Хитай ахбаратлири корона вируси бимарлириниң сақийиватқанлиқини тәшвиқ қилмақта

Мухбиримиз җүмә
2020-03-01
Share
xelq-tori-korona-doxturdin-chiqish.png Хитай “хәлқ” ториниң корона вируси билән ятаққа елинған бимарларниң сақийип чиқиватқанлиқи һәққидики тәшвиқати. 2020-Йили 1-март.
Photo: RFA

Корона вируси билән қаза қиливатқанлар һәр қайси әлләрдә көрүлүватқан пәйтләрдә, хитайниң йәрлик ахбаратлири, болупму уйғур елидики һөкүмәт ахбаратлири район тәвәсидә корона вируси билән ятаққа елинған бимарларниң сақийип чиқиватқанлиқини тәшвиқ қилмақта.

Хитай “хәлқ” ториниң 1-марттики хәвиригә қариғанда, 29-феврал әтигән саәт 0 гичә болған арилиқта уйғур елидә бирму йеңи юқумдар байқалмиған. 

Сақийип дохтурханидин чиққанлар сани 10 ға йәткән. Буларниң бир нәпири үрүмчидә, 6 нәпири илида, 3 нәпири биңтуәнгә тәвә районларда икән.

Пүтүн аптоном район миқясида корона вирус билән юқумлинип һазирғичә ятаққа елинғанлар җәмий 76 нәпәр икән.

Йәкшәнбә күндики мәлуматларға қариғанда, уйғур райони бойичә корона вируси юқум гумани билән көзитиш астиға елинғанлар 3 миң 432 нәпәр икән. Униңдин башқа район миқясида һазирға кәлгүчә җәмий 62 юқумдар сақийип дохтурханидин чиққан, 3 адәм һаятидин айрилған. 

Һалбуки, “тәңритағ” тори 17-февралдики бир хәвиридә юқумлиниш гумани билән көзитиш астиға елинған кишиләр сани 5 миң 245 нәпәр, дәп елан қилған иди.

Даириләр өткән 10 нәччә күндин буян юқум гумани билән көзитиш астида туруватқанларниң омумий санини хәвәр қилишни тохтатқан болсиму, бу санниң қисқа вақит ичидә бир динла 2 миңға йеқин кемийиши диққәт қозғимақта.

Хитай ахбаратлириға қариғанда, уйғур районида юқумланғучилар қәшқәр, хотән вә атуш қатарлиқ уйғурлар әң зич олтурақлашқан районларда байқалмиған. 

Бу вирус иран, италийә, вә һәтта медитсинаси әң тәрәққий қилған әлләрдин америка, японийә вә җәнубий корейәдиму бәзи юқумдарларниң җениға замин болуватқан шараитта хитайниң қайси хил усуллар билән шунчә көп адәмни давалап сақайтиватқанлиқи һазирчә намәлум.

Шәнбә күни америка, австралийә вә тайланд қатарлиқ әлләрдә аз дегәндә бирдин корона вируси юқумдариниң қутқузуш үнүм бәрмәй өлүп кәткәнлики хәвәр қилинған.

Йәкшәнбә күни йәнә пәқәт италийәдила 8 адәм бу вируста қаза қилған вә қаза қилғучиларниң сани 34 кә йәткән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт