Мазар йезисида вухәндин кәлгән 5 киши барлиқи, улардин бириниң юқум гумандари аилисигә қошна икәнлики ашкариланди

Мухбиримиз шөһрәт һошур
2020-03-02
Елхәт
Пикир
Share
Принт
Хитай дохтур вә сақчиларниң аилиләргә берип вирус юқумини тәкшүрүватқан көрүнүш. 2020-19-Феврал, алтай.
Хитай дохтур вә сақчиларниң аилиләргә берип вирус юқумини тәкшүрүватқан көрүнүш. 2020-19-Феврал, алтай.
AFP

Ғулҗа наһийәсиниң мазар йезисида бир аилә кишилириниң корона вируси гумани билән дохтурханида ятқузулуп карантинға елинғанлиқи һәққидики хәвәрлиримиз берилгәндин кейин аңлиғучилиримиздин бири радийомизға учур йоллап, «юқум гумандари» дәп бекитилгән аилиниң там қошниси вухәндин тәтил қилип кәлгән бир оқуғучи икәнликини ашкарилиди. Униң мәлум қилишичә, ғулҗа наһийәсидә тарқалған җәмийәт хәвәрлиридә вирусниң мәзкур аилигә вухәндин кәлгән шу оқуғучидин юққанлиқи илгири сүрүлгән. Ениқлашлиримиз давамида гумандар аилиниң ян қошнисиниң вухән университети игилик башқуруш факултетиниң2 ‏-йиллиқ оқуғучиси икәнлики айдиңлашти. Әмма мәзкур оқуғучи билән гумандар аилә өзлириниң бир йилдин буян кириш-чиқиш қилишмиған қошнилар икәнликини баян қилип өзара вирус юққан яки юқтурғанлиқ еһтималлиқини инкар қилди

Аңлиғучилиримиздин бириниң инкас қилишичә, ғулҗа наһийәсиниң мазар, дөңмазар вә қаш йезилирида көп санда аһалиләрниң өйлириниң печәтлиниши һәмдә бир түркүм аһалиләрниң дохтурхана вә карантиниға йөткилиши давамида ғулҗа наһийәсидики җәмийәт хәвәрлиридә мазар йезисида 78 яшлиқ бир бовайға вухәндин қайтип кәлгән бир оқуғучи тәрипидин вирус юққанлиқи һәққидә гәп тарқалған. Бу гәп-сөзләр торлардиму тарқилишқа башлиғандин кейин алақидар органлар бу учурларниң сәлбий тәсири, йәни муқимлиққа тәсир көрситип қелишиниң алдини елиш үчүн мәзкур учурларни тордин юювәткән.

Бу һәқтә елип барған телефон зиярәтлиримиз давамида юқум гумандарлири байқалған мазар йезисиниң шех мәһәллисидә вухәндин қайтип кәлгән бир оқуғучиниң барлиқи вә униң ғулҗа шәһиридә карантин астида давалиниватқан пәхирдин хелил ака билән қошна икәнлики айдиңлашти. Пәхирдин ака бу қошниси билән арилиридики мәлум бир аразичилиқ сәвәбидин бир йилдин буян кириш-чиқиш қилмайватқанлиқи, у мәктәптин қайтип кәлгәндин буян учришип бақмиғанлиқини мәлум қилди.

Өзиниң вухән университетиниң игилик башқуруш факултетида оқуйдиғанлиқини баян қилған мәзкур оқуғучиму өзидә һазирға қәдәр һечқандақ кесәл аламити байқалмиғанлиқини вә сағламлиқини тилға елип өзидин қошнисиға вирус юқти дейилгән бу җәмийәт хәвәрлириниң асассиз икәнликини илгири сүрди. У бу йезида вухәндин кәлгәнләрниң ялғуз өзи әмәслики, җәмий 5 киши барлиқини баян қилди.

Хәлқара ахбаратлардики анализларда дейилишичә, таҗсиман вирусни әң дәсләптә байқиған вә кишиләрни агаһландурған 8 нәпәр сәһийә хадими әйни чағда өсәк сөз тарқитиш билән әйиблинип җазаланғанлиқи үчүн нөвәттә хитай даирилириниң таҗсиман вирус һәққидики һәрқандақ бир учури җәмийәттә гуман билән қаралмақта. Ғулҗа наһийәсиниң мазар йезисида корона вируси юқуми гумандари байқалғанлиқи вә бу сәвәблик ғулҗа наһийәсидә көп санда өйләргә печәт селинғанлиқи һәмдә аһалиләрниң карантин астиға елинғанлиқи җәмийәттә кәң ашкариланған болсиму, әмма һөкүмәт ахбаратлирида бу наһийәдә пәйда болған бу патипарақчилиқниң сәвәби, юқум гуманиниң тоғра болуп чиққан яки чиқмиғанлиқи, тоғра болған болса бу юқумниң кимдин вә қандақ юққанлиқи һәққидә һеч қандақ учур берилмиди.

Пикирләр (0)
Share
Толуқ бәт