Métin qilich: Uyghurlar özliri yashawatqan ellerde zor töhpe qoshmaqta

Ixtiyariy muxbirimiz firuze
2017-11-23
Élxet
Pikir
Share
Print
Türkiye jumhuriyitining qirghizistanda turushluq bash elchisi métin qilich ependi(solda) qirghizistan Uyghur "Ittipaq" jem'iyitining re'isi artiq hajiyéf ependi bilen. 2017-Yili noyabir, bishkek.
Türkiye jumhuriyitining qirghizistanda turushluq bash elchisi métin qilich ependi(solda) qirghizistan Uyghur "Ittipaq" jem'iyitining re'isi artiq hajiyéf ependi bilen. 2017-Yili noyabir, bishkek.
RFA/Firuze

Türkiye jumhuriyitining qirghizistanda turushluq bash elchisi métin qilich ependi, türk milletlerning hemkarliq we tereqqiyat idarisining bash meslihetchisi kamil qollabash qatarliq kishiler qirghizistan Uyghurlirining "Ittipaq" jem'iyitini ziyaret qilip, Uyghur xelqi toghrisida issiq nutuqlarni izhar qilishti.

Mezkur murasimda métin qilich ependi nöwettiki Uyghur weziyiti heqqide sözlep, Uyghurlar özliri yashawatqan döletlerde sadiq wetendashlar bolup, her qaysi jehetlerdin zor töhpilerni qoshup kéliwatqanliqini otturigha qoydi.

"Uyghurlar nahayiti epsus bügünki künlerde yurtidiki weziyetning qiyinliqidin her qaysi döletlerge tarqilip kétiptu, Uyghurlar özliri yashawatqan döletlerge sadiq wetendashlar bolup turmaqta. Ular siyasiy, iqtisadiy we medeniyet jehetlerde zor töhpilerni qoshmaqta. Uyghurlar qedimiy tarixqa ige bir millet bolghachqa bügünmu özliri turuwatqan döletlerning medeniyitige zor töhpilerni qoshuwatqanliqini öz közüm bilen kördüm. "

"Ittipaq" jem'iyitining re'isi artiq hajiyéf türkiye jumhuriyiti we bash elchi métin qilich ependige körsetken yardemliri üchün rehmet éytti. Arqidin bash elchige Uyghurlarning en'eniwi milliy toni, doppa we "Éhsan" médali teqdim qildi.

"Éhsan" médali qirghizistan Uyghurlirining "Ittipaq" jem'iyitining teshebbuskaliqida tesis qilin'ghan médal bolup, qirghizistan dölitige xizmet körsetken Uyghurlargha we Uyghur xelqining tereqqiyatigha töhpilerni qoshqan shexslerge tarqitilidu. Ziyaritimizni qobul qilghan kamiljan niyazof, "Éhsan" médalining ilgiri kimlerge bérilgenliki we néme sewebtin türkiye elchisige teqdim qiliniwatqanliqi heqqide öz qarashlirini izhar qildi.

Biz yene aqsaqallar kéngishining re'isi ababekri xatibaqiyéfni ziyaret qilduq. U sözide métin qilich ependining qirghizistandiki Uyghur jama'itige qilghan yardemlirige rehmet éytti.

Mezkur pa'aliyetke qatnashqan türkiye jumhuriyiti tashqi türkler hemkarliq we tereqqiyat idarisining bash meslihetchisi kamil qollabash ependi bügünki künde Uyghurlar duch kéliwatqan qiyinchiliqlar heqqide söz qilip, Uyghur xelqining türk xelqige qérindash xelq ikenlikini türkiye jumhuriyitining mumkinchilik bolghan teqdirde Uyghurlargha yardem qilidighanliqini bildürdi.

Métin qilich 2012-yilidin buyan türkiyening qirghizistandiki bash elchilik wezipisini ötep kelgen bolup, bu yil uning xizmet mudditi toshqan. Ötken 4 yil jeryanida u qirghizistandiki köpligen maddiy we meniwi yardemlerni körsetken idi. U axirida söz qilip, qirghizistandiki Uyghur xelqining méhmandostluqini untumaydighanliqini we bu dostluqni türkiyede dawamlashturidighanliqini izhar qildi.

Toluq bet