Qirghizistandiki yash chélishchi rustem rehmitulla sherep quchti

Ixtiyariy muxbirimiz azad
2015.12.18
qirghizistan-uyghur-rustem-rehmitulla-chilishish-tenterbiye-iran-musabiqe.jpg Yash chélishchi rustem rehmitulla
Photo: RFA


Bu yil öktebir éyining 28 - , 29 - künliri iran paytexti téhranda ötküzülgen “Girik - rim” türi boyiche xelq'araliq yashlar chélishish musabiqiside qirghizistan komandisi omumi numur boyiche birinchilikke érishken.

Bu qétimqi musabiqige qirghizistandin sekkiz mahir qatnashqan bolup, bularning ichide 18 yashliq Uyghur yigiti rustem rehmitulla 74 kilogiramliqlar boyiche ikkinchilikke ériship kümüsh midal bilen mukapatlan'ghan.

Rustem rehmitulla bishkektiki “Bürküt” tenterbiye kulubining ezasi bolup, bu tenterbiye kulubini Uyghur karxanichi sidiqjan yüsüpghuja ependi 2003 - yili qurghan idi.

Qirghizistan komandisining bash meshqawuli perhad hoshur ependi bu yil téhranda ötküzülgen xelq'araliq yashlar chélishish musabiqisi heqqide toxtilip mundaq didi: “Bu yilqi xelq'araliq musabiqide bizning qirghizistan komandisi birinchilikke érishti. Komandimizning ezasi rustem rehmitulla musabiqide üch mahirni yengdi. U 2014 - yili taylandta ötküzülgen chélishish musabiqide 69 kilogramliqlar boyiche asiya chimpiyoni bolghan. Eger rustem öz talantini jari qildurup téximu tirishchanliq körsetse, kelgüside dunyawiy musabiqilerge qatniship yaxshi netijilerge érishidu dep qaraymen.”

Rustem rehmitulla sekkiz yéshidin tartipla “Bürküt” tenterbiye kulubida chéniqishni bashlighan bolup, uning atisi sabit ependi kulubtiki ustazlarning kespi jehette qattiq telep qoyup terbiyelishi netijiside oghlining on yildin buyan yaman emes netijilerge érishkenliki hemde oghlidin kütidighan ümidliri heqqide munularni bildürdi: “Men oghlumni kelgüside yaramliq bir tenherketchi bolsun dep sekkiz yéshida mushu kulubqa élip kelgen idim. On yildin buyan ustazlirining terbiyelishi bilen xéli yaxshi netijilerge érishti. Men uning yenimu tiriship téximu zor utuqlargha érishishini ümid qilimen.”

“Bürküt”tenterbiye kulubining qurghuchisi sidiqjan ependi mushundaq bir tenterbiye kulubi qurushtiki oy - meqsetliri hemde kelgüsidiki ish - pilanliri heqqide toxtilip mundaq didi: “Men yashlirimizni yaman yollargha kirip ketmisun dep bu kulubni qurghan. Kulubimizda qirghizistandiki musabiqilerde chimpiyon bolghanlar we asiya chimpiyoni bolghanlar bar. Rustem rehmitulla 2013 - yili mongghuliyede bolghan musabiqide 64 kilogiramliqlar boyiche asiya chimpiyoni bolghan. Hazir biz yashlirimizni qattiq meshiq qildurup, 2016 - yili biraziliyede ötküzülidighan xelq'araliq olimpik musabiqisige qatnishish üchün teyyarliniwatimiz.”

Yéqinqi yillardin buyan “Ittipaq” jem'iyitining teshebbusi we uyushturushi hemde Uyghur jama'itining zor küch bilen qollap - quwetlishi, milletperwer tijaretchi, sodigerlerning iqtisadi jehette yar - yülek bolushi netijiside, Uyghur yashliri arisida tenterbiyening her qaysi türliri boyiche köpligen munewwer tenheriketchiler yétiship chiqti. Nöwette qirghizistandiki putbol, boks, gimnastika, chélishish qatarliq her türlük tenterbiye kulublirigha eza bolghan Uyghur yashlarning sani nechche yüzge yétidu.

“Bürküt” tenterbiye kulubi qirghizistandiki tonulghan tenterbiye soruni bolup, hazir bu kulubning Uyghur, qirghiz, rus, özbék qatarliq milletlerning tenterbiye mahirliridin bolup 300din köp ezasi bar.

10 - , 11 - dikabir künliri bishkek shehirining “Ghujamqul”namidiki tenterbiye sariyida ötküzülgen qirghizistanning 2015 - yilliq chélishish musabiqiside “Bürküt” tenterbiye kulubining ezaliridin ikki mahir 130 kilogiramliqlar we 100 kilogiramliqlar boyiche chimpiyonliqqa, yene ikki mahir 74 kilogiramliqlar we 69 kilogiramliqlar boyiche ikkinchilikke érishti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.