«Вухән вируси» ниң вәһимиси қаплиған уйғур диярида муқимлиқ вә юқумлиништин мудапийәлиниш тәкитләнмәктә

Мухбиримиз меһрибан
2020-01-24
Елхәт
Пикир
Share
Принт
Вухәндики җинйинтиан дохтурханисиға тошуп келингән «вухән вируси» билән юқумланғанлар. 2020-Йили 21-январ. Вухән.
Вухәндики җинйинтиан дохтурханисиға тошуп келингән «вухән вируси» билән юқумланғанлар. 2020-Йили 21-январ. Вухән.
Social Media

2019-Йили 12-декабир байқалғанлиқи ениқланған «вухән вируси», йәни таҗисиман өпкә яллуғи вируси билән юқумлиниш әһвали хитайниң чаған мәзгилидә шиддәт билән кеңәйгән. Хитайлар 2020-йиллиқ чағанни вәһимилик кәйпиятта күтүвалған.

24-январдики хәвәридин мәлум болушичә, хитайда юқум әһвали еғир болған 10 нәччә шәһәр қамал қилинған. 24-январғичә мәзкур вирустин юқумлиниш хитайдики 9 өлкигә кеңийип, 26 адәм «вухән вируси» билән юқумлинип өлгән.

Җүмлидин милйонлиған уйғурларлар лагерларға соланған, хитайлаштуруш қәдими шиддәт билән күчийиватқан уйғур дияриму бу йиллиқ чағанни «вухән вируси» дин юқумлиниш вәһимиси кәлтүрүп чиқарған қорқунучлуқ кәйпиятта күтивалған.

Уйғур аптонум районлуқ даириләр 24-январ йиғин ечип, бу йиллиқ чаған мәзгилидә һәм «вухән вируси» дин юқумлиништин мудапийәлиниш һәм районниң муқимлиқини сақлашни тәкитлигән.

23-январ күни уйғур аптонум районидиму вухәндин кәлгән икки нәпәр хитай кадириниң «вухән вируси» дин юқумланғанлиқ хәвири ашкариланған. 

24-январдин башлап уйғур аптоном районидики җамаәт кәйпиятида җиддийчиликләр көрүлүшкә башлиған. Даириләрму мәзкур юқумлуқ кесәл һәққидә җәмийәттә вәһимә пәйда қилидиған хәвәрләрниң тарқилишини контрол қилиш, райондики муқимлиққа капаләтлик қилиш һәққидә уқтуруш чиқарған.

«Тәңритағ тори» да 24-январ елан қилинған «аптоном район йеңи типтики таҗсиман вирус билән юқумланған өпкә яллуғи юқуминиң алдини елиш-тизгинләш телевизийә-телефон йиғини ачти» сәрләвһәлик хәвәрдә «вухән вируси» дин юқумлинишниң алдини елиш билән бирликтә һәрқайси җайларниң җәмийәт муқимлиқиға капаләтлик қилишни техиму чиң тутушни тәкитлигәнлики баян қилинған.

Пүткүл хитай миқясида «вухән вируси» дин юқумлиниш вәһимиси әвҗ елип, җайларда мәзкур вирустин юқумлиниш тәдбирлирини күчәйтиш тәкитлиниватқан бир вақитта уйғур аптонум районлуқ даириләрниң «вухән вируси» дин юқумлинишниң алдини елиш билән бир вақитта районниң муқимлиқиға капаләтлик қилишни тәкитлиши көзәткүчиләрниң җиддий диққитини қозғиди. 

Дуня уйғур қурултийиниң баянатчиси дилшат ришит хитайда тарқалған «вухән вируси» дин юқумлиниш вәһимиси пүткүл хитай вә хәлқарада диққәт нуқтиси болуватқан, инсанларниң һаяти тәһдит астида туруватқан шараитта уйғур аптонум район даириләрниң «кишиләрдики вәһимилик кәйпиятниң алдини елип, районда һәрқандақ муқимсизлиқ амиллириниң йүз беришиниң алдини елиш» ни тәкитлиши «хәлқниң һаятиға қарита еғир мәсулийәтсизлик вә әң әқәллий инсанлиқ өлчиминиң дәпсәндә қилинишидур,» деди. 

Дилшат ришит йәнә мундақ деди: «хитай даирилириниң 2017-йилидин кейин райондики уйғур қатарлиқ йәрлик хәлқләргә хитайларниң чаған байримиға охшаш хитай байрамлирини өткүзүшкә мәҗбурлаш қилмиши барғанчә әвҗ алди. Ислам диниға етиқад қилидиған уйғурларниң әслидики диний вә милли байрамлири чәклинип, районда нәччә милйонлиған йәрлик хәлқ лагерларға қамилип, милли қирғинчилиққа учраш билән бирликтә йәнә мәдәнийәт қирғинчилиқиму учримақта.»

Пикирләр (0)
Share
Толуқ бәт