мухбиримиз шөһрәт һошур
2021-04-05
Share
Мәһбус аял мунирә мәмтили чәтәллик алдида көз йеши қилғанлиқи үчүн аз дегәндә 3 йиллиқ кесилгән Икки балиниң аниси 25 яшлиқ мунирә мәмтили вә ери ери ширәли мәмтили.
Photo: RFA

Биз өткән йилниң бешида, ғулҗа шәһәр хәнбиң йезисида таксичилиқ билән шуғуллиниватқан ширәли мәмтилиниң 16 йиллиқ, аниси айгүл турхаунниң болса 10 йиллиқ кесиветилгәнлики һәққидә хәвәр бәргән идуқ. Мәлум болушичә, ширәлиниң аилисидә икки балиси билән қеп қалған аяли мунирә мәмтили, бултур йил оттурида бир қирғизистанлиқ тиҗарәтчи аял билән параңлишиветип, көз йеши қилғанлиқи үчүн, дөләт мәхпийәтликини ашкарилаш билән әйибләнгән вә йил ахирида 3 йиллиқ кесиветилгән.

Ғулҗа вәзийитидин хәвәрдар кишиләрдин, бихәтәрликини нәзәрдә тутуп өз исмини ашкарилашни халимиған бириниң инкас қилишичә, бу йил 25 яшларда болған вә икки балиниң аниси болған мунирә мәмтили, өткән йили 6 ‏-айниң бешидики бир һәптиси кечидә бешиға қара халта кийдүрүлүп сақчиханиға әкетилгән. Әслидә мунирә, илгири радийомизда хәвири берилгән такиси ширәли мәмтилиниң аяли болуп, йолдиши ширәли униңдин бир йил аввал, қейнаниси айгүл турахун 6 ай аввал тутқун қилинип 16 вә 10 йиллиқтин кесиветилгәниди. Инкас қилинишичә, мунирә тутуп кетилип бир айдин кейин, сақчилар, мунирәниң хәнбиң йеңимәһәллидики адәмсиз қорусидин униң кийим-кечәклирини елип кәткән; буниңға қарап қошнилири мунирәниң қамақханидин лагерға яки түрмигә йөткәлгәнлик еһтималлиқини пәрәз қилишқан, әмма һечким, униң ақивити һәққидә гәп сорашқа петиналмиған. Йил ахириға кәлгәндә, униң аилә қорусиниң дәрвазисиға печәт селинған. Буниңға қарап қошнилар, мунирәниң кесилип кәткәнлик еһтималлиқини пәрәз қилишқан. Биз мунирә мәмтилиниң әһвалини ениқлаш үчүн хәнбиң сақчиханисиға қайтидин телефон қилдуқ. Хадимлар, илгирикигә охшашла, тутқунлар һәққидики соалимизға җаваб беришни рәт қилди.

Мунирә мәмтили вә ширәли мәмтилиниң икки пәрзәнти.

Вәзийәттин хәвәрдар кишиниң баян қилишичә, мунирә мәмтили тутқун қилиништин бир күн бурун ғулҗа шәһәр сақчи идарисигә берип шиху түрмисидә җаза муддитини өтәватқан йолдиши ширәли билән екранда көрүшүшни тәләп қилған вә тәлипи рәт қилинған. У шәһәрдин хәнбиңгә қарап өйигә қайтқинида қирғизистанлиқ бир тиҗарәтчи аял аптобуста янмуян олтуруп қалған. Қирғизистанлиқ тиҗарәтчи аял униң билән параңлишип олтуруп йолдишиниң кимликини сориған; мунирә бу соалға җаваб бәрмигән, әмма көз йешини туталмиған. Бу чағда аптобус шопури, чәтәллик меһманларниң кәйпиятини бузмаслиқ һәққидә мунирәни агаһландурған. Вәзийәттин хәвәрдар кишиниң әскәртишичә, мунирә аптобус шопуриниң паш қилиши билән сақчилар тәрипидин чақиртилған вә йолдишиниң тутқунда икәнликини чәтәлликләргә "устилиқ" билән билдүргәнлики үчүн, дөләт мәхпийәтликини ашкарилаш билән әйиблинип кесиветилгән.

Телефонимизни қобул қилған хәнбиң сақчихана хадими, мәзкур тәпсилат һәққидә мәлумат берәлмиди, әмма у мунирәниң тутулушиниң дөләт мәхпийәтликини ашкарилаш билән әйибләнгәнликини йошурмиди.

Инкаста мунирәниң дөләт мәхпийәтликини ашкарилаш билән әйиблинип 10 йиллиқ кесиветилгәнлики илгири сүрүлгән. Телефонимизни қобул қилған ғулҗа шәһиридики мәлум бир сақчи хадими мунирә мәмтилиниң 10йиллиқ әмәс, 3 йиллиқ кесилгәнликини тилға алди. У мунирәниң делосиниң тәпсилати һәққидә җаваб бәрмигән болсиму, әмма униң делосиниң чәтәллик бир саяһәтчи билән сөзләшкәнликигә алақидар икәнликини рәт қилмиди.

Илгирики ениқлашлиримизда, мунирәниң қейнаниси айгүл турахунниң байкөл түрмисидә җаза муддитини өтәватқанлиқи айдиңлашқаниди. Қолимиздики инкаста, мунирәниң ғулҗа шәһиридики байкөл яки йеңиһаят түрмисидә икәнлики пәризи оттуриға қоюлған.

Мәлум болушичә, мунирәниң хәнбиң йеңимәһәллидики дәрвазисиға печәт селиниш алдида, униң 4 вә 5 яшлиқ икки оғли, ғоҗа үчдәрвазида олтурушлуқ бовиси мәмәтәли абдурешитқа тапшурулған. Аилә бойичә түрмигә ташлинип дәрвазилириға печәт селиниш, уйғур илида йеқинқи 4 йилда көп учраватқан бир трагедийәлик әһвалдур. Шуңа өткән йиллири уйғур елини зиярәт қилған бәзи чәтәллик саяһәтчиләр қәшқәр вә турпанларда мәһәллиләрниң қуруқдилип қалғанлиқини, бәзи һойлиларниң дәрвазисиға қулуп селинип, үстидин печәтләнгәнликини байқиған вә бу байқашлирини торларда ашкарилиған иди.

Юқирида ғулҗида бир мәһбус аялиниң бир чәтәлликниң алдида көз йеши қилғанлиқи үчүн кесиветилгәнлики һәққидә мәлумат бәрдуқ.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт