Сақчи хадими: тренер алимҗан махмут “сақаллиқ кишиләр билән мунасивәт қилғанлиқи” үчүн тутулди

Мухбиримиз шөһрәт һошур
2022.03.14
Share on WhatsApp
Share on WhatsApp
turme-siyasiy-mehbus.jpg Җинайәтчиләрни тутуп туруш мәркизиниң дәрвазиси. Йәрлик кишиләр ейтишичә, бу орун сиясий җинайәтчиләр үчүн ишлитилидикән. 2017-Йили 2-ноябир, корла.
AP

Норвегийәдики “уйғуряр” фонди елан қилған тутқундики мәшәл көтүргүчиләр тизимликидә қәшқәр тәнтәрбийә мәктипиниң оқутқучиси, тонулған валиболчи, дөләт дәриҗилик тренер алимҗан махмутниңму исми бар иди. Мухбиримизниң телефон зиярәтлири давамида, алақидар бир хадим алимҗан махмутниң “сақаллиқ кишиләр билән мунасивәт қилған” лиқи үчүн тутқун қилинғанлиқини ашкарилиди

Норвегийәдики “уйғуряр” фонди елан қилған “тутқундики мәшәл көтүргүчиләр” тизимликидә қәшқәрдин 8 кишиниң исми тилға елинған иди. Булар тәнһәркәтчиләрдин патигүл қадир, алимҗан махмут, ясинҗан авут, җумахун мәмәт, нурели мәмәтләрдин башқа йәнә дохтур абдуқейюм сәмәт билән әмәлдар адил абдуреһимниму өз ичигә алған иди. Бу тизимлик үстидики ениқлашлиримиз давамида, өткән һәптиләрдә адил абдуреһим билән абдуқейюм сәмәтниң тутқунда икәнлики дәлилләнгән иди. Бүгүн булардин тонулған валиболчи алимҗан махмут һәққидә мәлумат елиш үчүн, униң хизмәт орни болған қәшқәр вилайәтлик тәнтәрбийә мәктипигә телефон қилдуқ. Телефонимизни қобул қилған бир нөвәтчи хадим, уйғурчә соралған соаллиримизға хитайчә җавап берип, бу мәктәптә тутқун қилинған бир оқутқучи йоқ икәнликини илгири сүрди.

“уйғуряр” фондиниң йетәкчиси, паалийәтчи абдувәли аюпниң баян қилишичә, мәзкур мәктәптин тутқун қилинған аз дегәндә6 ‏-7 нәпәр оқутқучи бар болуп, булардин иккиси езизҗан вә езизқари исимлик икки нәпәр валибол оқутқучиси икән. Мәзкур мәктәптин телефонимизни қобул қилған йәнә бир хадим, тренер алимҗан махмутниң исимини тилға елишимиз билән, соаллиримизға җавап бериштин ваз кәчти.

Уйғур районида2017 ‏-йили башланған чоң тутқунда, йиллардин бери тутқунға сәвәб болуп кәлгән аталмиш “бөлгүнчилик” вә “диний әсәбийлик” аламәтлирдин башқа йәнә җәмийәттә бәлгилик иззәт-һөрмәткә игә болушму, һәрхил баһаниләр билән тутқунға сәвәб болған.

Абдувәли аюпниң баян қилишичә, тренер алимҗан махмут, тәнтәрбийә саһәсидики маһарити вә тәҗрибиси биләнла әмәс, бәлки йәнә тәрбийәлигән шагиртлириниң көплики вә сәрхиллиқи, шундақла иҗтимаий мунасәтләрдики актиплиқи биләнму җәмийәттә тонулған вә һөрмәт қазанған икән. 2017 ‏-Йилдики чоң тутқунда җәмийәттә мәлум тәсиргә игә кишиләрниң әң башта тутулғанлиқини әскәрткән абдувәли аюп, алимҗан махмутиниңму тутулушида, униң җәмийәттики тәсир күчиниң сәвәб болғанлиқини илгири сүрди.

Телефонимизни қобул қилған тәвәликитики сақчи хадими, тренер алимҗан махмутиниң тутқунда икәнлики билән бирликтә, униң тутулуш сәвәбиниму ашкарилиди. Мәлум болушичә, униң тутулушиға “сақақллиқ кишиләр билән мунасвивәт қилған” лиқи сәвәб болған икән.

Илгири күнәс наһийәсиниң аралтөпә йезисидики тутқунлар һәққидә елип барған ениқлашлиримиз давамида, мәзкур тәвәликтин бир түркүм тутқунларниң “чекити бар кишиләрдин телефон кәлгән” лики үчүн тутулғанғлиқи мәлум болған. Илгирики ениқлашлиримизда йәнә ғулҗадики атақлиқ чақчақчи розахунниңму “телефониға нуқтилиқ кишиләрдин телефон кәлгән” лики үчүн тутқун қилинип, бир мәзгилдин кейин қоюп берилгәнлики мәлум болған иди.

“уйғуряр” фондиниң “тутқундики мәшәлчиләр тзимлики” дә қәйт қилинишичә, тренер алимҗан махмут2017 ‏-йили тутқун қилинип, бир йилдин кейин 8 йиллиқ кесиветилгән, у нөвәттә ақсудики бир түрмидә җаза муддитини өтимәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.