Пәйзиватта зоһурлуқни тосуш үчүн байрақ чиқириш, таравини тосуш үчүн сиясий өгиниш орунлаштурулған

Мухбиримиз шөһрәт һошур
2020-05-15
Share
qizil-bayraq-qesem-berish.jpg Хитай һөкүмити хотәндә өткүзгән «террорлуқ» қа қарши қәсәмяд йиғинлириниң биридин көрүнүш.
Social Media

Мәлум болушичә, уйғур районида аһалиләр намаз оқуш вә диний аталғулар билән саламлишиштинму әндишә қилип туруватқан вәзийәт 3 йилдин буян давам қилип келиватқан болсиму, даириләр, бу йиллиқ рамзан мәзгилидә, аһалиләрниң роза ибадәтлирини чәкләш тәдбирини йәнила җиддий вә қаттиқ шәкилдә йолға қойған. Пәйзиваттики алақидар хадимларниң баян қилишичә, даириләр аһалиләрниң «сәһәрдә оғрилиқчә зоһурға қопушиниң алдини елиш үчүн байрақ чиқириш паалийити, кечисидә тарави оқушиниң алдини елиш үчүн кәчлик сиясий өгиниш» орунлаштурған.

Уйғур районида 2014 ‏-йилдин башлап йолға қоюлуп келиватқан әтигәндә байрақ чиқириш паалийити, хитайда таҗсиман вирус тарқалғандин кейин тохтитип қоюлғаниди. Мәлум болушичә, пәйзиват наһийәсидики даириләр бу йил рамзан мәзгилидә аһалиләрниң йошурунчә зоһурға қопушиниң алдини елиш үчүн, рамзан башлиништин бир һәптә аввал байрақ чиқириш паалийитини қайтидин әслигә кәлтүргән. Даириләр йәнә аһалиләрниң кәчтә йошурунчә тарава оқушиға пурсәт бәрмәслик үчүн, кәчлик сиясий өгиниш орунлаштурған. Һәрқайси кәнт ишханилирида ечилған сиясий өгиниш кәч саәт 9:30 билән 10:30 арисиға орунлаштурулған. Кәнт хадиминиң баян қилишичә, кәнттә көпинчә кишиләр «сиртта» болғачқа, һәр күни йиғинға пәқәт 200-250 чә киши қатнашқан. Бу йиғинда қизил тәшвиқатчи қурбан ниязниң йиллардин бери өзлүкидин һойлисида байрақ чиқириватқанлиқи һәққидики тәшвиқат филими көрситилгән.

Пәйзиваттики мәлум бир ашхана саһибиниң ашкарилишичә, униң ашханиси рамзан киргәндин кейин, илгирикигә қариғанда алдираш болған, содиси йүксәлгән. Бу ашхана саһибиниң баянлиридин мәлум болушичә, бу ашхана җайлашқан тәвәликтә аһалиләр рамзан мәзгилидә өстәң чепишқа селинған.

Биз бу тәдбирләр һәққидә йәниму тәпсилий мәлумат елиш үчүн алақидар сақчи орунлириға телефон қилдуқ. Бир сақчихана хадими, юқириқи тәдбирләрдин башқа, рамзан мәзгилидә йәнә коча чарлашниңму кечә-күндүз давам қиливатқанлиқи, бу чарлаш давамида тәвәликкә сирттин кәлгүчиләр бар-йоқлуқиға қаттиқ диққәт қиливатқанлиқини ашкарилиди.

Юқирида қәшқәр пәйзиватта рамзан мәзгилидә аһалиләрниң йошурунчә зоһурлуққа турушини тосуш үчүн байрақ чиқириш, тарави оқушини тосуш үчүн кәчлик сиясий өгиниш орунлаштурулғанлиқи һәққидә мәлумат бәрдуқ.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.