Loptiki "Qanunsiz kitab" délosida qanat astigha alghuchining 7 yil, élin'ghuchining 4 yil késilgenliki delillendi

Muxbirimiz shöhret hoshur
2020-01-24
Share
qanunsiz-quran-kerim-yighiwelinghan.jpg Uyghur diyarida "Qanunsiz diniy buyumlar" namida yighiwélin'ghan "Qur'an kerim" we diniy kitablar.
Social Media

Aldinqi küni radiyomizda lop nahiyeside yüz bergen atalmish "Qanunsiz kitab" délosida sampul yézisining bashiliqi bilen birliksep kadirining "Jinayetchini qanat astigha élish" bilen eyiblinip 7 yilliqtin késilgenliki xewer qilin'ghan idi. Muhajirettiki lopluqlardin biri radiyomizgha uchur yollap, ene shu déloda atalmish "Qanat astigha élin'ghuchi" ning sampulning kelente kentidiki toxti rozi dégen kishi ikenlikini melum qildi. Muxbirimizning bu heqte yenimu ilgirilep élip barghan éniqlashliri dawamida toxti rozining shu déloda "Qanunsiz kitab saqlash" bilen eyiblinip oghli bilen birlikte 4 yilliqtin késilgenliki we nöwette jaza mudditini tügitip bolghanliqi ashkarilandi.

Hörmetlik radiyo anglighuchilar, 2015 ‏-yili lop nahiyesi sampul yézisining bashliqi ablikim mettursun bilen birliksep kadiri met'éziz mettoxtining 7 yilliq késilishige sewep bolghan atalmish "Jinayetchini qanat astigha élish délosi" da "Qanat astigha élin'ghuchi" ning kim ikenlikini aydinglashturush üchün loptiki alaqidar organlargha qaytidin téléfon qilduq. 

Lopluq muhajir radiyomizgha uchur yollap, kitab saqlighuchining toxti rozi dégen kishi ikenliki we sampulning kelente kentide olturushluq ikenlikini melum qilghandin kéyin biz sampul yéziliq saqchixanigha téléfon qilduq. Téléfonimizni qobul qilghan xadim toxti rozining sampulning kelente kentidin ikenlikini delillidi. Yene bir xadim toxti rozining oghli bilen birlikte nahiye bazirida bir kitab dukini barliqi, bu dukanda diniy kitablar bilen birlikte bir qisim hej sepirige alaqidar buyum we matériyallar sétilidighanliqini melum qildi.

Aldinqi küni sampul yézisining bashliqi bilen birliksep kadirining "Jinayetchini qanat astigha élish" bilen késilgenlikini ashkarilighan loptiki bir siyasiy-qanun kadiri u ikkisi atalmish "Qanat astigha alghan" kishining ismi toxti rozi ikenliki we mezkur déloda "Qanunsiz kitab saqlash" bilen eyiblinip oghli bilen birlikte 4 yilliqtin késilgenlikini delillidi. Bu xadimning bayanliridin melum bolushiche, bu ikkisimu mezkur ikki kadir bilen birlikte jaza mudditini kériye türmiside ötigen. Emma jaza mudditi ulardin yérim hesse az bolghachqa, jaza mudditini tamamlap qoyup bérilgen. 

Hörmetlik radiyo anglighuchilar, ilgiri xotenning ilchi yézisidin ehwal igilishimiz dawamida bu yézida eng éghir késilgen kishining abdujélil isimlik bir kent bashliqi ikenliki, uning yer asti mekteb achqan bir diniy zatni saqchigha melum qilmighanliqi üchün 17 yilliq késilgenliki, yer asti mektep achqan atalmish jinayetchining bolsa 4 yilliq késilgenliki melum bolghan idi. 

Shu chaghda ziyaritimizni qobul qilghan dunya Uyghur qurultiyining teshwiqat ishliri mes'uli perhat yorungqash ependi xitay da'irilirining atalmish "Qanat astigha alghuchi" ni "Qanat astigha élin'ghuchi" din nechche hesse artuq jazalash arqiliq Uyghurlar arisida öz'ara méhri-muhebbetni yoq qilishqa, buning ornigha öz'ar öch-adawet peyda qilishqa uruniwatqanliqini ilgiri sürgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.