Корона вируси тунҗи қетим бир уйғурниң җениға замин болди

Ихтиярий мухбиримиз әркин тарим
2020-04-09
Share
ghoja-abdulla-virus.jpg Хитайниң вухән шәһиридин хитайға ямриған корона вируси җениға замин болған ғоҗа абдулла әпәнди дохтурханида қутулдуруливатқан көрүнүш. 2020-Йили апрел, түркийә.
RFA/Erkin Tarim

Буниңдин 4 ай бурун хитайниң вухән шәһиридә оттуриға чиққандин кейинки 4 ай ичидә пүтүн дуняға тезла ямриған корона вируси ғоҗа абдулла исимлик бир уйғурниң җениға замин болди.

Уйғур дияриниң хотән вилайитидин 1995-йили, истанбулға келип йәрлишип қалған уйғур муһаҗирлардин ғоҗа абдулла дүшәнбә күни истанбул малтәпә медикал парк дохтурханисида ятқан болуп, 9-апрел күни чүшкә йеқин давалаш үнүм бәрмәй аләмдин өткән. Униң йеқин туғқини абликим қарақаш әпәндиниң ейтишичә, у 8-март күни қуруқ йөтилишкә башлиған вә 26-март күни истанбул бақиркөйдики дөләт дохтурханисида давалинишқа башлиған икән. 4 Пәрзәнтниң атиси болған ғоҗа абдулла әпәнди әмдила 55 яшқа киргән болуп, топтин көк-тат елип-сетиш тиҗарити билән шуғуллинидикән. Биз игилигән мәлуматқа асасланғанда 9-апрел күни мәрһумни аилисидикиләр вә дәпнә ишлири идарисиниң хизмәтчилири бирликтә истанбулда дәпнә қилидикән.

Биз мәрһум ғоҗа абдулла әпәндиниң корона вируси билән юқумлиниш әһвали тоғрисида мәлумат игиләш үчүн униң түркийәдики әң йеқин туғқини абликим қарақаш әпәнди билән телефон сөһбити елип бардуқ. У, ғоҗа абдулла әпәндиниң корона вируси билән юқумлинишиниң аламәтлириниң қаттиқ йөтилиш вә тоңуш билән оттуриға чиққанлиқини, буниңдин 1 ай бурун бу әһвал көрүлгән болсиму, лекин икки һәптигичә дохтурханиға бармиғанлиқини, дора йәп ишқа беривәргәнликтин баян қилди.

Абликим қарақаш әпәндиниң ейтишичә, ғоҗа абдулла әпәнди бундин 15 күн бурун истанбулдики бақиркөй дөләт дохтурханисиға барған болсиму, 3 күнгичә униң корона вирусидин юқумланғанлиқи җәзмләштүрүлмигән. У, еғирлашқандин кейин дохтурлар уни корона вируси бимари дәп давалашқа башлиған. Абликим қарақаш әпәнди бу һәқтә тохталди.

Абликим қарақаш әпәнди, баҗиси ғоҗа абдулла әпәндиниң аяли мәғпирәт ханим билән уларниң 4 балисиниңму юқумланғанлиқиниму баян қилди.

Биз ғоҗа абдулла әпәндиниң аяли мәғпирәт ханимғиму телефон қилдуқ. У, корона вирусидин юқумланғанлар көп болғачқа дохтурханида йәр тепилмай өйидә карантин астида икәнликини, дохтур йезип бәргән дорини йәп йетиватқанлиқини баян қилди.

Ғоҗа абдулла әпәнди истанбул бақиркөй дөләт дохтурханисида 11 күн даваланғандин кейин, 6-апрел кечиси кесили еғирлишип, дохтурхана уни истанбул малтәпә медикал парк дохтурханисидики җиддий қутқузуш бөлүмигә йөткигән. Давалаш үнүм бәрмәй 9-апрел күни әтигән саәт 10да аләмдин өткән. Абликим қарақаш әпәнди бу җәрян тоғрисида мәлумат бәрди.

Бу һәқтә шәрқий түркистан тәшкилатлар бирлики рәиси һидайәтулла оғузхан әпәнди хитайдин кәлгән бу вирусниң тунҗи қетим чәтәлдики бир уйғурниң җениға замин болғанлиқини, бу санниң бирла болуп қелиши үчүн уйғурларниң түркийәниң "өйүңдә олтур" чақириқиға актип аваз қошуши керәкликини тәкитлиди.

Түркийә-11, марттин башлап чеграларни тақап, бу дөләткә кирип-чиққучиларни тәкшүрүшни омумйүзлүк күчәйтишкә башлиғаниди. Түркийә мәктәпләрни, түрлүк иҗтимаий, мәдәний, тәнтәрбийә кулублирини бирдәк тақиди. 2020-Йили өткүзүш пиланланған нурғунлиған хәлқаралиқ йиғинларни, түрлүк мусабиқиләрни бирдәк әмәлдин қалдурди. Арқидинла 65 яштин юқирилар билән 20 яштин кичик болғанларниң кочиға чиқишиниму чәклиди. Түркийәдә корона вирусидин өлгәнләрниң сани908, корона вирусидин юқумланғанларниң сани 42 миң 282гә йәткән. Ғоҗа абдулла әпәнди дуняда корона вирусидин өлгән тунҗи уйғур болуп, истанбулда юқумланған уйғурларниң сани 10 әтрапида икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт