Хитай консулханисидин икки уйғурға җавап: «бөлгүнчиләргә қетилғанлиқиң үчүн ата-анаң сениң билән сөзлишишни рәт қилди»

Мухбиримиз шөһрәт һошур
2020-02-14
Елхәт
Пикир
Share
Принт
Өмәр һәмдулла тутқундики аилә әзалири һәққидә гуваһлиқ бәрмәктә.
Өмәр һәмдулла тутқундики аилә әзалири һәққидә гуваһлиқ бәрмәктә.
Photo: RFA

Мәлум болушичә, тутқундики аилә-әзалири һәққидә ахбаратта гуваһлиқ бәргән истанбулдики икки уйғур муһаҗир бу һәптә хитай консулханисидин күтүлмигән бир телефон тапшрувалған. Телефонда буларға аилисиниң әһвали һәққидә мәлумат беридиғанлиқини ейтқан мәзкур хадим һәр икки муһаҗирға аилә әзалиридин бир қисминиң кесилип кәткәнликини рәсмий уқтурған. Андин түрмә сиртидики аилә-әзалириниң «улар чәтәлдә бөлгүнчилик билән шуғулланғанлиқи үчүн улар билән сөзлишишни рәт қилғанлиқи» ни ейтқан.

Һөрмәтлик радийо аңлиғучилар, түркийәдики уйғур муһаҗирлардин өмәр һәмдул билән җәвлан ширмәмәт йеқинда иҗтимаий ахбаратларда баянат елан қилип тутқундики аилә әзалири һәққидә гуваһлиқ бәргән иди. Уларниң баянатидики учурлар радийомиз вә башқа хәлқара таратқулар тәрипидин хәвәр қилинған иди. Баянат елан қилиштин аввал пүтүн соаллирини җавабсиз қалдурған истанбулдики хитай консулханиси йеқинда бу икки муһаҗирни өзликидин издәп, уларниң аилә әзалириниң әһвали һәққидә қисмән җавап бәргән. 

Бу икки муһаҗир радийомизға тәминлигән төвәндики аваз хатирисидин мәлум болушичә, консулхана хадими өмәр һәмдуллаға бәргән җавабида униң икки акиси, корладики роза һаҗи сода ширкитиниң вә чиланбағ сарийиниң саһиби рози һәмдулла билән муһәммәд һәмдулланиң кесилгәнлик учурини дәлилигән. Мәзкур хадим җәвлан ширмәмәткә бәргән җавабидиму униң аписиниң аталмиш «терорчи» ларға ярдәм бәргәнлики үчүн кесилип кәткәнликини уқтурған. Әмма уларниң җаза муддити һәққидә мәлумат бәрмигән. 

Консулхана хадими җәвлан ширмәмәткә дадиси вә инисиниң нөвәттә лагерда әмәсликини уқтуруш билән бирликтә униң «түркийә вә мисирда бөлгүнчилик паалийәтлиригә қетилғанлиқи үчүн ата-анисиниң униң билән сөзлишишни рәт қилғанлиқи» ни уқтурған. Җәвлан өзиниң мисирға берип бақмиғанлиқи, түркийәдиму оқуш вә тиҗарәттин башқа ишқа арилашмиғанлиқини билдүргәндә мәзкур хадим өзлириниң бу учурни дөләт ичидики алақидар хадимлардин игилигәнликини уқтурған. 

Җәвлан ширмәмәт билән өмәр һәмдулла консулхана хадимидин телефон тапшуриверилиш җәряни һәққидә тәпсилий мәлумат бәрди.

Өмәр һәмдул сөһбитимиз давамида бир ата-ананиниң өз пәрзәнти билән сөзлишишни рәт қилишниң мумкин әмәслики, буниң инсан тәбиитигә уйғун әмәсликини тәкитләш билән бирликтә хитай тәрәпниң өзлириниң еғизини тувақлаш үчүн тәһдит арилаш учур йәткүзиватқанлиқини илгири сүрди. Җәвлан ширмәмәт әгәр дадиси билән инисиниң өзи билән сөзлишишни рәт қилғанлиқи раст болса, буниң бир халимаслиқ яки қаршилиқтин әмәс, бәлки вәһимидин икәнкликини, уларниң лагердики мәзгилдә илгири өзи билән телефонда сөзләшкәнлики үчүн еғир тән җазасиға учриғанлиқ еһтималлиқини оттуриға қойди. У йәнә дадисиниң саламәтлик әһвали өзи билән сөзләшкүдәк дәриҗидә болмиғанлиқи үчүн даириләрниң бу ялғанни тоқуп чиққанлиқ еһтималлиқиниму тилға алди. 

Һәр икки муһаҗир хитай консулханисиниң тәһдитигә пәрва қилмайдиғанлиқи, аилә әзалири вә лагердикиләр әркинликкә еришмигүчә бу зулумни дуняға паш қилишни тохтатмайдиғанлиқини билдүрди.

Пикирләр (0)
Share
Толуқ бәт