Ғулҗадики шинхуа хәлқ дохтурханисиниң бир мәзгил лагер орнида ишлитилгәнлики ашкариланди

Мухбиримиз шөһрәт һошур
2020-04-28
Share
Ghulja-Sheher-Xinhua-Xelq-Doxturxanisi-lager.jpg Ғулҗа шәһәр шинхуа дохтурханисиниң тәрбйәләш мәркизи болуши қәйт қилинған нопус тизимлики.
Oqurmen teminligen

Хитай даирилири уйғур районидики аталмиш тәрбийиләш мәркәзлириниң җаза лагери әмәс, кәсип өгитиливатқан мәктәпләр икәнликини илгири сүрүп кәлгән болсиму, әмма та һазирға қәдәр бу аталмиш мәктәпләрниң омуми сани вә ениқ орни һәққидә мәлумат бәрмәй кәлгән иди. Ғулҗа шәһири вә униң әтрапида он нәччә орунда лагер қурулғанлиқи инкас қилинған болсиму, булардин пәқәт бир қанчисиниңла орни айдиңлашқан иди. Йеқинқи ениқлашлиримизда ғулҗа шәһиридики чоң дохтурханилардин шинхуа дохтурханисиниңму бир мәзгил лагер орнида ишлитилгәнлики айдиңлашти.

Өткән һәптә ғулҗа шәһәр хәнбиң йезисидики 15 йиллиқ кесиветилгән такси шопури ширәли мәмәтәли һәққидә елип барған ениқлашлиримиз давамида униң бир нопус тизимлики қолимизға чүшкән вә бу тизимликтә ширәлиниң бир мәзгил ғулҗа шәһәр шинхуа дохтурханиси тәрбийәләш мәркизидә турғанлиқи қәйт қилинған иди. Шуңа биз бу дохтурханиға телефон қилип, бу һәқтә ениқлаш елип бардуқ.

“бәйду” учур амбирида тонуштурулушичә, 832 нәпәр ишчи-хизмәтчиси бар болған бу дохтурхана ғулҗа шәһәр мәркизидики мәшһур җайлардин мәдрис әтрапиға җайлашқан. Қурулуш көлими 42066 квадрат метир (63 мо), йәни көләм җәһәттә ғулҗа шәһири бойичә алдинқи қатарда санилидиған бу дохтурхана 2017‏-йилиға кәлгәндә лагерға өзгәртилгән.

Вәзийәттин хәвәрдар кишиниң баян қилишичә, әйни чағда дохтурханидики бимарлар шәһәр сиртидики бир орунға йөткилип дохтурхана қору тамлириға тикәнлик симлар орунлаштурулған; дохтурхана ятақ деризилири төмүр қапқақлар билән қапланған. Телефонимизни қобул қилған дохтурханидики алақидар хадимлар бу дохтурхана қорусида нөвәттә бир “тәрбийәләш мәркизи” ниң бар яки йоқлуқи һәққидики соалимизға җаваб бериштин өзини қачурди.

Илгирики ениқлашлиримиз давамида ғулҗа шәһиридики партийә мәктәп, малийә мәктәп, ямачаң, електир истансиси, су дәрваза дохтурханиси, йеңи һаят түрмиси, байкөл түрмиси, боз түрмә вә йеңийәр түрмиси қатарлиқ орунларниң лагер орнида ишлитилгәнлики ашкариланған иди.

Мәһкум ширәлиниң мәзкур нопус тизимлики 2018‏-йили 11‏-айда турғузулған вә 2018‏-йили 3‏-айларда шинхуа дохтурханиси тәрбийәләш мәркизидә икәнлики қәйт қилинған. Телефонимизни қобул қилған йәнә бир хадим бу дохтурханиниң һазир яки бурун “тәрбийәләш мәркизи” орнида ишлитилгән яки ишлитилмигәнликини сориғинимизда, у өзиниң бундақ бир чоң иш һәққидә җаваб берәлмәйдиғанлиқини баян қилиш арқилиқ бу дохтурханиниң илгири лагер орнида ишлитилгәнликини чәткә қақмиди. У бу һәқтики алақидар соаллиримизға җавабән бу һәқтә мәмурий бөлүмдин мәлумат елишимизни тәвсийә қилди.

Вәзийәттин хәвәрдар киши бу дохтурханиниң көлиминиң зорлуқи вә бу ғулҗада 2017‏-йили қурулған лагерлардин пәқәт бири икәнликини тилға елип, ғулҗада шу йили лагерда тутулғанларниң саниниң пәвқуладдә зор икәнликини әскәртиду. У шинхуа дохтурханиси лагеридики тутқунларниң кейинки мәзгилләрдә йеңийәр түрмисигә йөткәп кетилгәнликини илгири сүриду.

Телефонимизни қобул қилған ғулҗа шәһиридики мәлум бир дохтурханиниң бир мәсул мәмури хадими 2018‏-йили бу дохтурханидики хадимларниң шинхуа дохтурханисидики “тәрбийәләш мәркизи” гә нөвәт билән вәзипә әвәтилгәнликини баян қилиш арқилиқ шинхуа дохтурханисиниң бир мәзгил лагер орнида ишлитилгәнликини дәлиллиди. Униң дейишичә, бу дохтурханиниң һәрқайси бөлүмидики хадимлар мәзкур “тәрбийәләш мәркизи” гә аз дегәндә 15 күндә бир қетим вәзипә өтәшкә әвәтилгән. Бу хадимниң баянлиридин әвәтилгән хадимларниң асаслиқи лагердики тутқунлар арисидики ағриқ-силақларни давалашқа мәсул болғанлиқи, лагердики тутқунлар арисида ағриқ-силақларниң көплүки сәвәбидин даириләрниң һәрқайси дохтурханилардин дохтур йөткәшкә мәҗбур болғанлиқи мәлум.

“бәйду” дики тонуштурушта бу дохтурханиниң 140 милйон йүәнлик муқим мүлки барлиқи, германийә, шивитсарийә вә американиң илғар давалаш үскүнилири барлиқи, җүмлидин американиң “GE айланма CT машиниси” барлиқи қәйт қилинған. Әмма аз дегәндә 2 йилчә җаза лагери орнида ишлитилгән бу дохтурханиниң илгири яки нөвәттә хәлқаралиқ хәйр-сахавәт орунлириниң ярдимигә еришкән яки еришмигәнлики мәлум әмәс.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт