Gérmaniyediki türk jama'iti jaza lagérlirigha qarshi namayish ötküzdi

Ixtiyariy muxbirimiz ekrem
2018-12-31
Élxet
Pikir
Share
Print
Gérmaniyening nürnberg shehiride ötküzülgen namayishtin bir körünüsh. 2018-Yili 29 - dékabir. Nürnberg, gérmaniye.
Gérmaniyening nürnberg shehiride ötküzülgen namayishtin bir körünüsh. 2018-Yili 29 - dékabir. Nürnberg, gérmaniye.
RFA/Ekrem

29-Dékabir gérmaniyening nürénbérg shehiridiki türk jama'iti özlükidin qozghilip, xitayning Uyghur diyaridiki jaza lagérlirigha we rayondiki insan qélipidin chiqqan basturush siyasetlirige qarshi naraziliq namayishi élip bardi. 21-Dékabir küni bérlindiki "Alp'eren ojaqliri" dep atalghan türk teshkilatimu özlükidin namayish uyushturup, xitayning Uyghurlar üstidin yürgüzüwatqan zulum siyasetlirige qarita naraziliqlirini bildürgen idi.

Nürénbérg shehiride ötküzülgen 29-dékabirdiki namayishqa gérmaniyening herqaysi sheherliride yashaydighan bir qisim Uyghurlarmu uzun musapilarni bésip kélip qatnashqan. Namayishchilarning lozunkiliri we türlük wiwiskilirigha "Irqiy qirghinchiliq toxtitilsun! jaza lagérliri emeldin qaldurulsun! Uyghurlargha erkinlik! xitay térrorist!" dégendek türlük sho'arlar yézilghan. 

Namayish meydanida söz qilghan d u q ning yawropadiki wekili esqerjan ependi xitayning Uyghur diyarida tipik bir irqiy we medeniyet qirghinchiliqi yürgüzüwatqanliqini anglatqan. 

Bu namayishqa myunxén shehiridin bérip qatnashqan "Yawropa sherqiy türkistan birliki" ning re'isi, d u q diniy ishlar komitétining mudiri we "Sherqiy türkistan ölimalar birliki" ning ezasi turghunjan alawudun ependi namayish heqqide toxtalghanda türkler, ezerbeyjanliqlar, türkmenler qatarliq türkiy milletler we yerlik xelqlerningmu bu septe ortaq bolghanliqini tilgha aldi.

D u q ning yawropadiki mes'ul wekili esqerjan ependi namayish heqqide melumat bérip, bu namayishning bügün gérmaniyediki tesiri zor gézitlerdin orun alghanliqini tekitlidi.

Jama'et erbabi, myunxéndiki chonglar meshripining qazisi ablimit tursun ependi bu qétimqi namayish toghrisida toxtalghanda, köp millet, köp xil sho'ar we köp xil bayraqlar bilen ötküzülgen bu namayishning nahayiti tesirlik, hayajanliq bolghanliqini eskertti.

Uyghur diyaridiki jaza lagérliri mesilisi yéqindin buyan gherb ellirining küchlük diqqitini qozghapla qalmay, bir qisim musulman elliridiki jama'etningmu inkaslirini qozghimaqta. Islam dunyasi hökümetlirining izchil süküt qilishlirigha qarshi halda aldinqi heptiler bangladésh, malayshiya, hindonéziye we türkiyediki ammiwi teshkilatlar özlükidin namayishlar uyushturup xitaygha bolghan ghezeplirini we Uyghurlargha bolghan hésdashliqlirini ipade qilishqan idi. 

Közetküchiler 2019-yili dunya miqyasida islam we türk ellirining xitaygha qarshi zor kölemlerde qozghilish éhtimali barliqini ilgiri sürmekte.

Toluq bet